I cent agns de nassite di Renato Appi. Om di teatri leât ae musiche

Teatri, contis, radiodramis, poesiis, narative, luncmetraçs. E musiche. Simpri la musiche. Al è graciis a chê che Renato Appi al à tacât a scrivi. «E cui ricuarts dai lûcs e des personis a tornavin lis vôs, e il lôr sun al deventave onde, ritmi, al cjantave dentri e si faseve poesie». Cussì al diseve intune interviste, memoreant i agns di presonie a Karthaus in Gjermanie dilunc de Seconde Vuere Mondiâl, moment indulà, tal sintiment cetant profont de mancjance di cjase, al à tacât a scrivi. A colin i cent agns de nassite dal poete, scritôr, dramaturc, animadôr culturâl, e cetant che si dovarès ricuardâ di lui, Renato Appi (1923 – 1991), che tra lis tantis robis al è stât ancje vicepresident de Societât Filologjiche Furlane e dal Ente Friuli nel Mondo, in plui che a cjâf di tantis compagniis, clapis di culture, circui interessâts a pandi l’amôr pe fotografie, pe piture, pe art in gjenar. E la musiche, tal cûr di chest om che al à scrit par talian, furlan e te varietât di Cordenons, la sô tiere mari, di simpri element fondant e ispiradôr.
◆ «Il rapuart, la magjie, dilunc dai agns, e à continuât a leâ il gno anim ai suns musicâi de mê fevele, chê dai miei cjârs, dai miei nonos, dai miei amîs, da la mê tiere», al disarà intune altre interviste.
◆ Inte sô largje produzion, che e conte cetancj lavôrs di vari ordin, mi plâs achì fâ une piçule sintesi des sôs scrituris leadis ae musiche. Appi nol jere musicist, dal sigûr, ma al jere poete. E il vêr poete, chel sclet che al cjate intes rimis, tai acents, tai sunôrs des peraulis la melodie dal viers, nol trascure mai il leam che di simpri al ten dongje la art poetiche e chê musicâl.
◆ Al à scrit, pôc dopo de fin de vuere e publicade tal 1947, la sô prime e uniche comedie musicâl, cul titul “Sogno di spazzacamino”, scrite “par” e “cui” fruts, rapresentade dai zovins arlêfs des scuelis elementârs di Cordenons cu la partecipazion di cualchi adult. Une conte musicâl che e à vût un bon sucès cun diviersis replichis e che e meretarès di jessi ricjapade, par no destinâle ae dismentie. Lis musichis a plui mans a jerin di Cossetti, Springolo e Basilico.
◆ «Fra teatri, narative e poesie, par me no esist une diference sostanziâl», al disarà. «Forsit parcè che, di là dai contignûts, o sint la esigjence di “sun”». I siei rapuarts cu la musiche, autôr ancje di tescj di cjançons, si palesin in “Al paèis pì biel del mondu”, so il test e la arie. Un cjant incidût su disc a Milan tal 1963 pal Congrès de Societât filologjiche Furlane, cul côr e la orchestre direzûts di Sante Turrin e vôs di tenôr di Adriano Turrin. Cun chest toc, la Corâl di Cordenons e à vinçût il prin premi nazionâl talian de tierce edizion dal “Festival del Canto Popolare”, presentât di Enzo Tortora e cuntune zurie di esperts di musiche di grande notorietât, tant che Renata Scotto, Virgilio Piubeni, Vittorio Montanari, poetis e professôr de La Scala e dal Conservatori di Milan. Une altre sô biele cjante e je “Revoc lontan”, peraulis di Appi su musiche popolâr russe, e lant indevant o citi “Un punt, un troi, ‘ne rive”, cheste e je dute sô e armonizade di Ettore Travanut. Inmò, “L’anzul de Cordenons in ziru pal mondu”, su variis melodiis talianis armonizadis dal “Quartetto Stella Alpina”, che Renato Appi ur jere leât di une amicizie sclete, e che dispès al à presentât i lôr concierts. Par sierâ la liste des sôs esperiencis tal mont de musiche, o nomeni ancje “Se te me spetis torni” e “S’a èlu stat?”, cheste ultime su musiche di Mario Macchi. ❚