Un berli di proteste fat cjançon dai Zuan Strumîr
e i Çamberlans cuintri de alienazion dal Friûl e dal furlan
Il progjet “Punksolini”, dai Punks tal Friûl si è sierât ai 2 di Novembar, propit te zornade de ricorence dal assassini di Pasolini, cuntun album che al à dentri 20 tocs di chest coletîf rivoluzionari.
◆ Lait a lei di plui tal nestri toc: https://www.lapatriedalfriul.org/i-punks-tal-friul-e-la-voie-di-fa-rumor-in-non-di-p-p-p-punk-punk-punksolini/
Te suaze di chest progjet si son metûts dongje i Zuan Strumîr e i Çamberlans cul intent di fa ancjemò plui rumôr, fasint vignî fûr il lôr berli di proteste cuintri dai curt circuits de culture furlane.
◆ “Friûl!… parcè che il Friûl al à non Friûl… Parcè che FVG al fas propite dûl…” cussì al intone il ritornel finâl dal prin singul di Zuan Strumîr e i Çamberlans. Un coletîf viert e inclusîf e, come sô mission, un un progjet di liberazion. A son un grup punk rock, come che a confermin lôr «cence parons, cence confins e cence nancje etichetis o ‘siglutis’».
◆ Si presentin in maniere anonime. Al è dome un dissen che ju ritrai come il grup dai Gorillaz, ma lôr nus contin: «no sin masse esibizioniscj. Par chel, almancul par cumò si presentìn simpri cul stes dissen. O vin miôr fâ sintî la nestre musiche e fâ sintî e fâ lei lis nestris peraulis».
◆ La formazion si compon di Zuan Strumîr (vôs e ghitare), Michêl Zanutin (vôs, ghitare e tastiere), Pauline “Agane” Simonit (bas e vôs) e Pieri Cjavon “il Miôr” aka Masanete (batarie).
◆ Il grup, che al a sielzude la date dai 21 di Avost dal 2022 par screâsi, al è nassût in omaç a Joe Strummer, pe anagrafe John Graham Mellor. Ai 21 di Avost al jere di fat il setantesim inovâl de nassite dal grant musicist. Stummer al jere, tes peraulis dal grup «un poete e soredut un om, une persone, che nus à mostrât, in particolâr cui Clash e tal so percors solist dai siei ultins agns, che “the future is unwritten”: l’avignî al è di scrivi, di vivi, di sunâ, di cjantâ, di fâ sù dì par dì, di bessôi e adun cun chei altris».
◆ Il non però nol ven dret di Stummer. I Zuan Strumîr e i Çambarlans no an voie di jessi viodûts come une “tribute band”. Il lôr non al è invezit un riferiment diret ae storie dal Friûl: i Strumîrs e i Çambarlans a jerin lis dôs fazions de nobiltât furlane dal Cinccent.
Il grup sigûr nol à simpatie pe nobilitât, che e sedi chê di une volte o chê di vuê. La lôr idee e je che di ricuardâ la storie dal Friûl, metintle dongje in cjançon. Ur interesse la unitât in contraposizion a dutis lis divisions, che al sei par scrivi par cjantâ, par sunâ e par vivi l’avignî. Par chest, la etichete le àn clamade “Joibe Grasse Autoproduzions”, a ricuart dal riviel contadin furlan de Joibe Grasse dal 1511, chê che si festeze ai 27 di Fevrâr zaromai di agns, e che e je stade batiade tant che “Zornade Furlane dai Dirits”.
Ancje il lôr al è un riviel: cuintri de alienazion culturâl, sociâl, linguistiche, economiche e politiche dal Friûl.
◆ Al è cussì che e je nassude la cjançon che za si cjate te compilation “I Punks tal Friûl”, cuntun non che al fevele par se: “FVG? Nancje fevelâ. Nancje par murî”.
◆ Il toc al salte fûr de dibisugne di comunicâ, e di cjapâ posizion su la sigle FVG, che za di cualchi an e à fat discuti, soredut pes tantis propuestis politichis cuintri dal Friûl e dal furlan come lenghe.
«Chês trê letarutis» come che a cjantin «che soredut cence liniute, a scjafoin o a dinein dut. Ancje dut ce che al è biel lu fasin deventâ brut».
◆ A son za jessudis diviersis versions de cjançon. Cuntun rangjament e cuntun sunôr che a son diferents, e fintremai cun cualchi peraule par talian: “Io non sono FVG? Nancje fevelâ. Nancje par murî…”
◆ Sul canâl Youtube si cjate il video dal singul che in mancul di trê mês al à passât lis 1400 visualizazions: https://www.youtube.com/watch?v=bWIBxUClxc8
Stait daur di Zuan Strumîr e i Çamberlans su la pagjine Facebook (stes non dal grup) e il sît web screât di pôc: https://joibegrasse.wordpress.com/. Intonait e cjantait a plene vôs “FVG? Nancje fevelâ, nancje par murî”. Fasìnsi sintî! ❚
