Il tecnic al à scomençât a fâ l’alenadôr di balon in tal 1979. Molâts i plui grancj, cumò al è coordenadôr dal vivâr da la Manzanese
Cuarantedoi agns di file, sentât su une bancjute di alenadôr di balon, a torzeon par dut il Friûl e no dome. Sôl che Giovanni Tortolo, clamât Gianni di ducj, al rive a meti adun cetante cariere e risultâts preseâts par dut, dibot. Cun di fa, al no si fevele dome di presince, ma ancje di vitoriis, di promozions, di une vore di zovins sburtâts a nivei superiôrs, di salvece cun scuadris che a no si crodeve, di serietât simpri papaline. Par dut e cun ducj.
Cumò, daspò che nissun al à pensât di clamâlu par vuidâ cualchi scuadre, il “Mister” al à decidût di tacâ a mateâ cui zovenuts da la Manzanese. Une realtât che a cîr di tornâ a rimpinâsi su in ta lis categoriis indulà che a si cjatave dome doi agns indaûr e che e à bisugne di tirâ su il vivâr al nivel di un timp. Ven a stâi che Gianni Tortolo al è rivât a meti adun bielzà numars une vore rimarchevui.
“O vevi decidût di molâ le ativitât di alenadôr di balon – al conte il “Mister” –. Purpûr, in Istât, i dirigjents da la Manzanese a son rivâts dongje e mi àn contât il progjet di rilanç da la societât. Par sante scugne a vevin di scomençâ di nuie, cul vivâr. A mi àn convinçût a la svelte e o ài tacât subite. O sin rivâts a tirâ su dutis li scuadris, in dutis lis categoriis dai zovins. La cualitât dai zuiadôrs a no je che dai agns indaûr: l’an passât, la Societât e à vinçût doi torneus regjonâls. Dut câs, a si viôt une vore di passion e di buine volontât par rivâ a vê, in curt, risultâts preseâts, ancje cun i grups gnûfs.
_ Cemût si pues tornâ a partî dopo che, in tai ultins agns, la Manzanese a si jere sfantade, di bot? “Al è une vore dificil. E je le tierce volte che o torni a Manzan: dôs di alenadôr, cuant che o vin vint le prime Cope Regjon da la Societât e daspò o si sin salvâts in Ecelence, e cumò come coordenadôr e dirigjent responsabil dal vivâr. Une vore di frututs e zovins a son lâs vie in tai mês indaûr e o ài scugnût mateâ par meti ancjemò adun numars par notâ lis scuadris a ducj i torneus. Fâ su scuadris cuant che a son lâts vie plui di setante di lôr e jere une mission impussibil, di bot. Il gnûf president Daniele Fedele, dal principi dal sô mandât, al à sburtât il progjet e al è stât brâf a tignî bote. Il non da la Manzanese nus à dât une man e o sin daûr a fâ dut ce che al covente par tornâ ad alt. Daspò che i campionâts a son tacâts, viodarìn trop che o sin stâts eficients”. _
Trop al judie ancje il so non e la so presince par tirâ dongje zovins zuiadôrs di dut il Friûl? Une famee o un gjenitôr che al à culture sportive e al cognòs il balon al varès di ricuardâsi di cui che al è Gianni Tortolo.
“Daspò 42 agns di file come alenadôr e je cetante esperience. O crôt di jessi une vore fortunât par dut ce che o ài fat in tal mont dal balon. Rivâ a sentâsi par dut chest timp su une bancjute al vûl dî che o ài simpri cjatadis lis pussibilitâts, che o ài vude la salût, la costance par meti adun une cariere cussì. Tantis voltis, a son vignûts dongje gjenitôrs cun la voie di fevelâ cun me, par domandâmi alc, par capî miôr alc, par vê conseis. Se al è cussì, alc di bon o scuen vê lassât in tal gno percors: mi fâs plasè e, sigûr, al jude”.
_ Esperience, sintiment, passion, amôr par la Manzanese. Ducj elements doprâts ancje par meti adun il grup di tecnics. “Dut just. Il gno prin pinsîr al è stât chel di clamâ int che e vedi motivazions. Fidel Covazzi, Lorenzo Sella, Mirko Vosca e Mauro Toloi a an un passât une vore impuartant cun la Societât. O vin fantats e frututs che a rivin di dut il teritori, di Gurize, di Monfalcon, cualchidun di Flumisel, Cividât, Udin, Puçui. O vin fidance che dut il lavôr al dedi sodisfazions, no dome come risultâts di scuadre: ancje come consolidament da la Societât e dal non da la storie e da la culture par il balon che la Manzanese a à simpri vût”. _
Sore dal lavôr di alenadôr, trop isal impuartant vê dirigjents di nivel e cun culture di balon?
“Fondamentâl. A Sacîl o ài vût Cauz, ài lavorât cun Bosco, Del Zotto… In ta la gno cariere o ài cjatât tante int cun la culture dal balon, che a cognosseve il balon, che a dave obietîfs clârs, a sostignive il confront, a sintive lis gno resons e a saveve tratâ lis situazions. A jere tante stime e o soi stât par da bon fortunât a vivi cun lôr”. ❚
::::::::::::::::::::::::::::::::::::::::::::::::::::::::::::::::::::::::::::::::::::
Inzornament continuât e tante passion: il sisteme dal “mister” par vê sucès, dilunc une cariere
Cuarantedoi agns di cariere, simpri a nivel alt e, di bot, simpri cun risultâts preseâts. E je cetante curiositât par savê cemût che Gianni Tortolo al è rivât a jessi simpri il miôr o, dut câs, un dai prins.
“O ài tacât a alenâ cuant che o vevi 28 agns e o ài finût cumò, passâts i setante. Dut al è cambiât: il balon par sigûr, ma ancje la societât, la int, lis cognossincis, la culture. Si scuen jessi simpri inzornâts, bisugne studiâ, preparâsi, cognossi il mût di lavorâ di chei altris, dai aversariis. No dome an par an: tantis voltis, al covente savê lis robis gnovis mês par mês, lant daûr de velocitât da la evoluzion di dut. Jo o ài vude la fortune di lavorâ dentri di une Aministrazion Comunâl, indulà che in tal prin dopo di misdì o jeri simpri avonde libar di lâ a tor, a Udin, a Triest, a Trevîs, par viodi i alenaments da lis scuadris dai professioniscj. In ta chês situazions a si imparin une vore di robis. E soi simpri lât a viodi ancje il lavôr di altris alenadôrs, da lis categoriis dai diletants, cun che di imparâ. Par jessi rivât fin achì o scuen ringraciâ la gno famee. Cumò o mi gjold cheste esperience a Manzan: o crôt che la Societât a tornarà almancul al nivel indulà che a jere prime”. ❚
:::::::::::::::::::::::::::::::::::::::::::::::::::::::::::::::::::::::::::::::::::::
La cariere ecezionâl dal “mister” di Palme
Gianni Tortolo, il “mister” par antonomasie dal balon furlan, classe 1948, di zuiadôr al à simpri vistude la maiute dal Palme, dal 1964 al 1976: dodis agns di passion e di curie, a torzeon par i cjamps sportîfs. In tal 1978 al à cjapât il patentin di alenadôr e, cun chel, al si è sentât su la bancjute dal Jalmic, lant a vinci la Tierce Categorie.
◆ Daspò di chê volte, al à passât cinc agns a Aquilee, mateant sedi cu la prime scuadre, sedi cul setôr dai zovins: dongje da la Basiliche al à cjamât trê campionâts dai frututs e sburtât indenant 8 zuiadôrs, puartâts a zuiâ cun i grancj.
◆ In tal 1986 al è lât a Sevean, in Prime Categorie. Culì al à vinçût il campionât e la Cope e al à tirât in dilunc a vinci. Lât su in tal Campionât dai Diletants (in ta che volte al no l’ere il torneu di Ecelence), al à tignude la scuadre simpri salve.
◆ In tal 1992, al prin an a Çarvignan, al à subite vinçût il campionât di Prime Categorie e le Cope Regjon Friûl Vignesie Julie. Doi agns plui tart al è lât a Palme, par vinci il campionât di Ecelence e lâ su in tal torneu Interregjonâl.
◆ In tal 1997 le prime esperience a Manzan, in dulà che al à vinçût la Cope Regjon di Ecelence. Tornât indaûr a Palme, al è stât bon di sburtâ la scuadre di gnûf in Ecelence e in serie D. In ta chei agns al à purpûr cjapât il patentin di alenadôr “Uefa B”. In tal Fevrâr dal 2001, il Palme al à decidût di lassâlu a cjase, cun dut che al veve puartât la societât a un nivel une vore alt.
◆ Nuie mâl, trê agns cun la Sacilese a son stâts a vonde par vinci un torneu di Ecelence, une Cope Regjon e une SuperCope, salvant le scuadre in ta l’Interregjonâl dal 2003-04.
◆ Di chê volte, al è lât a Pordenon, par vinci le Ecelence dal 2005/06 (e jessi lassât a cjase insom dal campionât 2007), daspò a Rivignan in serie D (esperience negative: esonerât a metât stagjon), ancjemò a Palme. Bielis sodisfazions a son rivadis dal 2009 al 2012, a San Vît dal Tiliment, indulà che al à tignude ad alt, in tal Interregjonâl, une scuadre une vore zovine.
◆ Domenie, ai 7 di Otubar dal 2012, su la bancjute da la Virtus Corno, al à festezât lis 1000 presincis come alenadôr. In tai ultins agns, al à alenât ancje Manzanese, Kras a Monrupin, la Pro Çarvignan (vinçût Promozion, Cope Regjon FVG e Super Cope).
◆ In dut, dîs torneus vinçûts, siet Copis, 42 agns di file in bancjute (trê esonerazions): une cariere ecezionâl. In talIn tal ultin periodi al à vuidât la Rapresentative dai juniores dal Friûl Vignesie Julie. Nissun torneu, ancje par vie dai problemats cul Covid, dut câs un inricjiment par ducj i atletats che a àn lavorât cun il “Mister”. ❚
