Ai 25 e ai 26 di Novembar il Friûl al torne a jessi il centri di chê Europe che e je impegnade inte promozion dal dirit ae lenghe e dal dirit ae diversitât, midiant de produzion artistiche e de comunicazion. In chês dôs zornadis si sierarà la edizion 2022 di Suns Europe, il festival european des arts in lenghe minorizade, inmaneât de cooperative Informazione Friulana, la societât editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazione Friuli e cu la colaborazion dal Istitût basc Etxepare e di cetancj altris sogjets publics e privâts, internazionâi e di chenti. Dopo de prime part dal program, che si à disvilupade tai mês di Jugn e di Lui stâts, cu lis proiezions dal cine catalan ‘Alcarràs’ e cuntune schirie di events che, tra musiche e leterature, a àn puartât ator une rapresentance significative de espression artistiche creative e cussiente des comunitâts di minorance de Europe, la part finâl dal festival si davuelzarà a Udin e a Gurize.
◆ L’apontament clou, daûr di chê che tacant dal 2015 si pues calcolâle za tant che une tradizion, al è il conciert che si davuelzarà inte capitâl dal Friûl inte serade dai 26 di Novembar. Sul palc dal teatri ‘Giovanni di Udine’ si podarà cjalâ e scoltâ dal vîf sîs diferents progjets musicâi, che a son espression di ancjetantis comunitâts linguistichis in cundizion di minorance. Il cartelon de serade al cjape dentri la cjantante basche Olatz Salvador, la zovine band galese HMS Morris, il cjantautôr di Drèents (Basse Sassonie – Paîs Bas) Rick Hilberts, il progjet sart-furlan Ealûs, il grup sloven cjarsulin Viloncelli Itineranti e il nostran Massimo Silverio: un program di sale che ancje par chest an al è caraterizât di varietât e cualitât, tra rock, pop, folk e sperimentazions acustichis e eletronichis. Lis sîs propuestis a son stadis selezionadis dentri di passe trente candidaturis fatis indenant in rispueste dal avîs dât fûr vie pal Istât. Par partecipâ ae serade si à di cjoli il biliet, che si pues comprâ li dal “teatron” o midiant di internet (https://teatroudine.vivaticket.it/it/event/suns-europe-2022/195020).
◆ Tal teatri di Udin a saran ancje altris apontaments vie pe zornade dai 25 di Novembar. In particolâr e sarà la pussibilitât, dilunc vie de zornade, di cjalâ la serie audiovisive imerisive in lenghe furlane dal titul ’33/16′. Chê metude adun di Enrico Maso e Marco Fabbro e je une produzion di avanvuardie tal lengaç naratîf e sul plan tecnologjic, che la sô fruizion e je individuâl e interative: un prodot fat cun telecjamaris a 360 grâts e caraterizade dal sun direzionâl, che ogni spetatôr al cjale doprant un visôr che lu puarte in maniere direte “dentri” de storie ucroniche di fantasience che e ven contade cu lis imagjins e cui sunôrs.
◆ Vinars ai 25 di Novembar la seconde session di Suns Europe 2022 si davuelç almancul in part ancje intal Friûl Orientâl. In particolâr, a Gurize (tal moment che o sin daûr a lâ in stampe lûc e orari a son ancjemò in vie di definizion) si fasarà un incuintri internazionâl par resonâ in cont di cemût che un teritori cun plui lenghis e identitâts al puedi esprimisi in maniere miôr tant che Capitâl europeane de culture, tra coesion sociâl, disvilup socioeconomic, dirits e citadinance multiculturâl. L’apontament si clame “Plui lenghis, plui culture, plui Europe. Donostia 2016 > Ljouwert 2018 > Nova Gorica-Gurize 2025” (cul titul declinât ancje par sloven e par talian) e il so intindiment al è chel di meti a confront ce che si è daûr a fâ – e che si varà di fâ – tal Gurizan dentri dal 2025 e lis buinis pratichis metudis in vore intes citâts di Donostia-San Sebastián (Comunitât Autonome Basche, Ream di Spagne) intal 2016 e di Ljouwert-Leeuwarden (Frisie, Ream dai Paîs Bas) intal 2018. Informazions plui in detai in rêt: www.sunseurope.com ❚
