Comunist e autonomist, al fo il pari de leç su lis areis di confin
Cuant che al mûr un amì che cun lui si àn condividût tancj moments di vite publiche, al è naturâl cirî di ripuartâ ae memorie i aspiets carateriâi positîfs e la impuartance des azions che intal timp si àn vivudis.
◆ Chest in cualchi mût al è sucedût intai dîs che e je rivade la notizie de sô muart, e in chê ocasion si à podût ricuardâsi dai sessante agns che al è stât protagonist de politiche e intes istituzions. In ogni câs, il percors politic particolâr di Renzo al domande di fâ un sfuarç par cirî di capî se chel che nus lasse al è dome un ricuart o invezit un messaç di interpretâ e di aprofondî.
◆ Al à passât tancj agns intal PCI, là che al è deventât un so cuadri dirigjent, e dopo al à rapresentât il partît tal Consei Regjonâl dal F-VJ e te Cjamare dai Deputâts. Par deventâ li “il pari” di chê leç su lis areis di confin (1991) che e je stade une interpretazion fondamentâl pal nestri mont de economie.
◆ E nas chê volte la sô sielte di deventâ interprete de “cuistion furlane”, e di fâlu no dome tant che cuistion culturâl e sociâl, ma ancje inte direzion di cirî un sboc politic organizatîf di pês just. Une sielte resonade che e devente un impegn declarât cul libri “Sul filo della memoria” dal 1994, che di li al scomence un venteni di ricercje che e viôt tant che centrâl la esperience di cjâf grup in Consei Comunâl a Udin intal prin mandât dal sindic Cecotti e cu la vuide di Convergenza per il Friuli, che di chê esperience e varès vût di costituî il consolidament politic organizatîf.
◆ I agns di chest impegn diret si contin intal libri dal 2011 “Ai confini di una patria non sempre ritrovata”, moment di riflession critiche su sperancis e ocasions cualchi volte mancjadis. Ma Renzo nol pues fermâsi. Si torne a partî cu la associazion Friuli Europa che, par dut il deceni dopo, e je stade chel che vuê o clamìn un “think tank”, indreçât a meti sul tapêt e a dâ indicazions su lis cuistions che a tocjin il Friûl e la Regjon là che chest al è inserît. E, al va dit, cence mai abandonâ i principis sociâi de culture politiche di indulà che al vignive, pûr cjapant dentri dutis lis cognossincis e i podês che inte realtât a operin e a incidin.
◆ Mi soi domandât ce che al reste dal lunc lavôr inteletuâl di Renzo Pascolat e se di chel, cualsisedi che al vueli agjitâ la bandiere dal autonomisim, nol puedi no tignî cont. La rispueste e je inte plene atualitât dai cuatri temis che in moments diviers e in lûcs diviers al à cirût di dâur rispuestis e che ancjemò vuê a rapresentin i as fondamentâi di riferiment par cui che si interesse de robe publiche, tacant de centralitât dal teritori là che o sin a stâ:
- cualis carateristichis che al à di vê il disvilup economic;
- cuâl cuadri politic istituzionâl che al pues facilitâ un ecuilibri plui adat tra il Friûl e Triest;
- il rûl fondamentâl de Europe e dal superament dai confins par dâ un spazi a une Regjon che e à vivût la nestre storie;
- la dibisugne de costruzion di rapuarts origjinâi tra lis esperiencis politichis dal autonomisim e il sisteme dai partîts talians.
◆ A son ducj temis che in Friûl ancjemò a spietin une rispueste. O rivi a une conclusion sintetiche. la ereditât che nus lasse Renzo e je duncje soredut une indicazion di lavôr pal futûr, pitost che dome une bandiere di agjitâ intal aiar. La “Patrie” nol podarà dismenteâlu. ❚