Melonie: une gnove regjon no autonome

Atents Fradis dal Friûl, stait a sintî un discors che al fâs stupî

E je nassude une gnove regjon no autonome: la Melonie. E je tant gnove che no si sa ancjemò dulà che al va l’acent, cui dîs Melònie e cui dîs Melonìe. I linguiscj a son daûr a tirâsi pai dincj, la Filologjiche e à fat une comission, il Messagjero Melonian al dîs su la -ò-, Radio Melonìe e dîs su la -i-. Doi lustrissims e innomenâts luminârs de universitât di Udin, pronts come pipinots cu la suste (jack-in-the-box te lôr lenghe), subit a dî che, scumade la identitât furlane, o sin fûr di chel tramai che nus ingrisignive e a van indevant a mastiâ fumate cun plui gust di prime.
◆ Un pindul al à proponût il non Melonie Vignesie Julie, ma al è masse lunc e nol è nancje biel. E, po, secont i esperts di marketing e di publicitât, nol è adat par promovi lis “ecelencis dal teritori”. Intun gjornâl umoristic un umorist al à fat il slogan “Jo o soi Melonie Vignesie Julie”. Un poete satiric al à fat une satire su Julie che no si sa se e je la cugnade, la brût, la surastre, la gnece, la madone, la concubine, la massarie, la comari di cui. Toni Cabernet al va ator cjantant “Melonie in gondoleta”, tant par menâ il rost a Luca Zaia; il comic Sdrondenile, grant creatîf, al puarte in teatri la pièce intitulade “El melon magna el leon”, ma Zaia lu à denunziât; i triestins si fasin braurôs che i melons lôr ju àn di dopo incà e che Vignesie le àn simpri vude in asse; a Surisins di Sore a disin che a Surisins di Sot a samenin melons, ma a nassin cjastrons. Insome dut un ridi e un cjoli pal cûl, cussì o vin Melonie e vonde; un non sclet, rût, melonissim, melonon, adat ancje pal advertising.

La beçolade
Intant al è di dî che in Melonie bêçs no mancjin. Ogni marimoment tu leis di slacs di euros che a vadin a comuns, ents e puarts, anzit ‘puart’, chel di Triest. Ploie di sclincars cun siglis dal osti (PNRR, Por Fesr) e simpri cun chê di fâ gnovis struturis, ancje cun nons che no si capìs ce che al vûl dî. Par esempli (Il Friuli dai 5 di Novembar stât) la assessore Barbara Zilli e fevele di “servizis di alte complessitât necessaris ae competizion al livel globâl”: chest pai Comuns su la linie Pordenon – Gurize. 16 milions dal Por Fesr par chestis areis urbanis e, nus informe simpri la Zilli “i teritoris a àn za definît i progjets declinantju tai temis clâf, vignarès a stâi valorizazion ambientâl, culturâl, digjitalizazion e inovazion sociâl”. Sacrabolt.
◆ E cussì o savìn che Pordenon al cjale a une campus city, une citât sostignibile e tecnologjiche [une contradizion, ma ce impuartial?] pes gnovis gjenerazions cuntune rigjenerazion urbane e rifunzionalizazion di un imobil esistent di trasformâ in sede universitarie [une altre?] oltri che percors ciclopedonâi…
◆ Gurize e à chê di realizâ un Epicenter come spazi multifunzionâl pe agregazion sociâl e come lûc par concierts e events, lûc custode de memorie dal teritori [peraule magjiche come abracadabra] e salot transfrontalîr… Triest si contente di ricualificâ e rilançâ il cuartîr di Servola.
◆ E Udin? Dopo Triest e je la citât plui grande de Melonie e e à in progjet une Cjase de culture furlane e de mont, un gnûf pôl museâl par promovi e valorizâ la identitât furlane in graciis dal alestiment di une esposizion multimediâl in grât di fevelâ soredut aes gnovis gjenerazions… Dut just; cumò che i furlans no esistin plui bisugne memoreâju.
◆ E cussì si podarès lâ indevant a sclofâ finanziaments inalgò e inaltrò, venci ca e venci sù.
Ma daûr e je une filosofie pal nestri avignî. Cemût concludie la assessore? E conclût che si à di “proseguî par costruî ulteriôrs iniziativis vueltis ae cressite e al svilup de nestre tiere”.

Cressite e svilup: i trê remagjos
Melonie si cjate sul planet Tiere. I melonians no si son inacuarts, ma e je cussì. Il planet al à cualchi limit di diametri, di circonference, di superficie, di salams picjâts. No à limits la tristerie umane, chê no.
Viodìn di fâle curte: dut ce che o vin in dì di vuê lu vin par vie dal petroli. Prime di lui al jere il cjarbon e dopo di lui o vin zontât il gas. Cjalait ce che o vês intor: scarpis, peçotarie, blancjarie: dut fat cul petroli. Ancje la maiute di coton cun la scrite Alpin jo mame: cun ce crodêso che lu coltivin il coton? Cui concims fats cul gas, fradi dal petroli. E lu cjapin sù e lu lavorin e lu traspuartin cul petroli. Dut al è fat a machine e lis machins si passin di petroli. Ancje di eletric, se al è par chel, ma l’eletric si fâs cul cjarbon e cul gas.
◆ In chês foranatis sot tiere chescj trê remagjos, petroli, cjarbon e gas, a son simpri mancul. E covente simpri plui energjie par tirâju fûr. I lôr presits a son simpri plui «volatii», disìn pûr svoladis. Brut segnâl, cuant che domande e ufierte a son nome sui libris di economie e la speculazion e gafe, e rafe, e trufe, e sgrife, e sglonfe la çacule dai bêçs e il Stât al è un biât cul cjapiel in man.
Cumò che o vin une biele butade di bêçs, ma e sarà la ultime butade, o varessin di doprâju par preparâsi e vê mancul robis, a sparagnâ, a fâ di mancul dal masse par che nus resti il necessari, altri che fotis! Isal tant dificil che us jentri te melonarie?
◆ Si varà di mangjâ ogni dì, ma i telefonins no fasin nancje il cafè di crostis.
I concims, i tratôrs, lis fabrichis di merendinis, i camions che a puartin merendinis e patatinis e bibitis di aghe sporcje a mangjin petroli. Cence di lui in dì di vuê nol va nuie jù pal glutidôr.
◆ Doprâ i trê remagjos al vûl dî mandâ fûr di ogni samenât i gas che a fasin cambiâ il clime. Ancje in Melonie; ancje se i melonians no bacilin daûr di temperaduris, umiditât, ploie, zilugne, sut… I plui inteligjents a crodin che la tecniche e la sience (Triest citât de sience) a comedaran dut. Nome che la tecniche e coste. Fâ un poç e tirâ sù la aghe al coste, di euros e di joules, e se la aghe e je simpri plui insot, i sclincars e i chilowats a parin sù une biele sissule. E se nol plûf e nol nevee, la aghe no tu le cjatis nancje se tu vâs insot fin in Gnove Zelande.

Cjalait il grafic
Dait un cuc al grafic numar 1. Ducj o varês sintût fevelâ e fevelonâ di transizion energjetiche. Po ben, te storie no je mai stade nissune transizion energjetiche; dutis lis energjiis gnovis si son simpri intassadis une parsore chê altre. Ancje cumò, ancje in dì di vuê, sacrabolt! Nucleâr, eolic, solâr… a son lâts a ingrumâsi sore dai trê remagjos. Energjie solâr: benon, magari ancje. Però se il solâr nol permet di sparagnâ cjarbon o gas, alore il tacon al è piês de buse. Ma cjalait miei, mo, il grafic: lis energjiis “alternativis”, chês che a sporcjin di mancul, chês che a saressin, e a son, miei dai trê remagjos, a cuchin là sù insom, tal cjantonut, une mignagnule di lôr che no sei nancje rivât a meti un numar par indicâlis. Il tant innomenât nucleâr al prodûs nome un 4,2% de energjie mondiâl. E lis “rinovabilis”? Nol è tant di ce sgorneâ: l’idroeletric 6,5%, l’eolic 2,3%, il solâr 1,3%, la biomasse 6,4% (tant len e cjarbon di len), cualchi altre grisure 1%.
◆ Dut il rest, il grues, il penç, al è pai trê remagjos, chei che a fasin tant diossit di carboni (anidride carboniche par talian).
Vino di sburtâ sul nucleâr? E cui tirial fûr lis palanchis cun dut ce che e coste une centrâl? E se par fâ une centrâl a coventin 10-12 agns intun paîs normâl, in Italie a coventin almancul il dopli: intant al mûr il mus cun dut il peçotâr.
L’idroeletric? Ormai o vin striçât fûr des monts dut ce che si podeve. Anzit, se nol nevee e se nol plûf la energjie idrauliche e va sù pai stecs. E se no je avonde aghe par disfredâ lis centrâls, nucleârs o a cjarbon, si varà mancul di chê energjie.

Scurtâ la tresêf!
Ma fossino ducj li i fastidis! A disin che se no volìn che la temperadure medie e aumenti di plui di 2°C bisugne ridusi daurman, anzit puartâ a nuie, il consum di cjarbon, petroli e gas prime dal 2050. Ma cjalait il grafic! Cemût, cun ce, cun cuâl miracul il solâr e l’eolic rivarano a cjapâi la volte ai trê remagjos? Nol è timp e no varìn avonde metai: pensait nome al ram che al è dentri di une automobil eletriche.
E alore ce fasìno? E alore, fantats, e je nome une soluzion: scurtâ la tresêf!
Par che le capissin ancje chei di Udin metìnle cussì: avonde massepassudagjine! Mancul bilits, bielisiis, strafaniçs e straçariis. Mancul mangjative di supermarket e plui mangjative furlane.
◆ La liste di robis di podê fâ cence patî, che massime la politiche e po fâ, e sarès une tresemane lungje, ma cui beçonons che a son cumò no coventaressin tropis a imbastî un progjet pe “resilience”: il PNRR no isal pe resilience?
◆ Nome che di chê vorele nissun nol vûl sintî: la pluritât de int, i sorestants, i politics. I bêçs si spindiju, la gran part, par fâ e doprâ peton, açâr, plastiche, vignarès a stâi cjarbon, petroli, gas. Tant par dî une: a Triest cun 48,8 milions a fasin la strade dai ûfs. E ce fritaiadis!

Cuistion di nazion
Ce ise Melonie? Une regjon no autonome cuntun puart. Avonde cussì? No savarès a dîus. Par sclarî cheste grande cuistion teoriche no nus reste che lâ a scrusignâ tal Mein Kampf dal grant partît melonian. Si cjate alc a pagj. 192 di cheste grande opare di filosofie politiche, di scugnî vêle tal tamar dai libris (Giorgia Meloni, Io sono Giorgia, Rizzoli, 2021), dulà che si dan lis definizions di Paîs (cu la maiuscule), di nazion (cu la minuscule) e di patrie (cu la minuscule).
◆ Il Paîs al sarès un puest dulà che je int a stâ (un insediament uman), dulà che si vîf insiemi e vonde, un lûc fisic, materiâl, indistint.
La nazion e je un trop di int cussiente de sô particolaritât e autonomie storiche e culturâl. Un lûc mentâl, che si aparten par condivision di culture, storie e tradizions.
◆ La patrie e je un teritori dulà che al è a stâ un popul che ognun dai siei components al sint di apartignî par nassite, lenghe, culture, storie e tradizions; un puest che al cjape dentri il cûr, chê volontât di condividi lis lidrîs e partecipâ al destin di une comunitât che e je la essence stesse dal principi di apartignince.
◆ Bon, insome, al pâr di capî che il Paîs a son i mûrs de cjase, la nazion e je ce che si met dentri.
Secont chestis definizions la Italie no je di sigûr une nazion e nancje une patrie, viodût che la diference tra lis dôs e je sutile. Lenghe, storie e tradizions di un sicilian e di un valdostan, di un toscan e di un lucan a son no si po plui diferentis.
◆ Dut câs, cun chestis definizions cumò o savìn che il Friûl al jere une nazion e ancje une patrie. Ma Melonie, magari cussì no, no je une nazion, no je une patrie, al è un Paîs, une regjon no autonome come che a son milante, cence schene, cence lenghe, cence lidrîs, cence tradizions, un trop di int a passon tai centris comerciâi, come pioris cence roc e come cjavris cence bec.
No us jentrial nuie te melonarie Fradis dal Friûl? ❚