Un tierç dai zovins vuê in Italie si declare ateu. Ma cuale ise la divinitât
che no cirin – o no cjatin?
Il Post teisim mi pon tune riflession moderne li che mi domandi: il Diu tramandât de culture patriarcjâl aial ancjemò un sens, un significât, o isal aromai un Diu vecjo di poiâ fra lis ratatuiis inutilis sul cjast?
Une cuistion, ancje cheste, aromai superade: te nestre societât ocidentâl che Diu al sedi o nol sedi, si vîf in pratiche come se nol fos.
◆ Di fat, si lei su la Vite Catoliche dai 12 di Lui di chest an che: “Il 31% dai zovins tra i 18 e i 30 agns vuê in Italie si declare ateu”, e li a tetin ancje lis gnovis gjenerazions furlanis; a son di zontâ lis percentuâls di chês altris etâts.
Personalmentri, prime di acetâ chescj verdets, mi fermarès un moment cul cardinâl Carlo Maria Martini. Lui al diseve che no si à di dividi la int fra chei che a crodin e chei che no crodin, ma fra chei che a pensin e chei che no pensin, savint che chei che a pensin a restin simpri un gruput scjars sedi fra chei che a disin di crodi come fra chei che a disin di no crodi.
◆ Se chest al è vêr, la domande tal nestri câs no si ferme al “Diu isal: sì o no”, ma “trop la int di vuê rivie a pensâ in profonditât o no”.
Al spiegave za Blaise Pascal, matematic, fisic, filosof dal secul XVII che la domande su la esistence di Diu e je inutile parcè che ni la matematiche, ni la sience, ni la tecniche, ni la filosofie, ni, si podarès zontâ vuê, la inteligjence artificiâl a son in stât di dâ une rispueste provade.
◆ Masse limitadis, insiguris e tun continui mudâ.
In cheste situazion, al continuarès Pascal, par variis motivazions al è resonevul scometi che Diu al esist. Mi va ben; però, a interompin i post teiscj, ise valide la imagjin di Diu che nus è stade tramandade fin cumò?
◆ E je une domande legjitime e che e merte grant rispiet.
Lôr a contindin: il Diu de tradizion, maschilist, di gjenar, patriarcjâl, onipotent fra potents, Diu di danâts e di miracui, nol à sens, e la prove e je che in tancj secui nol à risolt ni dolôr, ni miserie, ni violence, ni vuere. In cussience, tocje cancelâ dal dut cheste forme di divinitât e avodâsi a un Diu diferent.
◆ Cun cheste teorie, vignint al Friûl e ai Furlans, il Diu di Aquilee, di Cromazi, dal patriarcje Bertrant, dai martars e dal lôr sanc, di sant Scrosop pari des derelitis di Udin, di predis che a àn dade la lôr vite, dai nestris vons che tant a àn crodût e preât, al è fûr di plomp e al à fat il so timp. O vin di lâ viers un Diu gnûf – a continuin i post teiscj – che no si rivele in cheste o in chê altre religjon ma che al è dentri de sostance dal univiers intîr e che te/de nature al guvierne dut. O podaressin dî: une inteligjence naturâl infinide o ancje un amôr che in energjie si disfâs e che si pant te evoluzion dal univiers e tal passâ dai miliarts dai agns; un Diu che al è in dut ma cence dialic storic, cence relazion personâl o passion pe nestre umanitât, come che nol fevelàs: un anonim, forest a lis vicendis e ae vite.
◆ La uniche pussibilitât di metisi in contat cun lui e je tal vivi in armonie cu la creazion: cheste e je ancje la etiche supreme e il sens de esistence.
◆ Forsit o ai semplificât un ninin masse; ciert, però, chest al è il pont che mi distache dai post teiscj. Lôr a àn un Diu energjie come chê dal soreli che al sclipìs e al da vite ma nol sa se o esist; jo invezit mi met de bande dai milions di puars che vuê a àn dibisugne di un Diu dongje, compagn di strade, che si sbasse, al scolte, al consee, al da coragjo, al da un sens e soredut une liberazion ai cence tiere, cence carantans, cence justizie, cence sperance. O ai dibisugne dal Diu dal Esodi de Bibie che al dîs: O ai viodût, o ai propit viodût la miserie dal gno popul in Egjit. O ai sintût trop che a berlin denant di chei che ju tegnin sot,o sai dute la lôr streme. O soi vignût jù par gjavâju des mans dai Egjizians (Esodi 3, 7-8). O stoi cul Diu che al à tignût sù i nestris vecjos tes lôr miseriis e disgraciis cence fin, e che ancje vuê al ven invocât di milions di lôr: dispatriâts, diseredâts, violentâts – ju viodìn ogni dì par television – bandonâts di ducj, che – tancj o pôcs no lu sai – a puedin dî par esperience: Se il Signôr nol fos stât de nestre bande cuant che i oms nus plombavin cuintri, nus varessin glotûts vîfs. Benedet seial il Signôr che no nus à lassâts che o colassin tes lôr gramulis. (Sal 124).
Ve, o bandoni il Diu splendit de filosofie dai post teiscj e mi met cul Diu dai puars di Jesù di Nazaret, il Diu des beatitudins: lui al à la briscule che e delibere, al da respîr e dignitât ae vite di ognidun, scomençant dai ultins. Se o colaborìn.
Al è li il gno puest.
◆ O stoi ancje cul Diu de Bibie cuant che al dîs: Tu ur fevelarâs cussì ai Israelitis: il Signôr, il Diu dai vuestris vons, il Diu di Abram, il Diu di Isac, il Diu di Jacop, mi à mandât di voaltris. Chest al è il gno non par in eterni (Es 3, 15).
Cuant che o dîs il Diu dai nestris paris no intint chel dai teolics o de storie de teologjie. Di fat, cuant che mê mari mi visave “Mai smeti di preâ”, e pandeve une sô esperience spirituâl che le faseve concludi “Al è ben preâ simpri”. O ai dibisugne de esperience storiche dal gno popul sul misteri di Diu, parcè che a son li lis lidrîs profondis dal gno DNA di vuê. Al scrîf pape Francesc: “Chel che al distrûç la storie dal to popul, la ricjece spirituâl e umane che e je stade tramandade midiant di gjenerazions, al smicje a svuedâti di te par imponiti il Diu che lui al à sielzût par te” (Cfr. Fratelli tutti, n. 13-14).
◆ Ve, sclarît chest, o soi dacuardi ancje cui post teiscj tal purificâ ciertis caricaturis di un Diu maschilist, di podê… che nus son stadis tramandadis. O vin di tornâ a cjatâ un Diu biel, uman, atuâl, no energjie ma persone che mi meti in armonie cu la tiere e che mi fasi fradi universâl di ducj; che al dedi sens e gust ae mê vite.
Al è ce che o auguri a me stes, a voaltris e a la nestre int. ❚
