Un passât in Sud Afriche, po il tornâ in Italie, il sport, i libris, l’impegn come dirigjent e gjornalist: dutis lis animis di un furlan che al à simpri metude passion intal fâ lis robis
Cuant che a si fevele di canotaç e, massime, di canoe in Friûl, al è dome un puest che, par da bon, al ven iniments: San Zorç dal Noiâr e la “Canoa San Giorgio”. Un sodalizi bon di clamâ risultâts preseâts par dut, cun le passion e l’impegn di ducj. La vôs di chê societât al è Ermanno Scazzolo, dirigjent sportîf, gjornalist, ricercjadôr e scritôr: une persone che, in ta la sô vite, al à cetantis robis di contâ. E no dome in tal sport!
◆ “O vevi 13 agns, cuant che o soi lât in Sud Afriche. In chê volte, la Saici di Tor e veve viert un stabiliment pe produzion di celulose, dongje Durban, su la cueste dal Natal, cjalant l’Ocean Indian. In chei agns, la Italie e veve la tecnologjie e pôc lavôr: ven a stâi che in tancj a son lâts ancje là jù par vê un stipendi cetant bon e par sistemâsi. Intai prins agns, in 350 di lôr a son partîts pal Sud Afriche e, daspò di un pôc di timp, a àn clamât ancje lis fameis”.
_
Un cjanton di Patrie intun altri continent?
“Il 95 par cent di chei 350 a jerin furlans de Basse, di San Zorç, di Tor, di Çarvignan e, stant insiemi, a àn tirât sù un paîs furlan ancje là. Il tenôr di vite là jù al jere une vore miôr di ce che a vevin in Italie, si stave cetant ben. E, dongje dal Ocean, al jere come jessi in vacance. Di vuelin, o ai scrit un libri cul titul “I Friulani di Unkomaas”, par contâ dute la storie. Unkomaas e jere une localitât di vacancis, indulà che si ritiravin i vecjos funzionariis dal imperi britanic”.
_
Si pues contâle come la Floride dal Sudafriche.
“Parcè no? Unkomaas e je une localitât a cirche cincuante chilometris di Durban: si lave sù e jù in machine e cul tren, a jerin tantis comoditâts. E, cul timp, e jere deventade une localitât par cjatâsi par ducj i furlans dal Sudafriche, che a rivavin ancje di Johannesburg, par une vacance e par fevelâ in marilenghe. In chei agns, in Italie, il sport plui preseât, come che al è cumò, al jere il balon e nô furlans o vin pensât di no jessi tant diviers. Il sport, massime il balon, al jere une ocasion cetant impuartante par integrâsi miôr intal ambient. O jerin ducj zovins e o vin tirât sù une scuadre di balon che, intal 1961, a à vinçût il campionât regjonâl”.
_
Sodisfazions e voie di cjapâ pît ancje là jù.
“No bisugne dismenteâsi che la Vuere Mondiâl e jere finide pôcs agns prime e la Italie e jere vignude fûr une vore mâl; a Zonderwater, 500 chilometrots plui insù, a jerin stâts 100 mil presonîrs di vuere talians. Dut câs, il sport, par nô, al jere cuasi une oportunitât di riscat. Sul lavôr o jerin une vore preseâts. Il Vescul di Udin al veve mandât jù pre Umberto Ceselin, di Sedean, come vuide spirituâl: o vin tirade sù la glesie, cu lis cjampanis rivadis des Fondariis Broili di Udin. Cumò, lis gnovis gjenerazions si son pandudis in dut il mont, tancj a son tornâts ancje in Italie. Jo o torni dispès a Durban, dulà che al è a stâ gno fradi: al è un altri mont”.
_
La passion di contâ storiis vegnie di chel moment?
“O soi nassût a Clauian e o ai imparât il talian dome a scuele, parcè che in famee si fevelave dome furlan. Cuasi nissun al saveve scrivi par furlan e alore, daspò lât in pension, o ai fat cors di marilenghe, tacant un tic a la volte a scrivi storiutis, la storie di Clauian, la storie dai miei prins 13 agns intal borc. E mi soi passionât di gjenealogjie, tant che o ai scrit la storie dai Scrazzolo, cjatâts in dut il mont, e ancje dai Zoff di Marian e dai Zof di Clauian, stant che mê mari si clamave propit Zof”. ❚
:::::::::::::::::::::::::::::::::::::::::::::::::::::::::::::::::::::::::
La Canoe a San Zorç: une tradizion dal 1968
Il sodalizi de Basse al à tacât la ativitât intal 1965, come sezion distacade dal DLF. Dopo trê agns si è afiliât ae Federazion. Intal 1977 e je rivade ancje la ativitât su lis canois
A son fintremai plui di cincuante agns che a San Zorç di Noiâr si remene cui rems e cu lis pagaiis. Ancjemò agns prime che Ermanno Scrazzolo al tornàs in Italie, un grup di amîs, sburtâts dal mestri Roberto Ietri, al tacà a alenâsi e a fâ garis su lis aghis dal Ausse e inte lagune.
◆ La volontât e jere chê di pandi la pratiche sportive e di fâ agonisim, dentri des Federazions di Canotaç e Canoe, massime amatoriâls. Intai prins agns Otante, a son rivâts i prins titui talians te dissipline de Canoe, e a San Zorç a àn scomençât a pensâ in grant. La costruzion dal Centri Federâl di Vilegnove e i ricognossiments a nivel nazionâl a àn puartât a tirâ sù la societât come “Canoa San Giorgio”, come che e je in dì di vuê.
◆ Di chê volte, il sodalizi che cumò al à come president Luca Scaini, al à cjapat cuasi 400 titui talians intes variis categoriis, e al è preseât tant che une des primis societâts a nivel talian, almancul inte canoe e intal kayak. Tant che no si contin plui lis vitoriis tes classifichis a scuadris.
◆ No dome risultâts: Adelfi Scaini, un dai fondadôrs, al è deventât tecnic e dirigjent a nivel talian de Canoe, e so fradi Daniele cumò al è president dal Comitât regjonâl dal Friûl-Vignesie Julie di canotaç. Tancj tecnics a son deventâts ponts di riferiment par dute la ativitât. E la Societât e je stade premiade cu la Stele di aur al Merit Sportîf.
◆ Di cualchi an, il canotaç al è tornât protagonist a San Zorç pai risultâts otignûts di zovins une vore preseâts. Marco Dri al à cjapade la medaie di bronç tal Campionât Mondiâl under 19 dal 2022, inte specialitât dal dopli. Tal mês di Mai di chest an, Josef Giorgio Marvucic, al è deventât campion european, simpri tai under19: il prin titul continentâl par un tesserât de societât colôr naranç. E il biel al è che la mari di Marvucic, Loredana Taverna, e jere stade intal 1982 la prime atlete dal San Zorç a vinci un titul talian te canoe. Come dî che jessi i prins al è un afâr di famee. ❚
:::::::::::::::::::::::::::::::::::::::::::::::::::::::::::::::::::::::::::::::
Dal balon in Sudafriche a la canoe in Italie
La seconde vite di Ermanno: tant timp a Vilegnove
Il campionât regjonâl di balon vinçût in Sudafriche intal 1961 nol è stât la uniche sodisfazion di Scrazzolo intal sport…
◆ “Intal 1971 – al conte Ermanno – al è nassût gno fi Mauro e o soi tornât in Italie, in Friûl, cun chê di viodi cemût che al jere, prime di stabilîsi in vie definitive. O vevi savût che inte zone di San Zorç a vevin di tirâ sù un stabiliment e o soi stât cjapât par lavorâ intai uficis di Rome, par trê agns. Daspò, par fortune no son lâts indenant cu la costruzion di chê fabriche, parcè che al sarès stât un disastri a nivel ecologjic. O ai cjatât lavôr intal ufici tecnic de Saici di Tor. Cuant che, ae fin dai agns Setante, o cirivi un puest par fâ fâ ativitât sportive a Mauro, un vigjil mi à conseât di lâ a viodi là da la canoe e, pôc a pôc, o soi jentrât tant che volontari par dâ une man”.
Cemût isal nassût il centri di Vilegnove?
“Intal principi, si faseve ativitât te zone dal vecjo puart, daûr da la gleseute di Vilegnove. O soi stât vicepresident e daspò, par 15 agns, president de societât Canoa San Giorgio: il gno mandât al è chel plui lunc di ducj. Come president, o ai sburtât cu la Aministrazion Comunâl parcè che il puest indulà che i zovins a lavin cu lis canois al jere masse pericolôs. Di vuelin, cun risorsis publichis, donazions privadis, un mutui cul Coni a tas une vore agjevolât e cetante previdence, o vin rivât a tirâ sù il Centri, dongje di li che si zontin lis aghis dal Cuar e dal Zumiel, inte zone dal Ausse. Intai prins agns, o vevin lassât il canotaç par concentrâsi dome su la canoe, ma inte dì de inaugurazion dal Centri, il president de Federazion dal Canotaç, Romanini, mi à fat prometi che o saressin tornâts a cori ancje cui rems. O vin clamât il mestri Ietri e dut al è partît ancjemò une volte”. ❚
