La regjistrazion dal eco plui lunc dal mont intal so gnûf album: TEMPO
«Sunâ ce che no ai mai sunât e che mai plui o sunarai, cu la ombrene dal gno passât, la proiezion dal gno avignî, intun presint che al svole te oscuritât come un pinel che al dissegne cuadris di suns mai scoltâts prin.» Cusì al scrîf Paolo Forte, fevelant de sô gnove aventure che e je dentri tal album “Tempo”.
◆ Il resint album dal armonicist furlan che za o cognossin ben, al va di là ogni limit acustic, ae ricercje dal sun e dai soi confins. L’artist al sfide se stes e il timp intun puest dulà che une note emetude cun fuarce e reste par aiar par cuasi un minût.
“Tempo”, jessût ai 16 di Fevrâr, al è di fat regjistrât intune incredibile cistierne cun plui di 30mil metris cubis, il lûc cul rivoc plui lunc dal mont.
◆ Il serbatori a prove di bombe, al è stât costruît tai Highlands de Scozie tra il 1938 e il 1941 par tignî dentri 32 milions di litris di carburant.
Une aventure plene di sfidis, ai limits dal pussibil par cualsisei artist. Ma no par lui. Il musicist al è di simpri invoiât a sunâ in lûcs abandonâts. Ricuardìnsi dome dal so ultin album “Al Buio” e dai siei videos incantesemâts. Cun intor une tute protetive, stivâi e lûs frontâl, Paolo al inverât il so sium, cun cheste gnove aventure tacade tal Setembar dal 2022.
◆ Il viaç di 2500 chilometris al à puartât Paolo Forte a vierzi la puarte blindade dal dipuesit di carburant di Inchindown a Invergordon, Easter Ross, in Scozie. Aculì al à percorût un tunel lunc 250 metris dentri de mont par rivâ ae viertidure di un condot di 45 centimetris di diametri. E cussì al tache chest esperiment. Paolo si è molât jù pal tubi par rivâ intune enorme cistierne di petroli de seconde vuere mondiâl. Cun se al veve la sô compagne: la armoniche. Dome che par fâle passâ e puartâle cun se, al à scugnût smontâle in doi tocs.
◆ «Mi distiri dentri dal tubi e mi strissini vie fin tal grant scûr. Frêt, stomeôs, stonf di vueli pesant dapardut.» E infin al rive tal serbatori: imens, lunc 240 metris, alt 14 e larc 9.
A pene fûr de cistierne, Paolo al tignive il diari de sô aventure, scrivint su la sô pagjine facebook, publicant fotos e videos. Il musicist al spieghe che il paviment al jere tant plen di vueli, che no dome lui al jere «insacât intune tute di polipropilen e stivâi» ma ancje i struments come i cavalets e i supuarts cui microfons a àn scugnût jessi imbalâts cuntun materiâl plastic a prove di vueli. Se al fos colât alc sul paviment, nol starès stât plui recuperabil. In plui, dopo 5-6 oris intune cistierne intierade par cuatri dîs, sigûr nol jere cjalt. Paolo al bateve i dincj, ma cundut achel, al è lât indenant a sunâ.
◆ «Mi soi sintût come Dante te Divine Comedie: a lâ jù tal tubi infernâl, scûr, frêt e cuviert di vueli. Ma cuant che la armoniche e à tacât a sunâ, o ai sintût vierzisi la puarte dal paradîs.»
In chest lûc sugjestîf, Paolo al à improvisât: al covente un bon minût par che al torni il cidinôr te cistierne, dope che si fevele o che si sune. Par chest, l’artist al à scugnût tignî cont dal lunc eco par evitâ di produsi un intric di suns. «O ai pensât a ce che o vevi a pene sunât, o ai scoltât il sun a mieç aiar e o ai sunât l’acuardi dopo, prevignint il sun. Al jere come se il passât, il presint e l’avignî si stessin fondint un cun chel altri.»
◆ Cussì a son nassûts vot tocs, di scoltâ dut intun tira di flât: Alla Luna, Freddo, Cosmo, La morte del pettirosso, Caos, Pliè, Danza e Canto al Tempo a son respîrs, notis, rivocs di un mont che nol esist te realtât, ma che al è dentri di nô.
“Tempo” al è un album cence filtris: Paolo nol à zontât nissun efiet aes regjistrazions, duncje si pues scoltâ la acustiche e il riverberi de cistierne cence nissun rangjament. «Un rivoc lunc un minût. Eterni, trement, fantastic. Il lûc stes al à direzude la mê esecuzion. La armoniche e je stade dome la lescje pal strument plui grant che jo o vedi mai sunât.»
◆ L’album, che te cuviertine al à une des imagjins di cheste aventure, al è stât fat in cjase. Par chest, si cjatilu dome in cualchi edicule. Fra pôc e jessarà ancje la version digjitâl, ma par cualsisei notizie, lait daur de pagjine facebook e de pagjine web di Paolo www.paolofisa.it. Aculì o cjatais dutis lis datis dai siei concierts, dulà che dal sigûr nus incantesemarà cu la sô musiche che e contarà di chest viaç incredibil. ❚
