La Associazion pe Tierce Ricostruzion e propon un “manifest” pal avignì che si fonde su la assunzion che un gnûf pat politic nol à di restaurâ lis vecjis formulis, ma di ricomponi la regjon intune gnove aleance di teritoris
I intervents sul Friuli publicâts su la stampe intes setemanis passadis, ancje se intes diversitâts di fonts, a àn cualchi pont in comun: a. e esist une cuistion furlane; b. il futûr di dute la regjon al è peât insot al risultât positîf di cheste cuistion; c. la soluzion de cuistion no pues jessi intal ordin des robis che le àn produsude. Dit chest, si à di ricognossi che il “ce fâ” e il “cemût fâ” a son, ancjemò, une vore insuficients. O calcolìn necessari, alore, proponi un “manifest” che al lanci un progjet di Friûl, intune regjon unide, su la base di chestis trê tesis di fonts: a. la Regjon, nassude sessante agns indaûr e je, vuê, se no cause, almancul complice de situazion furlane atuâl; b. la “complicitât” e je intune articolazion dal podê politic regjonâl superade in sens storic; c. par articolâ il podê politic sul teritori regjonâl, al covente tornât a scrivi un pat politic bon di tignî insiemi un sisteme regjonâl deventât, intal timp, tant plui complès. Chel pat primigjeni al veve previodût, par altri, la capitâl a Triest, il president de regjon furlan e la costituzion de Provincie di Pordenon ma, dopo diviers presidents triestins e la sopression des Provinciis, chel pat si rêç cumò dome su la capitâl a Triest e, duncje, nol funzione plui. No je une cuistion banâl di distribuzion di uficis publics. Une istituzion di guvier teritoriâl, cuant che e devente une concentrazion ipertrofiche di podê politic, e finìs par autoalimentâsi, trascurant tocs impuartants dai teritoris guviernâts (un esempli e je la resinte ripartizion disecuilibrade des risorsis dal PNRR). Il “manifest” che o proponìn si fonde su la assunzion che un gnûf pat politic nol à di restaurâ lis vecjis cundizions ma di ricomponi la regjon intune gnove aleance di teritoris e relativis vocazions, buine di frontâ lis gnovis turbolencis globâls che si prospetin dopo dai events climatics, demografics e gjeopolitics.
◆ Chest principi al à implicazions impuartantis in tiermins di gnove articolazion dal podê politic. Il sisteme logjistic portuâl di Triest – che dut câs al à cjapât grande impuartance economiche funzionâl a nivel internazionâl e che al scuen ancjemò di plui potenziâsi ancje midiant de integrazion cul sisteme portuâl di Cjaudistrie e cun altris potenzialitâts dal Nord Adriatic – nol pues rapresentâ ancje chês altris – e forsit plui vitâls – risorsis de regjon, e duncje davuelzi il rûl di centri di dut il sisteme regjonâl. No tant parcè che i grancj flus intercontinentâi di marcjanziis a podaran ridusisi dopo des instabilitâts gjeopolitichis cognossudis, ma ancje parcè che, inte epoche de transizion ecologjiche energjetiche e de resilience, altris flus (di aghe, energjie, informazion e cognossince, biomasse, biodiversitât) a tornin tal centri dal sisteme regjonâl e a cjapin sù impuartance decisive pe vite des sôs comunitâts plui numerosis e, duncje, par dute la regjon. Chei flus a son la base vitâl dal sisteme regjonâl parcè che a garantissin aghe, mangjative sane, teren, salût, energjie rinovabile, biomasse, biodiversitât, che a son bens essenziâi e primaris pe vite des personis ma ancje des economiis green e circolârs. Chest al impliche, par altri, di meti i flums, i varis ecosistemis e ancje i teritoris di mont tal centri e no ai margjins di une gnove vision de regjon. Une vision che e sedi cun di plui buine di tornâ a tirâ dongje chei zovins che se a son lâts vie intai ultins agns ancje parcè che no ur vin proponût un model di regjon che e favorìs chi la realizazion dai lôr progjets.
◆ Mantignî a Triest une “ment uniche” de Regjon, onicomprensive, cence fal disecuilibrade e, in fin dai conts, ipertrofiche, cemût che al è vuê, al va, duncje, a dam di dute la regjon. Chê ment e va tornade a articolâ intune “ment plurâl”, intune articolazion decisionâl e aministrative buine di valorizâ la composizion complesse dai teritoris de regjon e, tal stes timp, di moltiplicâ lis capacitâts di guvier.
◆ Nissun dubi che la mission e che lis competencis de economie dal mâr a sedin assegnadis ad in plen a Triest. Ma al è just ancje che la costruzion di une solide resilience economiche, ambientâl e sociâl (dulà che a sedin centrâi il guvier de tiere e des filieris di manifaturis, des aghis internis e dai ecosistemis, de salût e de mangjative, de culture e dal plurilinguisim), ur tocji ai tancj teritoris dal Friûl (di Gurize a Sacîl, di Tumieç a Tisane, di Çarvignan a Manià, di Tarvis a Lignan) che, no dome a cognossin in maniere direte e in concret chescj problemis, ma, cemût che za sperimentât cu la ricostruzion dal dopo taramot, a puedin ancje esercitâ miôr lis relativis strategjiis e propuestis inovativis.
◆ Cun di plui, al è ancjetant just che a cjatin sede intai varis centris de regjon lis politichis transfrontalieris, lis relazions cu la Europe, il guvier dai traspuarts e de industrie, viodudis ancje lis relazions storichis (de “Regjon Puint” al trafic in esportazion di manifaturis) cun Paîs tant che Austrie, Baviere e Slovenie. La costruzion di relazions coordenadis e cooperativis cu lis regjons e cui Paîs dongje (in primis cun Slovenie e Carinzie) e impliche ancje une gjeografie che e valorizi l’as fluviâl transfrontalîr dal Lusinç e che e cjati il so fulcri ideâl inte citât simbul di Gurize-Nova Goriza.
◆ Infin, intal ambit di une devoluzion drastiche di competencis regjonâls, che in bande dal Consei Regjonâl al vegni istituît, cun sede in Friûl (e no par fuarce intes citâts principâls), ancje un Consei des Autonomiis e des Comunitâts linguistichis, dotât di podês specifics e dulà che e vegni ancje promovude e garantide une juste presince di zovinis.
◆ No, duncje, ae restaurazion des cuatri Provinciis che o vin cognossût, nassudis za vecjis tal passât parcè che disecuilibradis a nivel dimensionâl, basadis su assets centri-perifarie passâts di un pont di viste storic, suntune vision dal guvier che e opere su jurisdizions sieradis e suntune trascurance sostanziâl des diversitâts teritoriâls e de mont in particolâr (chê pordenonese e je tra chês che, intal arc alpin, intai ultins cincuante agns, e à pierdût plui abitants). No ai consecuents egjemonisims di centris asfitics di podê locâl che, in graciis di chês stessis Provinciis, a volaressin tornâ a alçâ il cjâf. Lis dôs citât di Udin e Pordenon – cussientis che une epoche di gravitazions urbane industriâl e va bande il tramont – che si dein obietîfs di rigjenerazion teritoriâl e di ricostruzion di gnovis rêts di “infrastruturis blu e verdis” intune plui largje vision ecopolitane dal teritori.
◆ In conclusion, cun chest Manifest la nestre Associazion pe Tierce Ricostruzion e propon che la prossime legjislature regjonâl dal F-VJ – che e saltarà fûr des elezions dai 2 e 3 di Avrîl dal 2023 – e cjapi sù il compit di ridefinî dut il riordin politic istituzionâl e aministratîf de Regjon basât suntun gnûf pat politic, organizant ancje percors di consultazion e partecipazion che a cjapin l’insiemi de societât e dai teritoris regjonâi. ❚
