Un viaç tal disordin de realtât che o vivìn cun Franco Giordani, tal gnûf album “Ressenâl”

“Il timp al cor, al scjampe come un gjat. Oh, Ressenàl / E doman? Cuissà ce che al sarà. Oh, Ressenàl” cussì al cjante Franco Giordani, cjantautôr e artist che o vin za vût mut di cognossi tacant dal 2015, cuant che al publicà “Incuintretimp”.
◆ Intal album, “Ressenàl”, presentât al public ai 9 di Lui te curnîs di Suns Europe, Giordani nus puarte intun gnûf viaç, fat di musiche, poesie, melodiis di dolôr, memorie, amôr, proteste e ironie, che si costruissin intai tocs di un album che nus conte dal teme dal disordin. “Ressenàl” al vûl di di fat disordin, te variante furlane di Claut, che al derive di “arsenâl”.
Il disordin che nus conte al è sedi emotîf che sociâl: dai afiets e de nostalgjie, al teme de emigrazion, ae critiche ironiche sociâl e politiche, aes vilotis che a contin il maridâsi tal timp dal green pass.
◆ «Dopo de jessude di “Truoisparis” tal 2017, o ai scomençât a scrivi gnovis cjançons. Ma “Ressenàl” al è jessût dome dopo cinc agns, par colpe de pandemie. I temis di chest album a son tancj e diviers, cussì come i gjenars musicâi che a rapresentin chest “disordin” che al da il titul al album.»
L’artist al è tornât a partî de musicalitât dal ultin album, cjapant ispirazion di gnovis progressions musicâls e evolvint «graciis ancje a Leo Virgili, che nol à bisugne di presentazions», nus conte Giordani.
◆ «O sielç la lenghe come che un artesan al sielç l’imprest di doprâ.»
Ressenàl al ten dongje 6 tocs par talian e 8 par furlan. Tes cjançons in marilenghe si ricognossin la lenghe tes variantis di Claut, Andreis, Barcis, Cordenons (il cussì clamât “folpo”) e Montreâl.
◆ Cussì come che al veve za fat in “Truoisparìs”, Giordani al à sielzût di meti in musiche poesiis che lu àn tant emozionât: “Soldato del carbone” di Barbara Floreancig, “Spieteme” di Federico Tavan, “Oh l’Italia” di Giuseppe Malattia, “Jeir” di Aldo Polesel e “E jò?” di Rosanna Paroni Bertoja. La cjançon che plui di dutis al à tal cûr e je “Soldato del carbone”: «dedicade ai minadôrs (in particolâr a chei partîts des Vals dal Nadison) che te Belgjiche a àn pierdût la salût e che si son sacrificâts par creâ une vite miôr pai lôr fîs. La cjançon si finìs cuntun côr in dialet sloven. O crôt che e sedi tant emozionante e mi plasarès fâle deventâ ancje un video.»
◆ In plui dal grup storic che lu a simpri acompagnât (Massimo Gatti, Elvis Fior e Alessandro Turchet), o cjatìn tal album ancje Leo Virgili (che al à rangjât cun Franco diviers tocs), Francesco Mosna, Paola Selva, Alvise Nodale, Jimmi Bressa, Davide Tomasetig e Chiara Trentin. Leonardo Giordani e Gabriele Della Valentina a àn cjantât il rap de cjançon “Campagna elettorale”.
◆ “Rassenàl” si pues comprâ daurman dal sît dal editôr Nota www.nota.it in version digjitâl.
Ma l’album te sô cuviertute al è alc di ecezionâl: «Insiemi cun Valter Colle, l’editôr che al à publicât ducj i miei albums, o vin pensât che al sarès biel rapresentâ il disordin cui cuadris dal pitôr Giordano Floreancig.
◆ Tal librut di 46 pagjinis che al acompagne il cd, a son contignudis 11 imagjins a colôrs dal artist, che o ringracii ancjemò par vêmi dade la pussibilitât di doprâ lis sôs oparis. L’album fisic al à dentri ancje la introduzion scrite di Maurizio Mattiuzza, un intervent di Toni Capuozzo che al presente Giordano Floreancig e une conte di Giorgio Olmoti.»
Par ricevi a cjase Rassenàl, o podês scrivi a klautans@gmail.com, o comprâlu li dal Angolo della Musica di Udin.
◆ In plui dai festivals prestigjôs tant che Suns Europe e Folkest, e come part dal progjet “La Tela”, “Rassenàl” al è stât ancje presentât tal pais di Franco di plui di 20 agns: Muimans. Ma tancj a son i concierts in program. Stait inzornâts su lis prossimis datis, stant daûr a Franco Giordani sui social o sul sît www.francogiordani.com. ❚