Lenghis di minorance, la UE e je masse pôc “europeane”

La Unione Europeane (UE) e fâs masse pôc a pro des lenghis minorizadis e dai dirits linguistics. Al è ce che al salte fûr une vore a clâr dal studi prontât par cure di Vicent Climent-Ferrando de Universitât Pompeu Fabra, che al è stât presentât ai 15 di Març stâts a Strasburc tal Parlament European. La ricercje e je stade promovude de bande dal Intergrup pes minorancis tradizionâls, pes comunitâts nazionâls e pes lenghis, là che si dan dongje eurodeputâts di diviers grups politics che a son espression di minorancis e nazions cence stât e che a palesin un interès specific par chestis cuistions che a tocjin in chel istès la dimension dal pluralisim linguistic e culturâl e chês dai dirits di fonde e de citadinance europeane.
◆ In particolâr, la iniziative e je stade sburtade di vot components dai grups dal PE dai Verts e de Aleance Libare Europeane (ALE, il partît politic a nivel european espression des fuarcis politichis regjonalistis e nazionalitariis progressistis, autonomistis, federalistis e indipendentistis), tant che Tatjana Zdanoka de Union Russe de Letonie, l’ecologjist Rasmus Andresen, che al fâs part de minorance danese in Gjermanie, François Alfonsi di Femu a Corsica, e Diana Riba i Giner di Esquerra Republicana de Catalunya, e di Renew Europe (il partît politic liberâl a nivel european), tant che i catalans Carles Puigdemont, Antoni Comin e Carla Ponsatì e Izaskun Bilbao Barandica dal Partît Nazionalist Basc.
◆ L’intindiment al jere chel di viodi cetant che al è stât fat de UE a pro de lenghis di minorance dilunc vie dai ultins dîs agns, dopo che il PE al veve fate buine, tal 2013, une Risoluzion in cont des lenghis in pericul di estinzion e de diversitât linguistiche in Europe. Magari cussì no, la valutazion de azion de UE e je negative, par vie che che no je stade cjapade sù nissune azion concrete de bande de Comission (CE) e dal Consei. Di une bande, la CE no à dât acet ae iniziative dai citadins europeans Minority SafePack, che cun passe un milion di firmis certificadis e faseve indenant une propueste organiche di normis gnovis a pro di lenghis e dirits. Di chê altre, lis lenghis minorizadis a son stadis esclududis di une schirie di azions tai cjamps de istruzion, de comunicazion istituzionâl, des tecnologjiis e des traduzions, che a àn tocjât dome lis lenghis dominantis a nivel statâl intai Stâts membris e altris lenghis in chês stessis cundizions tant che il rus, il turc, il gjaponês, il cinês, il norvegjês e l’islandês.
◆ Dongje de valutazion di ce che nol è stât fat, intal studi a vegnin fatis indenant racomandazions operativis: de promozion e dal finanziament di progjets europeans metûts in vore di istituzions e organizazions che a son espression des comunitâts in cundizion di minorance, e de inclusion des lenghis minorizadis intai programs Horizon, Erasmus + e Interreg, fintremai al recupar des propuestis normativis presentadis intal Minority SafePack e di chês in cont de diversitât linguistiche che a son saltadis fûr inte suaze de Conference sul avignî de Europe.
◆ La cuistion di fonde e je simpri chê: la UE e je masse pôc “Union” e “Europeane” e masse dipendente dai Stâts nazionâi e dal cult de nazion «una d’arme, di lingua, d’altare…» (par dîle cu lis peraulis di une poesie di Alessandro Manzoni) che ju ispire. Chest fat si à tornât a palesâ, juste tal mês di Març di chest an, inte sentence dal Tribunâl aministratîf di Bastia cuintri des normis dal regolament de Assemblee de Corsiche che a permetin che inte aule si dopri ancje il cors dongje dal francês, parcè che a son calcoladis contrariis dal articul 2 de Costituzion dal Stât francês, che al declare che la uniche lenghe de Republiche e je chê francese. ❚