La cunvigne pe Fieste de Patrie e à viert un dialic che al mancjave pardabon
Stâts gjenerâi dal teatri furlan. Di dulà che al ven, cemût che al sta, indulà che al vûl lâ. Dâur di chescj proposits, ai 15 di Avrîl a Caprive, in ocasion de fieste pai 946 agns de costituzion dal Stât patriarcjâl furlan, si son riunîts intune cunvigne diviers rapresentants dal mont teatrâl furlan: atôrs, autôrs, regjiscj, dramaturcs, storics dal teatri, organizadôrs, presidents di associazions e diretôrs artistics. Un radun, une taule taronde vierte al public par un dialic viert e partecipât, che al mancjave di tant. Almancul dai agns Setante, cuant che int di teatri come Candoni, Castiglione, Appi, Pepe, Cjanton e altris, a vevin la buine usance di realizâ cuntune cierte cadence, incuintris, cun tant di publicazions, par resonâ in maniere corâl suntune pluralitât di temis che si à discuviert che a son, e par fortune, interessants ancje intes dinamichis culturâls e sociâls dai nestris timps.
◆ “Teatri Furlan: il stât da la art”, chest il titul de cunvigne organizade dal Teatri Stabil Furlan (Tsf) dutune cu la Associazion Teatrâl Furlane (Ats), cul jutori de ARLeF, dal Comun di Caprive e dal Istitût ladin furlan “Pre Checo Placerean”. La matinade e je stade intense e cun buine partecipazion di public, tra int che a teatri e va e int che il teatri lu fâs, sedi in maniere amatoriâl che professionâl, includude la presince di insegnants des scuelis, interessâts a capî cemût che i doi monts a puedin interagjî al miôr des lôr pussibilitâts. Al è stât chest un dai argoments plui tratâts daûr des esposizions dai relatôrs, che cumò o vuei riassumi.
◆ A vierzi, daspò dai salûts des autoritâts, o ben dal sindic di Caprive Daniele Sergon e dal president dal Tsf Lorenzo Zanon, al è stât Massimo Somaglino, atôr, regjist, in plui che diretôr artistic dal Tsf. In dîs minûts, il timp a disposizion par ognidun, al à rivât a meti su la taule diviers ponts fuarts, di clare concretece e grande atualitât. Al è partît de necessitât che si sint di realizâ chescj incuintris sul stât dal teatri furlan e par furlan, intune coniunzion tra mont amatoriâl e professionâl. Al à tratât di iperburocratizazion e dai sistemis di reperiment di fonts publics, che dispès a svilissin il sens dal fâ artistic in mecanisims intorteâts. Al à fevelât di identitât, lenghe e societât in fuarce di une necessitât di libertât dramaturgjiche che e sedi buine di cjalâ lontan e plui inlà dai confins dal Friûl. E al à marcât cemût che il teatri furlan nol scuegni dome savê fâ ridi, come che dispès al ven domandât des comitencis ancje di bande de sfere politiche, cuant che si inacuarzin che al esist ancje un teatri in marilenghe.
◆ Daspò di lui e je stade la volte di Anna Pia Bernardis, atore e presidente de Ats. E à tignût a dî che il teatri furlan amatoriâl al gjolt une buine salût, che al è cetant seguît, tant che lôr a contin sù par jù 50 compagniis e un numar di cirche votcent socis. E à dit de impuartance dai cors di formazion par atôrs, regjiscj e tecnics, dai concors di scriture, e e à evidenziât il fat che la nassite dal Tsf no ur à gjavât public a lôr, anzit, si trate di une sinergjie utile e virtuose.
◆ L’autôr, scritôr e romanzîr Gianluca Franco, in rapresentance de Societât Filologjiche Furlane, al à fat une biele digression sul rapuart, storic e atuâl, jenfri narative e teatri, puartant câs come chei di Natalia Ginzburg, ma ancje di furlans come Angeli, Pasolini, Puppo, Cjanton e di lui stes, intune storie apassionante tra scriture e partecipazion.
◆ Anna Gubiani, dramaturg tal sens di consulente artistiche dal teatri stabil regjonâl dal Baden-Württemberg in Gjermanie e cofondadore dal laboratori di scriture “Mateârium”, e à dit cetant che al è impuartant fâ rêt, fevelant de necessitât dal scambi e puartant esemplis di direzions artistichis a plui cjâfs, come intes Gjermaniis, indulà che il sens de cooperazion e dal lavôr di scuadre al è un alc aromai di normâl che al da cetancj risultâts in tiermins di interès, compartecipazion e multiculturalitât.
◆ La atore, regjiste, presidente e codiretore dal CSS Teatri Stabil di Inovazion dal Friûl-Vignesie Julie, Rita Maffei, e à fat une cronistorie analitiche e concrete dal teatri furlan che al è stât bon di lâ fûr dai nestris confins, tacant dai “Turcs tal Friùl” – si scrîf propit cussì in version origjinâl – di Elio De Capitani dal ’95, par tocjâ lis esperiencis dal Teatro Incerto, de Farie di Mai e di altris produzions puartadis indenant cun sucès dal CSS.
◆ E je stade daspò la volte dal atôr, autôr e regjist, cofondadôr dal Teatro Incerto, Claudio Moretti che, intune digression libare, saltant – come che al à dit – di pâl in frascje, al à tirât la atenzion su aspiets come la lenghe, un pont di viste sul mont, lis oportunitâts che si à di jessi bogns di cjapâ al svol, la circuitazion dai spetacui, la propedeutiche, il savê contâ il teatri a dutis lis fassis di etât.
◆ L’atôr e president de Fondazion Teatro Nuovo Giovanni da Udine, Gianni Nistri, al à marcât la necessitât di realizâ une divulgazion de culture teatrâl furlane fûr dai confins, daûr di un lavôr globâl, creant pardabon rêts e no dome a peraulis, cul auguri che a vegnin metûts in vore i bogns proposits che si spere di viodi realizâts in curt e cun entusiasim.
◆ Al à sierât lis esposizions il dramaturc, scritôr e storic dal teatri Paolo Patui, partint di dôs domandis: a cui i staial a cûr il teatri furlan e cuâi sono i obietîfs? Une tratazion, la sô, plene di ispirazion e di sugjeriments, che e e à savût – cun voli critic e vision limpie – mostrâ trop che al covente fat inmò, ma insiemi.
◆ Po dopo, a son vignûts i intervents dal public, e sore ducj al è ben chi marcâ la domande di une zovine studente di siencis de formazion, atore diletante, che e à domandât cemût che pardabon si pues coinvolzi lis scuelis, in plui di chel che si sta bielzà fasint, ma forsit nol è avonde, par fâ une vere azion utile a semenâ l’amôr pal teatri ai piçui, che a son i atôrs, i regjiscj, i senografs, i tecnics e il public di doman. No si viôt la ore di un gnûf incuintri dedicât al teatri furlan, indulà che si podarà contâ dai progrès che a son stâts fats, e indulà che la union e fâs la fuarce. ❚
