Il Maiàs, une gnove specie di uciel nidificant intalsetôr setentrionâl dal Friûl

L’arc alpin orientâl al è, intes ultimis desenis di agns, teatri di un ampliament dai areâi li che si riprodusin e che a passin fûr l’Invier diviersis speciis di uciei. Chest fenomen, testemoneât ancje di plui studis publicâts dal autôr, al è seguît cuntun monitorament continui ancje intes Alps Cjargnelis e Juliis.
◆ Il maiàs Netta rufina a è une specie cjapade dentri inte famee Anatidae (chê dal masurin Anas platyrhynchos) che si riprodûs, inte fase climatiche continentâl e mediteranie, dal Portugal, viers soreli jevât, fin a la Cine e a la Indie.
◆ In Italie, intai agns 80 di chel altri secul, al nidiave cun regolaritât nome in Sardegne e ogni tant in Emilie Romagne e in Venit. Inte ultime trentine di agns al è stât verificât un aument des cubiis e une espansion di areâl cun riproduzions in varis sîts, sedi intes regjons setentrionâls che in chês centrâls e meridionâls. Ma istès, viodude la framentazion dal areâl riprodutîf, la consistence scjarse e la stabilitât precarie des popolazions nidificantis, il stât di conservazion dal maiàs, pûr lât in miôr, al ven stimât ancjemò “inadeguât” e la specie classificade tant che “vulnerabile”.
◆ In Friûl, timp indaûr, il maiàs al jere di passaç e/o al passave l’Invier ma, fin intal 2009, pûr cu la presince di individuis ancje intal periodi just, no si veve mai rivât a verificâ la riproduzion.
◆ Fin tal 2020, dutis lis nidificazions, cemût che al capite cuasi simpri ancje in chês altris regjons, a son stadis fûr de zone di mont.
◆ Intal 2021, pe prime volte e je stade aciertade la riproduzion intal setôr setentrionâl dal Friûl: mascje cun poleçuts intal Lât di Cjavaç.
◆ Su la fonde dai dâts publicâts inte leterature sientifiche, si à podût stabilî che cheste nidificazion e je la plui setentrionâl in Italie, e che e conferme la espansion dal maiàs, verificade timp indaûr, inte Europe centrâl.
◆ Al è une vore impuartant fâ studis continuâts intal timp e suntune aree come chê des Alps Cjargnelis e Juliis, parcè che chest al permet di regjistrâ i cambiaments intal status des diviersis speciis e viodi cemût che si svilupe la situazion ancje a nivel di singul sît. Chest al covente pe conservazion des speciis e dai habitats, e al è l’unic mût par fâ sieltis razionâls e no detadis di motivazions variis che no àn nuie a ce fâ cul mantigniment de biodiversitât e de naturalitât.
◆ A proposit di ce che al è a pene stât scrit, il monitorament finalizât a seguî la nidificazion dal maiàs al à permetût di verificâ la riproduzion ancje dal penacjin Aythya fuligula e dal cauròs Aythya ferina, speciis di Anatidae che di pôc a àn tacât a nidiâ intal Lât di Cjavaç (che si viodi La Patrie, Lui dal 2021) e di confermâ la nidificazion dal maiàs ancje intal 2022. La presince di chescj uciei e conferme la impuartance dal lât pes speciis leadis a la aghe.
◆ Tornant duncje al discors de conservazion, bisugne che la grande part des personis e cjapi cussience dal valôr di chel sît pal mantigniment di chel pôc che al è restât dal “patrimoni” naturâl di une volte. Chest par evitâ che la propagande che e ven fate sul sostegn de tutele ambientâl midiant di manifestazions di masse (sportivis, musicâls e altris) in ambits naturâi e sburti i aministradôrs publics – doprant magari fonts che dome nominalmentri a son in funzion de conservazion – a previodi intervents e/o oparis che a permetin a personis e mieçs di svicinâsi il plui pussibil aes rivis e di vê la massime visibilitât dal lât. Di fat, però, chest al distruzarès i habitats naturâi che a permetin lis nidificazions che si à fevelât e un nivel apropriât di biodiversitât. ❚