Tal mês di Mai si davuelç la uniche rassegne in Europe dedicade ae tradizion dai orlois a soreli
No si contin lis piçulis e grandis iniziativis di valôr e di lustri culturâl che la nestre Regjon, un an daûr chel altri, e celebre e e ufrìs ai siei abitants e visitadôrs; cun di plui, i primâts che il Friûl al à in chest sens a son plui di ce che sul moment si podarès pensâ.
◆ Un esempli e je la Fieste des Meridianis di Dael, che e à la particolaritât di jessi adiriture la uniche fieste a nivel european dedicade a chescj struments inmagants: un dât che al da cetant lustri ae Regjon come pûr al piçul Comun furlan che i da acet.
◆ Ma ce sono tal particolâr lis meridianis, e cemût mai la ricorence che ur è dedicade si fasie propit a Dael?
◆ Lis meridianis, clamadis ancje “orlois solârs” o “cuadrants solârs”, a son struments di origjin cetant antighe (a vignivin di fat za dopradis tal Egjit antîc, ma cualchi testemoneance lis fasarès rimontâ fintremai al Neolitic) creâts dal om par misurâ il passâ dal timp midiant dal rilevament de posizion dal Soreli. A son formadis di un stîl o di un fier fissât intun cuadrât: la leture di une meridiane si fonde su la osservazion de posizion de ombre produsude dal stîl, e di consecuence dal moviment de lûs solâr. Inte antichitât si crodeve di fat che il Soreli al ziràs ator de Tiere, e par chest a son stâts ideâts chescj struments che a varessin segnât i moviments rotatoris dal Soreli.
◆ Cumò, a Dael a son ben 123 meridianis, dutis realizadis intai ultins vincj agns. Cheste tradizion resinte e à origjin intal 1993 di une semplice vicende di vite cuotidiane: un abitant dal paîs, Aurelio Pantanali, al à notât une asimetrie tal mûr de sô abitazion, e al à decidût di taponâle cuntune piture: par chest, al à realizade la prime meridiane.
◆ Cheste sô iniziative origjinâl e à atirât la curiositât e l’interès di dute la piçule comunitât di Dael, che a man a man e à scomençât a “copiâ” la idee di Aurelio e cussì, intal zîr di pôcs agns, svariadis meridianis caraterizadis di diviersis grandecis, colôrs e figuarzions a àn imbielît lûcs publics e façadis di abitazions privadis dal paîs.
◆ Intal 2001 si à calcolât che la cuantitât di meridianis presintis a Dael e fos rivade aromai a un nivel che al podeve clamâ dongje un ciert numar di visitadôrs, e par chest e je stade istituide in maniere uficiâl la prime Fieste des Meridianis, che di chê volte e ven celebrade un an daûr chel altri, man a man ingrandintsi, inricjintsi e cuistant une cierte innomine. Cemût che si pues imagjinâ cun facilitât, cheste fieste e à patît un stop par vie de pandemie intal 2020 e intal 2021, tornant a tacâ intal 2022, an che si à decidût di dedicâle a Enzo Bearzot, zuiadôr e alenadôr famôs che al à puartât la Nazionâl taliane di balon a vinci il Campionât dal mont dal 1982, e che al jere origjinari propit di Dael.
◆ In cheste ocasion al è stât screât un monument a forme di balon dedicât a Bearzot: ogni muse dal balon e ripuarte il non di un dai campions di chel Mondiâl memorabil dal 1982.
◆ La aree là che al è il monument e à un grant valôr culturâl: si trate di fat dal curtîl dal Museu de Civiltât Contadine dal Friûl Imperiâl, o sedi il museu etnografic plui grant di Italie, che cumò al espon plui di 25.000 tocs codificâts.
◆ Il curtîl dal Museu al è clamât ancje “Curtîl des Meridianis”, dulà che a son 22 meridianis che a documentin lis diviersis tecnichis di misurazion dal timp, tacant de ete che l’om al à madressût la volontât di misurâ il passâ dal timp (duncje di chel che i disin “metodi babilonic”) fin in dì di vuê.
◆ La Fieste des Meridianis, organizade dal Circul Culturâl Navarca in colaborazion cu la Pro loco locâl e cul Comun di Dael, e cjape dentri ativitâts sedi di caratar culturâl che ativitâts di ricrei, e e tire dongje in medie plui o mancul trê mil personis ad an.
◆ Chest an la Fieste e vignarà celebrade domenie ai 21 di Mai dal 2023, par chê che e sarà la sô vincjesime edizion.
◆ Aes 9.00 a vierzaran chestis mostris: “Meridianis antighis e modernis dal Friûl-Vignesie Julie” (mostre fotografiche che e esponarà 50 fotografiis di meridianis antighis e modernis de regjon), “Intal Paîs des Meridianis il timp balant al cor” (mostre fotografiche valorizade di senis di teatri tal viert e danzis) e “Picet: une Art che si tramande” (la mostre che e esponarà lis oparis a fûs des arlevis dal Cors di Picet di Dael de Scuele di Picet di Gurize), in paralêl cu la viertidure dai marcjaduts di hobbistiche, des robis dopradis e di enogastronomie.
◆ Si larà indevant cuntune cjaminade te nature par scuvierzi i mulins antîcs Miceu e la Cjase dal Mulinâr dal mulin Noac, e cu la conference “Ombris di Lûs” previodude pes 10.30.
◆ Tal dopomisdì si fasaran ativitâts ludichis dedicadis ai zûcs antîcs di une volte, aes musichis e danzis popolârs, in plui che une presentazion di “Simuladôrs solârs” par cure dal gnomonist Carlo Bressan.
◆ Aes 17.00 si screaran, daûr de tradizion, lis Meridianis dal concors di Dael 2023: ogni an, di fat, in paîs a vegnin screadis cuatri gnovis meridianis sieltis midiant votazion popolâr. Aes 18.30 al sarà il spetacul “La danze de lûs” des arlevis de scuele di danze classiche e contemporanie StudioDanza di Palme; aes 19.00, invezit, e vignarà premiade la meridiane di Dael 2023.
◆ Lis fiestis si sieraran aes 19.30 cu la estrazion de “Lotarie des Meridianis”. ❚
