Suns Europe 2022, Udin e Gurize capitâls des lenghis minorizadis

La Europe e clame e al è un Friûl che al rispuint ancjemò une volte in maniere europeane. Ai 25 e ai 26 di Novembar stâts si à sierade la edizion dal 2022 di Suns Europe, il festival european des arts in lenghe minorizade inmaneât de cooperative di Informazion Furlane, la societât editore di Radio Onde Furlane. La fin de manifestazion e je stade coerente cu la ande che le veve segnade za intant dai prins events fats vie pal Istât. La promozion dal dirit ae lenghe e ae diversitât fate indenant de rassegne no je lade daûr dome de cualitât e de varietât des propuestis di scoltâ, di cjalâ e di lei e des colaborazions in vore cun cetantis entitâts e organizazions che a son espression di diviersis comunitâts di lenghe minorizade dal continent, ma si à palesade ancje intune ocasion di resonament une vore concret e di sostance in cont di une cuistion che e tocje in maniere fuarte e direte il Friûl in gjenerâl e soredut chel Gurizan: la assegnazion a Nova Gorica e a Gurize dal titul di Capitâl Europeane de Culture pal 2025. In chê prospetive, vinars ai 25, al è stât inmaneât inte mediateche “Ugo Casiraghi” dal cjâf lûc dal Friûl di Jevât un confront in cont di ce che si varà di fâ par che il rûl ricognossût aes dôs citâts di ca e di là dal clap al vegni esprimût inte maniere miôr, tra culture, cussience civiche e disvilup sociâl e economic.
◆ Cun di fat, se la atribuzion dal titul di Capitâl Europeane de Culture e je une ocasion impuartantone par dutis chês citâts che ur ven dât chel ricognossiment, chê assegnazion e à ancjemò plui impuartance indulà che si fevelin plui lenghis, stant che e pues deventâ ancje une oportunitât par mostrâ chê pluralitât linguistiche e culturâl e par promovi chês lenghis stessis, massime se si cjatin intune cundizion di minorizazion. Si pues rivâ a chei obietîfs midiant di une azion gjenerâl di comunicazion là che a vegnin dopradis dutis chês lenghis e cun progjets e intervents culturâi che a tegnin cont di chê pluralitât e di chê complessitât. A son emblematichis in chest sens lis esperiencis, tal 2016 e tal 2018, de citât basche di Donostia-San Sebastián, tal Stât spagnûl, e di chê frisone di Ljouwert-Leeuwarden, intal Ream dai Paîs Bas. Lis buinis pratichis metudis in vore in chês ocasions a son stadis presentadis a Gurize di Paul Bilbao Sarria, che al à contât di cemût che la rêt di associazions Kontseilua e veve metût adun il Protocol pe difese dai dirits linguistics (firmât in chê volte ancje di Onde Furlane, Patrie dal Friûl e CLAAP e dal setemanâl de minorance slovene Novi Matajur), e di Ernst Bruinsma, che al à dât cont de maniere che la capitâl de Frisie e à “tirât fûr” la sô lenghe proprie e la sô identitât cun spirt european e internazionâl, vuadagnant ancje il titul UNESCO pal 2019 di Citât de Leterature. Al à puartât il so contribût ancje il cornic Davyth Hicks, segretari gjenerâl de ELEN (Rêt Europeane pe Avualiance Linguistiche), fevelant di Europe, lenghis e dirits.
◆ Dal incuintri – là che a jerin ancje il president de ARLeF, Eros Cisilino, l’assessôr pes politichis linguistichis dal Comun di Gurize, Maurizio Negro, il president regjonâl de SSO, Walter Bandelj, e chel provinciâl de SKGZ, Marino Marsicˇ, in rapresentance de comunitât slovene, e il president de Academie Europeiste, Claudio Cressati – al è rivât un messaç fuart e clâr: Nova Gorica-Gurize 2025 e sarà pardabon Capitâl Europeane de Culture se e darà spazi e visibilitât ancje ae lenghe furlane e ae sô produzion culturâl.
◆ Si viodarà ce che al nas. Par intant inte serade dai 26 di Novembar, cul conciert finâl di Suns Europe li dal “teatron”, e je stade la citât di Udin a fâ, almancul par cualchi ore, la capitâl di un Friûl furlan e duncje european. ❚