Oblic professionâl pai miedis?

Intal so discors sul “Futûr de nazion”, proferît in Març, il cancelîr austriac Karl Nehammer, cun riferiment ae cjaristie di miedis intal servizi sanitari public, al comunicave la introduzion di un oblic di esercizi de profession in Austrie pai gnûfs miedis. “Chel che al studie in Austrie al varès ancje di reonâ ae societât almancul une part di ce che al à vût sore nuie”. Cheste afermazion dal cancelîr e je motivade dal fat che sei i laureâts todescs in Austrie, sei chei austriacs in Gjermanie a àn miôr restâ in Gjermanie. L’oblic al varès di durâ par cinc agns. Simpri daûr dal cancelîr, la Austrie e spindarès par ogni student di medisine 360.000 euros, pa la cuâl la introduzion dal oblic e sarès plui che justificade e e puartarès dal sigûr efiets positîfs. In chest mût, cun di fat, a saressin plui miedis a disposizion sei dai ospedâi che dal teritori.
◆ No son stâts pandûts altris particolârs, tant che par esempli eventuâls ecezions o sanzions par chei che no vessin di adempî l’oblic. Su chest in tancj a àn palesât la lôr opinion, pal plui disint che a jerin contraris a cheste gnove leç. Dut câs, stant che l’oblic al cjaparès dentri sù par jù ducj i students di medisine, la disposizion e varès di jessi acetade de plui part. Cun di plui, al è facil che, dopo di vê assolt l’oblic di esercitâ par cinc agns in Austrie, i miedis che prime a pensavin di lâ intal forest a decidedin di restâ. A chest si à di zontâ il fat che la introduzion dal oblic al sarès un segnâl une vore fuart dal fat che il probleme de mancjance di miedis inte sanitât publiche al ven cjapât cetant a cûr e i ven fat cuintri cun sistemis fuarts. Chest al puartarès ancje a gnovis ideis par risolvi il berdei di une sanitât lade cetant in piês intai ultins agns in dam dai citadins.
◆ La plui part dai miedis che a bandonin il paîs o il sisteme sanitari public lu fasin par vie che no son dacuardi cu lis cundizions di lavôr. Intal privât a varessin plui timp di dedicâ a ogni pazient, robe che par vie de paiis masse bassis pes visitis al è cumò impussibil intal public, e al sarès il motîf dal numar simpri in cressite dai miedis cence convenzion. Cun di plui, intai ospedâi, par vie de mancjance di personâl e de burocrazie masse grande, al restarès pôc timp ancje pe formazion e pal inzornament dai gnûfs miedis. I tarizadôrs a contindin che tancj neolaureâts a sintaressin chest oblic tant che une prepotence e si che duncje a laressin vie istès dopo dai cinc agns, causionant di consecuence une emigrazion di personâl cualificât. Cemût che si sa, la formazion di un miedi no finìs cu la lauree. La sô formazion e continue cui prins agns di esercizi de profession propit dentri dai ospedâi, e e cjape la plui part dal lôr timp.
◆ Magari cussì no, al somee che par cumò lis sperancis de introduzion dal oblic a incuintrin tant riviel. Lis stessis reazions dal ministri de salût, e cun di plui chês de previdence sociâl e dal ordin dai miedis, a son dal dut contrariis, e a sburtin pluitost viers di un miorament des cundizions di lavôr. A sostegnin ancje che, fasint cussì, si blocarès la cariere di ducj i miedis che no àn voie di esercitâ la profession, ma di avodâsi ae ricercje, e, ae fin, chest oblic al larès a pro dai students plui siôrs, che a puedin permetisi di scjinfâ l’oblic, paiant une sanzion o une part dai studis. Un lechet par acetâ l’oblic al podarès jessi par esempli l’implant di une borse di studi in plui di chês che a esistin za. Si domandìn se chest oblic si podedi meti in vore dal pont di viste legâl: daûr de costituzion europeane al sarès pussibil, ma si à di tignî cont di cualchi limitazion, sicu il dirit costituzionâl ae libare sielte de risultive dai vuadagns di ognidun, e la proibizion di lavôr sfuarçât o obligatori. L’oblic al varès di jessi su base volontarie in rapuart a un compens in bêçs. Chest model si podarès inviâ facil cence lâ cuintri di nissune fonde di dirit. ❚