Interviste cun Dario Bulfone, paron di un rocul, l’antîc sisteme par oselâ, o ben par cjapâ i uciei pal sostentament e pe vendite. Cu la cjace che cumò e je vietade, chest imprest al à mudât destinazion, cjapant un fin naturalistic
Dario Bulfone, pensionât, sessantenûf agns, di Feagne, mi mostre il so rocul, che al è un grant cercli fat di arbui, une sorte di Stonenge furlane di plantis. Une volte al jere un sisteme par oselâ, par cjapâ i uciei piçui pal sostentament e pe vendite, ma cumò al è deventât un imprest par studiâju cun finalitâts naturalistichis. O sin fra cjamps e vignâi, tal comun di Prepot.
__
Ce origjin àno i rocui? Ise une tipicitât furlane?
Di chel che mi risulte a vegnin dal bergamasc e dopo si difondin in Venit e in Friûl. Dut câs, si puedin considerâ une tipicitât: al massim dal lôr disvilup, in Friûl a ’nd jerin almancul 1.200. Cumò a ’nt restin un centenâr. Oselâ al è stât vietât dal 1992; lis primis limitazions si meterin ai timps dal Duce, prime si podeve cjaçâ dute la faune, fale 4-5 sortis di uciei, par esempli la acuile. Po dopo, a man a man, vie pai agns si zontavin specis vietadis di oselâ, fin ae sieradure totâl. Une robe juste: aromai nol à plui sens, cul benstâ di cumò. Une volte invezit e jere fam e dut al coventave par sostentâsi.
__
Cemût funzionial il rocul?
Il rocul al è un cercli di arbui che al pues vê diviersis dimensions, cun pôc fûr un torute, la “roche”, di indulà che al ven il non di “rocul”. Di cheste torute al vignarà ativât il spauraç, un argagn che al veve di someâ un ucielat rapaç. Tai arbui che a formavin il cercli si metevin lis rêts par cjapâ i uciei. Dentri dal rocul si metevin lis lescjis, che a jerin uciei vîfs, par esempli dentri di une scjaipule, che cul lôr cjant a atiravin i volatii che a jerin ator pe campagne.
Une volte atrats, i uciei migradôrs a jentravin intal rocul par poiâsi sui rams e il cjaçadôr al azionave il spauraç – che al jere fat di fîi metalics cun leâts peçots colorâts o alis di uciei, o di vintulinis di vencs cul mani – che al spaurive i uciei fasintju svolâ, scaturîts, dulà che a jerin platadis lis rêts. Infin, l’operadôr al lassave la postazion par gjavâ des rêts i esemplârs cjapâts. Vuê no vegnin plui doprâts uciei vîfs ma regjistradôrs che a riprodusin i cjants di riclam.
__
No son lis rosis dai arbui che ju atirin, duncje. Di ce plantis isal fat?
No, ciertis caturis a vignivin fatis parecjant zonis cun arbui di pome o baulis, ma in chest câs la robe e je plui mecaniche. I arbui a son cuasi simpri di cjarpin blanc, un arbul che al à lis fueis ancje dilunc dut l’Invier e duncje al permet di vê il sisteme simpri atîf vie pal an. _
E cemût ise nassude la sô passion par cheste pratiche?
Inte mê famee, de bande di mari, e je simpri stade la passion pe cjace dai uciei. Nô no vevin rocui, ma la cjace si fâs in varis mûts, e duncje frecuentant chel ambient dopo si finìs par cognossi dutis lis tecnichis e tantis personis e situazions che ur zirin ator. Duncje ancje cui che al veve rocui, e cussì o ai imparât.
__
Oselâ al è vietât di agns, ma il so rocul al è ancjemò in ativitât, però cuntune funzion particolâr!
Sì, chest rocul al è in maniere uficiâl une «stazion di cature e inanelament cun finalitât sientifiche» de Ispra, l’Istitût Superiôr pe Protezion e la Ricercje Ambientâl. Jo o cjapi i uciei e dopo ju diliberi. Une stazion permanente di chest gjenar e je une robe rare: e je la uniche in Friûl, e in Italie forsit a ’nd è dome une altre intal bressian. Deventâ stazion di cature nol è stât facil, ancje parcè che jo o vignivi de part dai oseladôrs, duncje e jere un pocje di difidence. Si àn di fâ esams par otignî un patentin. In Friûl o sarìn in ativitât une ventine che lu vin.
__
Cemût si fasino chestis ricercjis?
Nus ven rimetût un program daûr dal studi che l’Ispra al à decidût, e duncje jo o ai di fâ caturis ogni periodi determinât. Par esempli, cumò e partìs une ricercje dulà che o ai di cjapâ un ciert numar di sogjets ogni desene di dîs par trê agns. Si cjape l’uciel, si lu imbrucje e si lu regjistre. Se al è za imbrucjât, si regjistre che al è tornât. Chest al permet di monitorâ la situazion de faune volatile, in colegament cuntun sisteme european.
__
Covential par studiâ lis migrazions dai uciei?
No, plui che altri par monitorâ situazions, sedi des speciis di uciei che dai lôr compuartaments. Che al tegni presint che lis lôr migrazions ancjemò vuê a son un misteri. Cualchi volte i scjaps al pâr che a fasin un percors, cualchi volte un altri, cierts agns a van intun puest, dopo lu cambiin… O sin tant lontans dal cognossi chest fenomen de nature. Al è un alc di inmagant: par chi a passin uciei che vie pe stagjon a van jù in Afriche fin plui inlà dal Sahara. La migrazion dai uciei e dure dut l’an, no à polsis e e dipent di une serie di fatôrs, che a van de velocitât dal uciel al percors di fâ, fin ai mudaments climatics.
__
Cu la tutele, la faune dai uciei ise aumentade?
No, magari e à frenât il calâ. I uciei a son simpri di mancul par vie de agriculture intensive e de presince dal om, ancje se cualchi specie no à pôre di nô. O pûr, par colpe di altris struturis che si invente l’om, par esempli lis antenis telefonichis: chês ju disturbin tant, si insemenissin.
__
E cemût ise cambiade la faune?
No si pues dî trop che la faune e sedi cambiade parcè che… e cambie simpri! A son specis che a cressin e specis che a calin, magari a somein sparidis e dopo a tornin. Par esempli, dal 2005 al è stât un aument in dute Europe dal colombat che prime al jere presint ma in cuantitâts modestis. Cumò al è deventât scuasit infestant. La cisile invezit e sta lant in mancul parcè che salacor i mancjin lis stalis e lûcs simii dulà nidificâ. Il mierli, fra chês che o cognossìn ben parcè che nol à grande pôre dal om, e je une di chês speciis che e je plui sometude a grancj moments e grancj sbassaments. Tant che dute la nature, i uciei a son simpri in evoluzion e adatament continuis. Jo o assist di chest osservatori privilegjât. ❚
……………………………………………………….
FOCUS. I rocui in Friûl cumò: conservazion, concierts, libris
La Regjon e met bêçs pe conservazion e pe valorizazion di bressanis e rocui, ma cun cifris modestis: l’impuart massim dal contribût par metri cuadri di superficie al è di 0,73 euros pes bressanis e di 0,93 euros pai rocui e pes lôr struturis complementârs. Si sta un lamp a fâ il calcul che no son beçons. Cundut achest, tancj apassionâts si impegnin istès a viodi di chestis struturis, e a son daûr a nassi variis iniziativis par valorizâju.
MUSICHE TAL VERT
Ancje chest an, pe setime edizion, si fasarà la manifestazion Note nei roccoli, cun concierts tai cuatri rocui che a son a Montenârs, che fra chei al è ancje chel di pre Checo Placerean. La manifestazion e je organizade dal Ecomuseu des aghis dal Glemonàs, che al à creât percors par visitâju, cualchi volte ancje vuidâts. La manifestazion e je tacade in Jugn, cun altris apontaments ai 16 di Lui, ai 27 di Avost, e si sierarà ai 10 di Setembar tal “rocul dal puestin”.
UN LIBRI DI “ARCHITETURE VERDE”
Par savê di plui sui rocui che a son ca di nô, si pues cuistâ la vuide La verde attrazione. Guida alle architetture del verde: uccellande storiche in Friuli, par cure di Mabel Englaro e dal Ent Regjonâl Patrimoni Culturâl – ERPAC, publicade di Gangemi. Buride fûr intal 2019, si le pues cjatâ ancjemò tes librariis, on line o tal sît dal editôr. La vuide e met dongje testemoneancis di personis e comunitâts, e e furnìs indicazions par rivâ a pît o in mountain bike, lant par percors facii inte nature, mostrâts di cjartinis topografichis. ❚
………………………………………………………
LINK & LEAMS
Si pues informâsi su tantis iniziativis pal ambient tal sît dal Ispra, l’Istitût Superiôr pe Protezion e la Ricercje Ambientâl: www.isprambiente.gov.it/it. Par vê informazions sui rocui di Montenârs, e ancje par visitâju, lait sul sît dal Ecomuseu des aghis dal Glemonàs www.ecomuseodelleacque.it. ❚
