Une zornade di incuintri pai Conseis dai Fantats
Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son tancj i furlans che a son dacuardi cun lui e che a fasin ogni dì il mistîr di “pizighets de nestre identitât”. Furlans che a considerin inutil imparâ la marilenghe parcè che “no covente”, inutilis lis tabelis bilengâls tes stradis parcè che “a confondin”, inutile la nestre culture parcè che “o vin di jessi citadins dal mont e al è miôr savê l’inglês”.
◆ Puare int! Al è un pecjât che no crodin di vê avonde cjâf par imparâ dôs, trê o ancje cuatri lenghis: ma ocjo parcè che, come ogni om, ogni popul al è libar di suicidâsi. Prin di copâ la nestre identitât e lis nestris sperancis di tignî vive la flame di une storie milenarie, chescj “furlans par mût di dî” a fasaressin miôr a cjalâ la fotografie chi parsore, che e mostre ce che al podarès jessi il Friûl dal avignì, e che al è ben lontan dai lôr prejudizis e di chei di int come Menia.
◆ La rispueste plui biele e ven di passe 50 zovins dai 10 ai 16 agns che, in rapresentance di 12 Conseis Comunâi dai Fantats, a àn rispuindût al apel de Assemblee de Comunitât Linguistiche Furlane, la uniche istituzion a volê meti dongje i fantats furlans par une zornade di confront e di condivision. La manifestazion, che si è davuelte a Flumisel-La Vile in ocasion dai 25 agns di fondazion dal prin Consei furlan dai fruts, e je stade insiorade di laboratoris cun Angelo Floramo, Michele Polo e Claudio Romanzin e di une cjaminade par rifleti sui dirits fondamentâi, che e je rivade fin tal Parc intitulât a un zovin furlan che agns indaûr al jere partît propit di chel paîs par esplorâ il mont, prin di jessi copât di un regjim autoritari: Giulio Regeni.
◆ Dal lôr incuintri chescj fantats, che no si jerin mai cjatâts prin, si son cjatâts in cunvigne di dâsi dongje ancje inte Vierte che e vignarà, par metisi in rêt e no dispierdi la esperience e la cognossince che a àn screât culì. Si son inacuarts di no jessi “di bessôi”, o dome part dal lôr paîs, ma di jessi un toc di un biel mosaic une vore plui grant che al è clamât Friûl. Un mosaic che cualchidun al volarès fâ a tocs, ma dibant. I “pizighets de identitât” a puedin zaromai metisi il cûr in pâs. I furlans no si son lassâts crevâ di invasions, vueris, taramots e miserie: e ancje cheste volte o sarìn in tancj a resisti cence pleâ il cjâf devant di un destin che nol è inevitabil, ma che al dipent dome di nô… ❚