I misteris de sanitât furlane

A varessin di fânus sperâ in ben ducj i programs di intervent declarâts de Zonte regjonâl intal setôr de sanitât publiche: riformis cun cifris badiâls, creazion di centris di ecelence, riformulazion dai distrets regjonâi. A stâ daûr des gnovis, dut câs, al somee propit che la situazion no sedi par nuie buine.
◆ Se di une bande, di fat, si garantissin servizis di cualitât a sedis periferichis, di chê altre bande si gjavin lis fondis par un pont di riferiment sul teritori.
◆ Al è il câs di Cividât, cun 10 milions di euros za stanziâts e 17 puescj jet che si zontin ai 28 presints pe residence sanitarie assistenziâl (Rsa), li che, dut câs, di mês a son stâts sierâts i reparts di medisine (dal Otubar dal 2020) e il prin socors, obleant la int a fâ stât su Udin, indulà che la ufierte e je aromai stropade di timp, e no dome par vie dal covid.
◆ No sunin miôr lis cjampanis a Glemone, indulà che al è stât fat bon un progjet esecutîf di ricualificazion di cuasi 4 milions di euros, di mût di vierzi un repart di riabilitazion intensive (sede periferiche dal Gervasutta), ma li che di Otubar dal 2020 al è stât sierât il prin socors, cun altris mancjancis une vore griviis, tant che la assence de vuardie mediche e dal miedi vie pe gnot, o fintremai l’elisocors che al scuen rivâ tal mieç dai prâts, stant che nol è un splaç di pueste.
◆ Ancje i 15 milions di euros imprometûts par Palme e Çarvignan par ospedâl, cjase di comunitât e centrâl operative teritoriâl no ur smechin nancje ai aministradôrs dal puest, che a fevelin di iniziativis di propagande eletorâl che no garantiran nissune sigurece ai citadins, massime par chel che al inten i reparts sierâts di chirurgjie gjenerâl e ortopedie, in plui dai servizis peâts al percors nassitis.
◆ Lis polemichis, però, no si fermin dome aes struturis, ma a son ben imboreçadis ancje sul cont dal personâl, simpri plui segnât e smonât dai (infinîts) zîrs di valz tra lis aziendis sanitariis, fuide dai coleghis e scjarse considerazion e tutele.
◆ Inte nestre Regjon a mancjin plui di 100 miedis di base, cun sogjets che si cjapin a caric passe 1800 pazients (li che il limit al sarès di 1570). Par vê une idee de situazion critiche, al baste pensâ che su dute la aree cuvierte de Aziende Sanitarie Universitarie dal Friûl Centrâl, su 336 miedis di medisine gjenerâl (dâts dal sît de Asufc), 23 a son chei disponibii par dut il Distret dal Glemonàs, Valcjanâl e Cjanâl dal Fier, 26 chei pe Cjargne, 31 pal Distret di Cividât (par une popolazion stimade di passe 50.000 abitants, duncje di là dal limit di pazients consintûts par un unic miedi di base). Intal Friûl di soreli a mont, de fin di Avost, i Comuns di Vivâr, Frisanc e Vaiont a son restâts cence miedi di base par vie des dimissions volontariis de dotoresse.
◆ E fâs scatûr ancje la situazion dai pediatris: dai 49 de Asufc, 4 a son chei disponibii pal intîr Distret dal Glemonàs, Valcjanâl e Cjanâl dal Fier, cun ambulatoris a Glemone, Mueç e Tresesin (e forsit, metude cussì, la strade asfaltade su la Mont dal Lussari no somee plui cheste prioritât assolude).
◆ No consolin nancje lis soluzions cjatadis fûr par fermâ la emoragjie: a vevin fevelât di cjapâ sù personâl cun titui di studi forescj (za fat in Calabrie cun cuasi 500 miedis cubans), ma i Ordins dai professioniscj dal Friûl-Vignesie Julie si son impontâts, stant che no jere previodude nancje une procedure di verifiche dal stât di preparazion.
◆ Par cuintri, propit cumò che a son daûr a vierzisi lis puartis pe formazion universitarie di gnûfs miedis e infermîrs, i puescj a disposizion a restin inmò limitâts (150 a Udin e 180 a Triest; aes provis di amission, dut câs, a jerin passe 1.000 di lôr), stant che no son lis struturis e il personâl par slargjâ il numar di students.
◆ In sumis, dai comunicâts stampe che nus rivin, al somee pardabon che si vueli fâ passâ un mus par un cjaval, o miôr un madrac par une magne, dome che a noaltris, invezit dal miluç di aur, nus restarà jenfri lis mans dome la piel secje de mude. ❚