Un studi inovatîf sul impat de energjie idroeletriche sui ecosistemis
Intune societât dulà che la tecnologjie e à pervadût ducj i setôrs e dulà che i ven dade tante impuartance al superflui, la domande e – di consecuence – la necessitât di energjie a son une vore grandis. De rivoluzion industriâl incà, fintremai ae rivoluzion informatiche in vore in chest periodi, la domande di energjie e je lade simpri in plui, ancje par vie dal cressi de popolazion mondiâl e de percentuâl di popolazion che e dopre mieçs tecnologjics e struments informatics.
◆ Cemût che si sa, la plui part de energjie doprade de nestre societât e ven dai combustibii fossii, o ben cjarbon, gas e petroli. L’incuinament e i efiets che a derivin dal doprâ chescj combustibii a son considerâts simpri plui come negatîfs, cussì intai ultins timps si à cirût, almancul a peraulis, di invertî la direzion indreçantsi viers chês che a son calcoladis fonts “rinovabilis” di energjie.
◆ Chest al è stât compagnât, come simpri cuant che si vûl sburtâ intune direzion e dâ un ciert significât a ce che si vûl fâ, di une cierte terminologjie che in plui de peraule “rinovabilis” si fonde suntune altre peraule clâf che e je “transizion”. Si vûl cussì rimarcâ che si varà une “transizion energjetiche”, duncje un spostament, intes intenzions (almancul a peraulis) di cui che si esprim in chest mût, viers altris “gjenars” di energjiis. Il doprâ un cierte terminologjie al vûl indicâ la positivitât pal om e pal ambient di ce che si previôt.
◆ Par produsi un gjenar di energjie che e je considerade divierse di chês ripuartadis ca parsore, si puedin doprâ diviers mûts e diviersis fonts, e un dai gjenars che al à vût plui “fortune” al è rapresentât de energjie idroeletriche che e je rigjavade di timp ancje in Friûl.
◆ Il fat che e vegni di une font calcolade “rinovabile”, al à dât ancjemò plui fuarce a dute la propagande terminologjiche che e compagne la presentazion e la realizazion dai progjets finalizâts ae produzion di energjie idroeletriche, tant che dopo des dighis fatis dilunc dai flums – par esempli chês dal Tiliment e dal Lumiei intal secul stât – e je stade di resint une proliferazions di implants di dimensions plui piçulis (chês che a vegnin clamadis “centralinis”) su la fonde dal fat che e sedi energjie “nete” e che dut al sedi “sostignibil” (altre peraule clâf).
◆ Considerant il fat che une robe a son lis peraulis e une altre e je la realtât, l’autôr al à volût verificâ se e cemût che chescj intervents a vedin un impat sui uciei, componente impuartante de biodiversitât, altri tiermin che dispès al ven doprât (cence vê cognizion dal so significât) tant che un valôr, dome cuant che al covente.
I cors di aghe, di fat, a son impuartants par mantignî la biodiversitât e par favorî la conession fra ecosistemis, ancje parcè che a àn il rûl di coridôrs dulà che si spostin speciis animâls, vegjetâls e nutritîfs.
◆ I intervents e lis oparis fats dilunc flums e rius a àn influît sui habitats e su lis comunitâts di vivents par vie dal mudât regjim idric: diminuzion de puartade e/o mancjance temporanie o permanente di aghe.
Il Tiliment, intal setôr montan, al è interessât de dighe di Caprizi che e bloche il cors de aghe, la Racolane e je caraterizade di sbaraments di dimensions plui piçulis che, pûr gjavant aghe e fasint deventâ iregolâr il regjim idric, no le gjavin dal dut (o cuasi) come intal câs dal Tiliment, tornant a molâle a val. A son cussì stâts cjapâts in considerazion intai doi flums doi trats: un cun presince permanente e un altri cun presince saltuarie di aghe. Intal Tiliment, un trat al jere a mont e un altri a val de dighe di Caprizi.
◆ Il studi al à durât doi agns, cun rilêfs fats dut il timp dal an, e al à indagât lis comunitâts di uciei doprant un metodi sientific oportun.
La indagjin, che e je risultade la uniche di chest gjenar (no dome in Italie) par vie de dificoltât di efetuâ rilêfs costants par un timp lunc, in ducj i periodis dal an e in ambients dificii tant che i cors di aghe – par esempli di Invier cun nêf e glace – al à permetût di vê un voli particolâr su ambients pôc studiâts e di otignî risultâts di un ciert significât che a àn verificât:
• Une variabilitât alte intai numars dai individuis e des speciis di uciei intal trat cun presince costante di aghe, a pet di une puaretât di speciis e di une scjarse eterogjeneitât de comunitât dai uciei (soredut intal Tiliment) in chel altri trat dai flums, tant che – intal câs dal Tiliment – si pues calcolâ ocasionâl la presince pe cuasi totalitât des speciis.
• Intal setôr cun presince costante di aghe, un numar di speciis plui alt di cuasi trê voltis intal Tiliment, e dal 20% inte Racolane, a pet di chel altri setôr.
• Intal setôr cun presince costante di aghe, un numar di individuis plui alt di cuatri voltis e mieze intal Tiliment, e dal 21% inte Racolane, a pet di chel altri setôr.
• La presince di un grup di speciis leadis in maniere particolâr a la aghe che – intal toc dulà che e cor simpri – e caraterize la comunitât dai uciei, contribuint in maniere sostanziâl a incressi la ricjece des speciis, la bondance dai individuis e la diversitât.
• Une diminuzion fuarte de biomasse dulà che la aghe e ven jù dome ogni tant.
• Un contribût fondamentâl des isulis che a son tal mieç dal flum (massime tal Tiliment) intal permeti la frecuentazion di diviersis speciis di uciei.
• Tal Tiliment, un cambiament fuart de comunitât di uciei par vie de mancjance di aghe, tant di podê calcolâ i doi ambients (intai doi trats), in origjin simii, une vore diviers.
• Une diminuzion ancje des speciis no leadis in maniere particolâr a la aghe intal setôr li che chê e je presinte dome in maniere ocasionâl.
Intai doi flums, ducj i parametris (plui altris no evidenziâts in chest articul) a àn indicât une semplificazion de comunitât dai uciei cuant che a son modificazions dal regjim idric, con consecuencis une vore pesantis intal câs dal Tiliment.
◆ Dilunc de Racolane, in plui dal fat che la zone indagade dal studi e à cjapât dentri ancje la vegjetazion di rive (e non dome la glerie, cemût che al jere intal Tiliment), la localizazion dal toc cun presince ocasionâl di aghe jenfri tocs cun presince costante, e à moderât l’impat, permetint – ancje se cun basse frecuence – il contat cun individuis (in spostament fra i varis setôrs di flum) di specis influençadis in maniere positive de aghe, ma cuntun bon nivel di oportunisim tant che la Bandule zale Motacilla cinerea e la Bandule blancje Motacilla alba. Chest fatôr, però, nol à permetût il contat cun speciis leadis in maniere indissolubile cu la aghe tant che il Mierli di aghe Cinclus cinclus (che e je la specie plui rapresentative dai cors di aghe alpins), a conferme dal mudament dal habitat une vore fuart e, soredut, de eliminazion des comunitâts di invertebrâts acuatics che a son il mangjâ dal Mierli.
Il studi al à duncje mostrât in maniere inecuivocabile che a son negatîfs no dome i efiets di une opare a grant elevât tant che la dighe di Caprizi, ma ancje chei di oparis plui piçulis e che a molin la aghe.. ❚
La seconde part e sarà publicade sul numar di Jugn
