Cors di furlan par gjornaliscj: consegnâts i atestâts

Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion le àn fate l’assessôr regjonâl delegât aes lenghis minoritariis, Pierpaolo Roberti, il president dal Consei Regjonâl, Piero Mauro Zanin, il president de ARLeF, Eros Cisilino e il president dal OdG regjonâl, Cristiano Degano.
◆ «Par fâ informazion, i professioniscj dal setôr a àn di jessi specializâts ai nivei plui alts – al à declarât l’assessôr Roberti –. Chest nol à di jessi valit dome pal talian, ma ancje pal furlan e o pensi che chest cors al sodisfi ad implen chest obietîf. Une iniziative che e à viodût une colaborazion slargjade, vint gjoldût de partecipazion no dome di sogjets privâts, ma ancje de istituzion stesse e dal Ordin dai gjornaliscj». L’assessôr al à sierât il so intervent cul auguri che la convenzion stipulade cu la Rai pe difusion dal furlan no si fermi aes «pocjis oris par an te programazion» previodudis in dì di vuê, in graciis di «une fete grande di public che al à il desideri di scoltâ trasmission televisivis e radiofonichis in lenghe furlane».
◆ Il president Zanin al à zontât: «Midiant dal impegn di chescj professioniscj, o vin contribuît ae difusion e al inlidrisament de lenghe furlane, par che e deventi di fat no dome une lenghe fevelade in famee ma une espression sociâl, e cun jê podê informâ la comunitât su ce che al sucêt doprant i media tant che veicul. In cheste maniere, il furlan al pues ancje rinovâsi cun gnûfs tiermins e nô o varìn a disposizion un piçul esercit di gjornaliscj che al sarà in prime linie intal slargjâ cheste lenghe, che e je la nestre, e che e je ancje tes fondis de specialitât dal Friûl-Vignesie Julie».
◆ «O vin vût cetancj riscuintris di sodisfazion ae fin dal cors – al à dit il President Cisilino –. In tancj nus àn ringraciât pal percors fat, ma a àn ancje domandât plui informazions par podê lâ indenant cu la formazion in forme privade, e incressi ancjemò di plui lis lôr competencis. Chest nol pues che jemplânus di passion. Visìnsi che chest al jere a pene il prin cors inmaneât in maniere specifiche pe categorie dai gjornaliscj de nestre regjon; l’obietîf al è chel di lâ indenant cun chestis ativitâts par che a deventin regolârs, e par chest o vin di vê agrât al Ordin, che al à dât daurman la sô disponibilitât».
◆ «Il furlan al è une lenghe minoritarie tutelade dal Stât e de Regjon e duncje al è just che ancje l’Ordin dai Gjornaliscj al fasi la sô part – al à marcât il president Degano –. Par chest o vin dât acet daurman ae propueste de ARLeF di organizâ insiemi cors indreçâts ai coleghis par scrivi in maniere corete par furlan. Par resons peadis aes regulis de nestre formazion professionâl, nol è stât pussibil inserî chescj cors tal program formatîf dal OdG, ma i coleghis che a àn ricevût l’atestât a podaran dut câs domandâ al Ordin nazionâl il ricognossiment dai credits individuâi.»
◆ Il cors, il prin tal so gjenar, al jere indreçât ai professioniscj e ai publiciscj cuntune competence otime de lenghe furlane fevelade e al smirave a ufrî une formazion di base par imparâ a scrivi par furlan, ancje doprant i struments informatics a disposizion, e daûr de grafie uficiâl. In dut, fra Avrîl e Lui dal 2022, a son stât fats 12 incuintris, par un totâl di 25 oris là che il docent, Michele Calligaris, al à frontât diviers temis partint di concets gramaticâi di fonde, par rivâ po dopo a argoments plui complès.
◆ Ogni lezion e jere spartide in dôs parts: une teoriche e la seconde plui pratiche, cun esercizis gramaticâi davuelts in classe, leturis e provis di traduzion o di produzion scrite. Ae fin di ogni lezion a son stâts dâts esercizis facoltatîfs di completâ in maniere autonome e di inviâ al docent vie pe setemane o di corezi insiemi, te lezion seguitive. Ae fin dal percors, i gjornaliscj che a àn frecuentât almancul il 70% des lezions a àn sostignût une prove finâl, che ur à dât il dirit di vê l’atestât di partecipazion, document che al permet di domandâ il ricognossiment dai credits formatîfs professionâi. ❚