Il so non al è “Errare Humanum est. Sbagliando si impara” e al è un progjet che al vûl judâ gjenitôrs e fîs a passâ de inciertece e de pôre di falâ ae cussience in cont de pussibilitât e de dibisugne di fâ erôrs par cressi e par imparâ a falâ di mancul. La iniziative e je stade metude adun de APS KLARIS, cu la poie de Regjon autonome Friûl-VJ, midiant de Aree Welfare de Asugi, e cul patrocini dai Comuns di Cjarlins, Martignà, Merêt di Tombe, Murùs, Reane dal Roiâl e Tavagnà e e je in vore de Vierte stade, cuant che a jerin stâts fats i prins laboratoris pai fruts. Chês altris ativitâts a son stadis inviadis cul mês di Novembar, cu lis conferencis a Merêt di Tombe e a Remugnan e cu la prime trasmission de serie in programazion su lis frecuencis di Radio Onde Furlane (90.0 Mhz, 90.2 Mhz e 105.6 Mhz) e in streaming (www.radioondefurlane.eu).
◆ Altris pontadis dal program a laran in onde lunis ai 12 di Dicembar aes 8.30, martars ai 13 aes 13.30 e miercus ai 14 aes 14, lunis ai 9 di Zenâr aes 8.30, martars ai 10 aes 13.30 e miercus ai 11 aes 14, e lunis ai 23 di Zenâr aes 8.30, martars ai 24 aes 13.30 e miercus ai 25 aes 14. Pui indenant a saran ancje a disposizion in podcast.
◆ Vie pal mês di Zenâr “Errare Humanum est. Sbagliando si impara” al previôt ancje un incuintri public a Murùs (miercus ai 18 aes 18.30 in Municipi), la conference che si fasarà inte Biblioteche civiche di Tavagnà (miercus ai 25 aes 17.30 a Felet) e i laboratoris pai fantacins e pai fantats che si davuelzaran a Merêt di Tombe e a Cjarlins.
◆ Altris informazions in cont de iniziative si cjatin in rêt, li des direzions klarisweb.wordpress.com e www.facebook.com/AssociazioneKlaris. ❚
I erôrs che a judin a cressi
Marco Stolfo