Barlums: un barlumâ di peraulis trascritis in notis cul tornâ dai Bràul

«O vin volut da vôs a un pâr des storiis che a àn contribuît a definî la nestre identitât culturâl. Ancje se il Friûl e je une tiere “ai margjins”, no par chest e je une tiere “margjinâl”».
◆ A son passats 17 agns de publicazion dal lôr ultin album e 25 dal prin. A àn traviersât periodis dulà che al someave che il grup al stes lant in dismentie. Invezit… Cun musiciscj storics, ma ancje gnûfs compagns di aventuris, e gnûfs tocs, progjets e tante voie di sunâ, a son tornats i Bràul!
◆ Us al vevin za anunziât tal 2018, ta interviste de Patrie (“Bràul, passe vincj agns di musiche sui palcs dal Friûl e no dome”) che a stavin za lavorant ae creazion di un concept album che al celebre il Friûl e i furlans cun tocs basâts su storiis, scrits e contis de tradizion. Il titul che a àn sielt par chest gnûf album che al vignarà publicât ae fin dal an o sul tacâ dal 2023, al è “Barlums. Canti d’inchiosto”. Un lavôr che si svilupe animât dal spirt di inovazion e di sperimentazion musicâl che il grup al e stât riferiment tal percors di rinovazion dal folk furlan.
“Barlums. Canti d’inchiosto” – che al rapresente la lûs che lis notis musicâls a produsin e che a iluminin il test leterari – al à dentri nûf tocs, e al trasforme cussì l’ingjustri di nûf storiis in nûf tocs musicâi.
◆ La gnove formazion dal grup e je cheste: Nicoletta Cattaruzza ae armoniche, Sonia Altinier al violin, Gabriella De Cesco vôs e percussions, Giacomo Traina ae ghitare, bouzouki e vôs, Claudio Mazzer aes percussions, flaut, pivis, ghitare, bouzouki e vôs, e Andrea Gaspardo al bas eletric.
◆ Par presentâ i gnûfs tocs a àn sunât in anteprime al Folkest e daspò za te suaze di diviers events: intun conciert al Hospitale di Sant Zuan di Sant Tomâs a Maian e par Avostanis, tal storic agriturisim “Ai Colonos” di Vilecjaze.
◆ Pai doi concierts a Sant Tomâs e Ai Colons il grup si è proponût cun doi titui diviers: “Barlums. Freschi di stampa… la storia è musica, la parola è canto” e “Metûts in musiche”. Chescj titui, cussì come il non dât al gnûf album, no podevin jessi plui induvinâts par presentâ chest lôr progjet che al da vôs aes storiis, ai libris de nestre tiere e che a contin la nestre tiere, il dut tradusût in musiche.
◆ Par realizâ chest album, il grup al à fat un lavôr lunc di ricercje, che si ispire a oparis di scritôrs furlans, talians e forescj.
◆ Lis nûf storiis a son ben svariadis: une si ispire a un anonim autôr dal Cinccent che al scrîf une cjançon par furlan su la bataie di Lepant, une altre e conte la storie dal ultin cjarbonâr, e daspò ancje un toc su la storie di Angioletta delle Rive in talian antîc, e un cjant ispirât aes “indemoniadis di Verzegnis”. Ma si tabaie ancje de storie de decimazion de brigade Catanzaro, cuant che zovins meridionâi a vegnin fusilâts tal 1917 a Sante Marie La Lungje par vê tentât la insurezion cuintri de vuere. Ancje la storie di Elvira Kamenšcˇirova de Transsiberiane che e conte il paisaç, la vite di stents e la figure de Contesse di Braçà e ven traspuartade in musiche e infin a contin ancje un fumet di Paolo Cossi e ancje il “Sogno di una cosa” di Pier Paolo Pasolini.
◆ Ogni toc al è particolâr. Notis e musicalitâts studiadis, che a riprodusin i cjants de glesie aquileiese cuntun stîl che al à tonalitâts dramatichis o misteriosis ma ancje discjantadis, fin a rivâ al ultin toc in atmosfere pasoliniane, rindude cuntun unic acuardi in minôr.
◆ No viodìn la ore di scoltâ chestis contis e di vê in man il gnûf album dai Bràul. Intant o podìn seguîju tai concierts ator pal Friûl, stant daûr al lôr program e ae lôr pagjine Facebook: BràulFriul. ❚