Seconde part – Risultâts e considerazions conclusivis. La gnove viabilitât e fâs cressi di 25 voltis il numar des bestiis che a vegnin cjapadis sot
Il studi introdusût inte prime part dal articul al è stât fat in rapuart al gjenar di fonts stradâl.
A son stadis consideradis dôs stradis, intal Cjanâl di Guart, che a traviersin un bosc. Une strade e je a pidival dongje dal Dean, chê altre e je sul versant a drete dal cjanâl; dutis dôs a incrosin un riul (sît doprât ancje pe riproduzion).
◆ I rilêfs a son stâts fats dilunc des stradis, prin e dopo che a fossin asfaltadis, tignint cont dai anfibis e dai retii che a son stâts cjapâts sot.
Tal stes timp, al è stât tignût in considerazion ancje il volum dal trafic, di mût di verificâ lis sôs eventuâls modifichis e cemût che chestis a podevin incidi.
◆ Cuant che lis stradis a jerin blancjis, in dutis dôs a son stadis cjatadis carognis di dôs speciis (salamandrie Salamandra salamandra e ‘sâf Bufo bufo), dopo de asfaltadure di siet speciis (salamandrie, ‘sâf, crot di rosade Rana temporaria, vuarbe Anguis fragilis, sborf Lacerta viridis, lisierte Podarcis muralis, madrac di aghe Natrix natrix) inte strade a pidival, e di cinc (salamandrie, ‘sâf, crot di rosade, vuarbe, lisierte) inta chê altre strade.
◆ Tignint in considerazion dutis lis speciis, il numar massim di carognis cjatât intun sôl rilêf par chilometri di strade al è cressût cul asfalt di plui di 25 voltis inte strade plui in bas, e di cuasi 21 voltis in chê plui adalt.
Dopo che lis stradis a son stadis asfaltadis, lis dôs speciis che a àn patît di plui la modifiche dal fonts stradâl, la salamandrie e il ‘sâf, a àn fat regjistrâ une incressite esponenziâl dal numar di carognis: cuasi 15 voltis pes dôs speciis inte strade plui basse, e in maniere rispetive 26 e 11 voltis in chê altre.
◆ Considerant ducj i rilêfs e dutis lis speciis, la bondance totâl (calcolade tant che numar di rescj animâi par chilometri) e je passade di 10 a cuasi 160 cu lis stradis asfaltadis.
In plui di chest, a son stâts rilevâts ancje i rescj des speciis che no si à rivât adore di determinâ: ancje chescj a son cressûts di 15 voltis inte strade a pidival e di plui di 7 voltis in chê altre.
◆ Ce che la asfaltadure e à provocât al è evident: un aument fuart dai animâi che a son stâts cjapâts sot. La mortalitât e à interessât ancje speciis cuntune fuarte atenzion e capacitât di reazion al pericul improvîs, par esempli une machine che si sta vicinant, tant che la lisierte e il sborf.
Come altre prove dal impat che al è stât verificât, al è il fat che nome intal secont periodi di indagjin a son stadis cjatadis ancje carognis di un mamifar, il musan Sorex sp. e che dut câs in dutis dôs lis stradis si à rivât a cjatâ fin a 5 cadavars di salamandrie par 100 metris.
◆ Dut chest al è stât causât de incressite di passe 18 voltis dal numar di veicui che a passin e che, cun di plui, lu fasin a velocitât un grum plui alte su lis stradis asfaltadis. L’asfalt, po dopo, al stimole e al favorìs il passaç des bicicletis che a àn une part, ancje se plui piçule di chê dai mieçs a motôr, intai invistiments. Se, ancjemò, si considere che lis personis no son educadis a vuidâ in mût di evitâ il plui pussibil i invistiments stradâi, si capissin i risultâts ripuartâts parsore.
◆ Il studi al à indicât in maniere clare che la asfaltadure ancje di piçulis stradis di mont cuntun bas numar di veicui che a passin e pues vê un impat diret fuart, massime su cualchi specie di anfibis.
◆ Intes ultimis desenis di agns, inte mont furlane a son stadis fatis tantis stradis, e diviersis – seti di gnove realizazion che bielzà fatis – a son stadis asfaltadis. Cheste tindince e je ancjemò in vore ancje in gracie de disponibilitât di fonts publics.
◆ Tignint cont di ce che al è saltât fûr dal studi, des tindincis in at e dal fat che lis stradis (ancje se no son asfaltadis), massime se costruidis in ambients dulà che prime no jerin viis di comunicazion, a aumentin la framentazion dai habitats e a diminuissin il grât di conession fra i ambients, si calcole che al sedi oportun ce che al è ripuartât culì sot.
• Al è necessari che la costruzion di stradis e la lôr asfaltadure a sedin, inte fase preliminâr, valutadis cun grande atenzion, e inte fase di progjet a sedin tignûts in considerazion ducj i aspiets che a puedin sbassâ l’impat cui animâi, parcè che ancje animâi di piçulis dimensions tant che i anfibis a puedin provocâ incidents stradâi cun consecuencis pal om.
• La gnove viabilitât e à di jessi fate nome cuant che e je une necessitât vere e comprovade. Chest par evitâ di realizâ oparis che dal pont di viste economic no son convenientis, e di chel idrogjeologjic a puedin rapresentâ un pericul, no jessint cun di plui compatibilis cu la conservazion de biodiversitât.
• Al stât atuâl, par ridusi l’impat si à di individuâ lis stradis dulà regolâ o improibî la viabilitât dal dut o in cierts periodis dal an, par esempli in chel riprodutîf, cuant che ancje un numar une vore bas di veicui al pues jessi deleteri.
• I permès par passâ su lis stradis a varessin di jessi dâts valutant cun plui atenzion e nome in câs di vere necessitât; duncje la asfaltadure des stradis e varès di jessi limitade parcè che, sedi dal pont di viste legjislatîf che di chel pratic, al è une vore plui dificil improibî o limitâ il transit cun mieçs a motôr in presince di une strade asfaltade (a pet di une blancje).
• A van individuadis areis dulà improibî la realizazion di stradis.
• Si à di informâ la opinion publiche (te Patrie lu stin fasint propit cun chest articul) sul probleme, e cui che al vuide al va sensibilizât tal tignî un compuartament coret che al escludi la pussibilitât di sielte di copâ un animâl che si cjate su la strade (sielte che no je cussì rare come che si pues pensâ).
Par fâ dut ce che al larès fat, però, al vûl che ducj, dai legjislatôrs ai ents publics, ae coletivitât a fasin la lôr part e chest al è une vore dificil intun mont che, a dispiet di ducj i proclamis e des buinis intenzions che a vegnin palesâts di un continui, al sta lant inte direzion contrarie. ❚
