IL FERÂL. O alci i miei voi viers lis montagnis

O presentìn un fruçon di un librut che o vevin ciclostilât tal 2000 in ocasion dal “Convegno sui problemi della montagna” che la glesie di Udin e veve organizât. Il librut al vignarà publicât integralmentri tal contest de “Opera omnia”. Ancje in chestis riis si cerce dute la passion, l’afiet, il leam strent che pre Antoni al veve cu la mont. E ancje il so malstâ e marum a viodi chest teritori, cussì siôr di storie, di vite e di civiltât, bandonât tradît e lassât murî di bande di dutis lis istituzions.
pre Roman Michelotti
…O vuei tornâ spirtualmentri, pelegrin e penitent, in chês valadis, in chês pradariis, in chês monts, lis monts parsore Davai, in Tarlesse e in Suèlies e in Primant, là che il cjant dai uciei e il baiâ dai cjans al jere compagnât dal batit regolâr e armonic dal falcet su la batadorie e la int si clamave di un prât al altri. Al è lassù che o ai sintût, di frut, i prins scriui di stali in stali, di mont in mont, biel che la gnot e invuluçave dolce e malinconiche ogni robe e i cristians si preparavin a distirâ i vues madûrs par jessi pronts tornâ a frontâ la fadie al prin cricâ da l’albe.
Cumò chel mont, il nestri mont, al è finît o al è in penose angunie e il cjant dai cristians e dai lûcs e des robis al è cessât o si è trasformât in lament. Intal vanzeli al è scrit che ancje i claps a puedin berlâ (Lc 19,40). E i claps, lis pedradis, lis cjasis, lis stalis, lis glesiis, i cimitieris, i prâts, i boscs, lis monts, dut un mont e dut il mont de Cjargne e di chês altris parts di mont, tant di ca che di là da la aghe, lis valadis de Tôr e dal Natison a berlin cence peraulis, cence vôs, cu la vôs dai fats, il tradiment, il sassinament, il gjenocidi, la distruzion economiche, sociâl e culturâl operade in progression sistematiche dal stât talian, de ditature fassiste, dal regjim democristian, dai partîts di ogni colôr e savôr, de regjon autonome.
Vêso presint “Il berli” di Munch, chel frut che al berle tal mieç de strade cun tante disperazion che no ven fûr nissune vôs? Il berli che o stin fevelant nol è il berli angossiant, intolerabil, di une persone sole, ma un berli corâl, di ducj i fruts des monts, e dai viei, e de int che e je muarte di tribulazion, e di chei che a àn scugnût partî cul cûr sanganant. E nol è dome il berli de int ma il berli di dute la nature, cjapade dentri te ruvine dal om e comprometude insieme cun lui tune spirâl mortâl.
In cheste ore di Vinars sant pes nestris comunitâts di mont, no si pues no ripeti l’improperi che la liturgjie e dopre passion dal Signôr: “Popul gno, ce ti àno fat? Cuant ti àno maltratât? Rispuindimi!”.
Se mi soi fermât di plui su la Cjargne al è dome pal fat che le cognòs di plui, ma il tradiment al è stât gjenerâl. E la tristerie dai oms, di ogni sisteme e struture, si è sbrocade cun plui violence e prevaricazion sun chês valadis e monts là che e viveve une int di tradizion culturâl e lenghistiche milenarie ma diferente. Ce che no àn fat cuintri de identitât culturâl e religjose de int des Valadis dal Natison e des Valadis de Tôr e ancje de Valcjanâl! E biel che il gnûf stât, cu la ignorance dai prepotents o cu la prepotence dai ignorants, al tacave la sô campagne selerade di svinidriment di ogni forme e olme di slavitât par puartâ la civiltât fatâl di Rome, la glesie, o miôr la struture gleseastiche cui vescui e la curie in teste, e à fate la sielte piês che e podeve fâ: impen di metisi denant des pioris come il bon pastôr par parâlis o murî cun lôr, si è metude come i mercenaris de bande dai lôfs, vendint la int e i lôr pastôrs, i predis, par trente denârs. Cu la diference che Gjude al à vude la idee, disperade ma corete, di lâ a picjâsi; Pieri al à vude la furtune dal pintiment; la curie di Udin no si è ni picjade ni pintude ma e continue a fâ predicjis, a pontificâ, a progjetâ, a fâ di mestre come se nol fos sucedût propit nuie. Adiriture si permet di inmaneâ cunvignis par salvâ la part plui cjare e esposte dal cuarp eclesiâl, che jê e à judât a fiscâle cuntune insensibilitât e une politiche compagne edentiche a chê dal stât.
pre Antoni Beline
Gjavât di: Antoni Beline, O alci i miei voi viers lis montagnis, cip. Glesie Furlane, 2000