La edizion numar 27 e je dedicade ae trombe, iscrizions dentri dai 5 di Lui
Al è un dai concors musicâi par struments a flât, o miôr, intal detai, par otons, plui vecjos dal Friûl. Une competizion storiche che e va indenant di ben 27 agns, a Paulêt, indulà che e esist une tradizion filarmoniche di dut rispiet, stant che li e je nassude e e opare une des bandis plui vielis dal Friûl. Une orchestre a flâts, par jessi precîs, fondade intal lontan 1875 e che cumò, e di un biel toc, e ven puartade indenant de associazion Euritmia, une realtât vivarose che e fâs concierts, e partecipe a concors, dispès classificantsi intes primis posizions. E inmanee ancje concors, e inmò sore e dirêç une scuele di musiche che e tire sù musiciscj cetant brâfs, fin de etât plui tenare. Sul lôr sît, www.euritmia.it, o podês lei dut ce che a fasin e stâ daûr aes lôr iniziativis ancje sui socials.
◆ O podês cussì savê di ducj i cors di musiche che a fasin, de lôr “Minibande”, une specialitât une vore impuartante dedicade ai plui piçui, che a àn cussì mût di svicinâsi ae musiche jentrant intune prime orchestre, podint zuiâ e sunâ par cressi insiemi. Daspò e je la orchestre dai zovins, la prosecuzion naturâl di un percors che ju puartarà dentri de orchestre a flât grande. In cheste sonante realtât, che e viôt mestris di nivel tant che David Gregoroni, Franco Brusini, Irina Guerra e dut un diretîf passionât e impegnât, no mancjin progjets trasversâi, come cunvignis, laboratoris corâi e strumentâi. Une altre biele storie e je chê de “musiche inte scune”, ven a stâi incuintris e ativitâts par feminis incintis, fameis, frutins di zero a trê agns, mestris, educadôrs e educadoris, midiant de teorie dal aprendiment musicâl e dal metodi Edwin Gordon, dedicât propite ae fasse di etât neonatâl.
◆ Euritmia, che la sô orchestre a flât e à di resint vinçût il prestigjôs concors bandistic internazionâl “Flicorno d’Oro” di Riva del Garda, puartant un program impegnatîf sunât devant di une zurie di innomenâts musiciscj e mestris di Svuizare, Spagne, Austrie, Israêl e Italie, ancje jê – come che si à dit – e organize un concors di taradure internazionâl. No par orchestris ma par soliscj zovins che a rivin di dut il mont. Si trate dal “Gran Premi Paulêt”.
◆ In cheste edizion numar vincjesiet, la gare – e je sì une competizion ma soredut un mût par confrontâsi cun int che e sa ben il mistîr, une maniere par cognossi altris coleghis amants dai struments a flât, zovins apassionâts -, e je dedicate a trombetistis e trombetiscj di dôs fassis di etât: fin ai 18 agns e fin ai 21 agns.
◆ Al è un dai concors in materie plui increditâts, dentri dal circuit European Union of Music Competitions for Youth (Emcy), sostignût de Fondazione Friuli e de Associazione delle Bande Italiane Musicali Autonome (Anbima). Ancje chest an al à une zurie di nivel, cun musiciscj e docents di Italie, Ream Unît, Spagne e Slovenie. A son: Francesco Tamiati, Morris Sebastianutto, Paul Archibald, Luis Gonzalez e Jure Gradišnik.
◆ La competizion si struture intune fase preliminâr che si davuelç a distance, inviant une videoregjistrazion, e une fase finâl in presince tal Auditorium Comunâl di Paulêt, ai 21 di Otubar. I trê finaliscj selezionâts di ogni categorie a saran valutâts sedi de zurie, sedi dal public. Par dutis e dôs lis fassis di etât e je proviodude la esecuzion di un toc obligatori e di un toc a sielte tra dôs propuestis. Dutis lis informazions, par talian e par inglês, a son sul lôr sît, euritmia.it, indulà che al è pussibil lei e discjamâ il regolament. La iscrizion e va fate dentri dai 5 di Lui, duncje al è inmò timp par mandâ il materiâl che a domandin.
◆ Ai finaliscj ur ven garantît il mangjâ e il durmî gratuits e ai vincidôrs ur saran dâts premis in monede, in plui de pussibilitât di esibîsi intes edizions sucessivis dal concors. Inmò sore, al prin classificât de categorie dentri dai 21 agns, i vignarà ricognossût il premi Emcy.
◆ Il Gran Premi Paulêt al è sostignût ancje di bande de Regjon Friûl-Vignesie Julie, dal Comun di Paulêt, di Credit Friuli e dal Conservatori Jacopo Tomadini di Udin. Trombetistis e trombetiscj di dut il mont, daitsi dongje! ❚
