E à progjetât “Ephemera”, il prin festival di culture imateriâl in Italie, che al va indevant in Setembar
“Libars di scugnî lâ” al diseve il poete cjargnel Leo Zanier, e Michela Lupieri si ricognòs ta chês peraulis. «La mê vite e je simpri stade un lâ, tornâ e lâ di gnûf: di cuant che o ai lassât il liceu di Tumieç par chel di Glemone e po Vignesie, Milan, Berlin, Dresde… Cjase, par me, a son ducj i lûcs li che o ai vivût e là che forsit o larai a vivi». E cjase e je la Cjargne, li che «lis mês lidrîs a son saldis, siguris. Il leam cu la mê tiere al è stât simpri une vore fuart, o sint di apartignîi, a bastin un paisaç o un profum par dismovi chel sintî».
◆ Michela Lupieri si ocupe di art contemporanie. E je ricercjadore, curadore di mostris, autore e docente. «O ai vût moments dificii sul imprin e la gavete e je stade lungje, ma o soi contente di ce che o ai fat, e o crôt che no rivarès a fâ altri». Inmagade dai spazis li che la nature e je protagoniste, e je atrate dai lûcs decentrâts: tiere fertile par progjets unics, intun dialic costrutîf cu la storie, l’ambient e la int che in chei lûcs e je a stâ.
«O soi vignude sù intune famee di viodudis culturâls largjis, curiose e vierte ae art, e cui miei gjenitôrs o vin simpri viazât. Viazâ ti vierç il cjâf, ti fâs incuintrâ il no cognossût, il diviers, e, di consecuence, adatâ il to pont di viste. Cun mê mari e gno pari, che mi àn simpri poiade tes mês sieltis, o ai viodût lis primis mostris».
◆ La curadore tumiecine e je cressude dongje dal Prato d’Arte Marzona (Art Park) di Vile di Verzegnis, il prât di art contemporanie ideât dal colezionist Egidio Marzona in terens di sô proprietât, che al met adun oparis di Land Art, Art Puare e Minimalisim fatis di artiscj internazionâi par disvilupâ un dialic tra il costruît e la nature, doprant dispès materiâi locâi. «Fin di frutine, lis instalazions sparniçadis intal prât, cence nissune spiegazion, mi àn incurioside tant di volêlis studiâ e aprofondî, e chest, di fat, al à segnât il gno percors di studis e professionâl».
◆ A Vignesie, Michela e à frecuentât un cors universitari cuntun program didatic inovatîf e stimolant, unic in Italie, che «al ufrive la pussibilitât di confrontâsi cun docents internazionâi, artiscj, curadôrs, critics che a lezion a puartavin la lôr esperience, la lôr voglade su lis robis. E ta chê citât, crosere di culturis e personalitâts in graciis de Bienâl, a son nassûts leams professionâi e di amicizie profonts, che a fasin part ancjemò de mê vite. Daspò de lauree, cuntun grup di coleghis amîs di universitât o vin fondât un coletîf a Florence, o metevin sù mostris in spazis abandonâts pe dibisugne e pe urgjence di fâlu. O vin agjît in paralêl a chel che a fasevin lis istituzions, otignint grancj risultâts. A son stâts agns formatîfs e di cressite, di confronts continuis, di esperiencis di vite condividudis, di viaçs. Tra i tancj, mi impensi chel in Argjentine, che par trê mês – di Buenos Aires al Cile fin ae Patagonie – nus à puartâts a cirî modalitâts alternativis e diferentis de nestre di fâ progjets culturâi, in maniere indipendente e dal bas».
◆ Intal 2018, di là di vê vivût par un periodi a Berlin, Michela si è trasferide a Dresde in gracie di une borse di ricercje intal Archiv der Avantgarden – Egidio Marzona Staatlichen Kunstsammlungen Dresden. «Un spazi di no crodi, che al vierzarà al public in curt: un archivi di ideis, ogjets, oparis di art, ephemera (documents che a contin il procès artistic, ndr) – des Avanvuardiis a dut il Nûfcent – metûts dongje di Marzona intai agns. A Dresde o soi restade trê agns e mi soi confrontade cuntune citât dificile, ancjemò segnade dai bombardaments de seconde vuere mondiâl. Nol è stât facil, ma studiâ une des colezions plui raris che a esistin, insiemi a coleghis di dut il mont e, cun lôr, dedicâmi dal dut ae ricercje, e je stade une esperience fondamentâl. O ai imparât tant e o ai podût colaborâ cun altris istituzions todescjis tant che il Marta Herford Museum. Simpri in Gjermanie, o ai scomençât il gno dotorât in storie de art cuntun progjet di ricercje propit su la colezion Marzona».
◆ La colezion e reste un dai interès principâi e pont fer dal percors professionâl di Michela Lupieri, convinte de «capacitât de art visive di jessi strument di leture di ce che al sucêt, ricercje cui teritoris, relazion cu lis personis che ju vivin e no ogjets estetics fins a se stes». Su chest troi, Michela insiemi a Eleonora Cedaro e Rachele D’Osualdo, e à ideât e progjetât “Ephemera”, il prin festival di culture imateriâl in Italie, che al gjolt, tra chês altris, de poie de Regjon. Sierade la prime part, la seconde si inviarà in Setembar. «”Ephemera” al è nassût de dibisugne di contâ il contemporani e al è stât imagjinât pensant a cinc lûcs simbul ta chest setôr in Friûl-Vignesie Julie – Prato d’Arte Marzona, Vigne Museum, Palaç Lantieri, Librerie Martincigh e Trieste Contemporanea –; par ognidun o vin imbastît une propueste artistiche che e partìs des lôr specificitâts. Chest par dî che in regjon a son realtâts indipendentis che lis lôr diretoris, cun indurance e resistence, si ocupin di produzion e ricercje. E je atente al contemporani ancje cualchi aministrazion, tant che chê di San Vît dal Tiliment che o colabori cun jê dal 2018. Traviers dal festival “Palinsesti”, che al à ancje un premi internazionâl par une gnove produzion di opare publiche pe citât, la art contemporanie e dialoghe di passe trente agns cui siei spazis storics e cui siei abitants. Ma in gjenerâl, a nivel di istituzions, si scomet pôc su la art contemporanie. E sarès bisugne che la classe dirigjente e cjalàs bande professioniscj cun competencis e contignûts, che e fos vision e strategjie, programazion a lunc tiermin, e interès reâl a lavorâ ta chest cjamp».
◆ Cjalant il doman, Michela e à une vore di progjets e di siums, doi su ducj: «vierzi in regjon un centri di ricercje/istituzion sul contemporani e fâ un viaç, di une cueste a di chê altre, intai deserts americans a viodi dal vêr lis instalazions di Land Art sparniçadis li e che, a vuê, o ai cognossût dome sui libris». ❚
……………………………………………………………………….
IL PROFÎL
Classe 1983, nassude a Tumieç, li che e vîf, Michela Lupieri e je curadore, ricercjadore, autore indipendente e docente di storie de art contemporanie te Academie di bielis arts “Tiepolo” di Udin. E scrîf par catalics e rivistis di art.
◆ E à studiât Progjetazion e produzion des arts visivis te Universitât IUAV di Vignesie, li che si è laureade cuntune tesi sul Prato d’Arte Marzona (Art Park) di Vile di Verzegnis. E je daûr a fâ un dotorât di ricercje in storie de art ae TU Universität di Dresde cuntun progjet di ricercje su la colezion Marzona.
◆ E je diretore artistiche insiemi cun Eleonora Cedaro, cun Rachele D’Osualdo pe part organizative, di “Ephemera – Festival di culture imateriâl”, un progjet trasversâl di arts visivis, performativis e laboratoris pal cuarp e il cjâf, chest an ae sô prime edizion. Dal 2019 e je cofondadore de Associazion culturâl Amariana, une plateforme dedicade ae ricercje e produzion artistiche contemporanie cun sede a Verzegnis, ative a nivel internazionâl.
◆ Dal 2018 e je te scuadre di “Palinsesti”, festival di art contemporanie a San Vît dal Tiliment, tant che curadore dal premi internazionâl “In sesto”. Intal stes an i è stade assegnade une borse di ricercje al Archiv der Avantgarden – Egidio Marzona, a Dresde. E à colaborât cul dipartiment di ricercje di cheste istituzion fin al 2020.
◆ Intal 2019 e je stade ricercjadore associade pe mostre “Unruly Splendor Design Punk versus Bauhaus” al Marta Herford Museum, in Gjermanie. Tra il 2016 e il 2021 e à lavorât tant che assistente curadore cun “Dolomiti Contemporanee” e “RAVE – East Village Artist Residency” dongje di artiscj zovins e afermâts.
◆ E à vût curât “Trial Version”, progjet urban intai spazis abandonâts di Florence (2011-2015), e “Walking. Art in cjamin”, progjet su la mont de Cjargne al confin cu la Austrie, che al colegave la pratiche dal cjaminâ ae ricercje artistiche, invidant artiscj contemporanis a produsi gnovis oparis pai trois di mont (2016).
◆ E je socie di AWI Art Workers Italia, une associazion autonome e apartitiche che si cjape cure di cui che al lavore intal setôr de art. ❚
