Trop puedial jessi discriminant cjapâ “9” in sloven?

Un câs di discriminazion che al fâs cuistionâ in chescj dîs in Carinzie: un arlêf di scuele elementâr, che i è stade refudade la iscrizion al gjinasi di Hermagor, al è stât penalizât par vê frecuentât une scuele bilengâl. L’antecedent: il fantacin di dîs agns al à frecuentât une scuele elementâr intal distret di Vilac, jentrant di pueste intal insegnament bilengâl todesc sloven e vuadagnant in dutis lis materiis il massim dai vôts, ven a stâi 1 (pai austriacs al vâl tant che il nestri 10), cul unic 2 (9 pai austriacs) in sloven. Daûr dai sflandorôs risultâts al decît, si che duncje, di iscrivisi a un gjinasi (intal sisteme scolastic austriac al corispuint ai agns di scuele medie che a son prime dal liceu) di Hermagor, là che però nol ven fat bon, cu la motivazion di “valutazion no idonie”. La famee, ben clâr, si è indreçade a un avocat, che al motive che se il frutat nol ves frecuentât une scuele bilengâl e al ves metût dongje dutis valutazions di “une vore bon”, al sarès stât acetât, ce che i fasarès in mût net cuintri la improibizion di discriminâ par motîfs etnics. L’avocat, in non e par cont de famee dal arlêf, al à decidût di inmaneâ une azion legâl par che un doman chescj impediments no tornin a presentâsi e par che il fantacin al podedi frecuentâ il gjinasi che al à sielzût.
◆ Al è probabil che il câs si sedi risolt ancjemò prime di finî devant di une cort, cu lis motivazions plui o mancul azardosis dal istitût scolastic che si fevele, che al motivave il refudament de iscrizion no cul vôt masse bas, ma par vie de mancjance di puescj inte scuele. Al somee, cun di fat, che za di mês si cuistioni su la introduzion di une prime classe di plui arlêfs, e che za 19 frutats su 49 a sedin stât refudâts par chest motîf. I gjenitôrs a varessin alore mandât al ministri pe istruzion une petizion cun 700 firmis, che al somee che e vedi vût un bon acet. Cun di fat, il ministri al varès za pandude la sô intenzion di meti sù une classe di plui arlêfs. No saressin ancjemò confermis uficiâls, si ben che la posizion de diretore didatiche dal istitût e lassi intraviodi une soluzion positive dal câs, stant che jê stesse e a clucît cul ministri un acet slargjât intal istitût.
◆ Al è intrigôs di capî se si trati di un repeç a pet di une pussibile azion legâl, cun consecuencis pôc esaltantis pal istitût scolastic, o ben di problemis logjistics. Sta di fat che la viere cuistion de minorance slavofone in Carinzie no si è ancjemò dal dut disberdeade e andis discriminatoriis, si ben che mascaradis, a continuin a madracâ jenfri la popolazion e lis istituzions plui piçulis. Chest al sucêt soredut intai comuns e intai paîs de fasse di confin, e si che duncje il fat che o vin fevelât al à intiziât in regjon plui di cualchi perplessitât. ❚