A vegnin fûr dal Jurassic, ma il lôr cei al è chel di chescj agns: moderni e bruntulot. Veju chi i Gnognosaurs, simpatichis besteatis preistorichis intes miôr storiis saltadis fûr dal lapis di Dree Venier, ilustradôr, animadôr, gjornalist furlan, imberdeâsi a cjatâ fûr un bon regâl di Nadâl o la miôr diete par Bombo, il gras Brontosaur vert, o ancjemò inventâsi la vendeme, cence però ben savê ce folâ, miluçs o claps par lôr al è chel istès.
CHESTE E JE LA PRIME RACUELTE_Nassûts tra il 1995 e il 1996, i Gnognosaurs a son diventâts di bot une simpatiche presince su calendaris e strichis in marilenghe, sburtant grancj e frutins a doprâ il furlan cence pôre. In chest librut duncje, jessût tal Novembar dal 2009 pe Omino Rosso Edizioni di Pordenon, si puedin cjatâ lis origjinis dai Gnognosaurs, cognossi la lôr strambe anatomie tacant dal bulo Martin il Triceratopi, Bombo il grues e gras Brontosaur, Momo il Saur (che pardabon al mi somee un stropul), Cicci la morose di Momo, Einsaur il prof, Rugne il Brontosaur gnogno. Ma no son ducj achì e a voaltris il gust di discuvierziju, leint lis strichis di Dree.
MIEÇ IDEÂL PAR IMAPRÂ LA LENGHE_Il mieç de striche par furlan al è un biel sisteme par dâ une man ae marilenghe a difondisi ator, rivant là che par solit il furlan si lu dopre dome tes fiestis di paîs, cui amîs e cence vê ben clare la grafie. Un sisteme bielzà doprât cu lis aventuris di Tarvos, il fumut scrit e dissegnât di Sandri di Suald trente agns indaûr, che a metevin ligrie e a davin une man a cognossi la storie dal Friûl lant daûr a di chel frutin biont e sec come un racli. Tal câs dai Gnognosaurs il stîl al è clarementri e justementri diferent, ma si sa che il gust dal om pai fumuts e pes figurinis nol gambie mai, brincant nonos, mamis e barbis, cence cjalâ in muse nissun. Lis storiis dai Gnognosaurs, senegjadis di un pâr di agns cul jutori di Elisabetta Pittana e cul contribût di Alessandro Carrozzo, Elisabetta Pozzetto e Erika Adami pa grafie, no son dutis chi dentri, ma chestis trê, plui la zonte de “Gnognoanatomie” e da “Lis origjinis” a mostrin il tîr des besteatis preistorichis, simpatic e iriverent. Lis barufis tra Gnognosaurs par vê un biel regâl, e no la solite golarine o pene stilografiche, e po dopo la fadie di Bombo par smagrî o lis invenzions futuristichis dal prof Einsaur si lein cun gust e pocje fadie, imparant ancje a doprâ la lenghe furlane.
Renzo Brollo
