Animadôrs di comunitât e invistiments a puedin judâ une vore economie e turisim

Lis oportunitâts des areis di mont a son tantis. Se o pensìn dome al teme de energjie, dute la mont furlane, e sarès a cheste ore – in plui che siore – ancje abitade di tantis personis che si cjataressin a paiâ mancul cjaris lis boletis. Ma e je lade cussì, e intai agns ’50 i furbats si son comprâts i teritoris e il consens des comunitâts “cuntun toc di pan e formadi”.
◆ Il distanziament sociâl che vuê al rapresente une evoluzion, risultât dal individualisim discjadenât che si sin adatâts, al tocje dal sigûr ancje i teritoris di mont che a vivevin e che a cjapavin la lôr fuarce, invezit, de comunitât e de condivision des faturis, e des spietis intun futûr miôr. I ultins dâts de Caritas di Udin nus contin di acès cressints di personis di disevot agns e di over 65 che a cjapin sù une insignificance sociâl che lis rêts in aree di mont a podaressin intercetâ, se vuidadis ben e coordenadis di animadôrs di comunitât formâts. La cualitât dal ambient, che al cengle lis areis di mont, e podarà dal sigûr favorî une impostazion olistiche e rigjenerante. E lis personis post pension a son chês che, ancjemò in salût, a puedin esercitâ une funzion sociâl impuartante cun azions di volontariât che a cualifichin il lôr timp libar e che a insiorin la comunitât là che a vivin. Se al è vêr, e al è vêr, che ae mont si ricognossin tantis risorsis, il dispopolament al varès di significâ une oportunitât straordenarie par cui che lis vûl cjapâ sù. Ma a coventin voi diviers, al è clâr, di chei che cumò le cjalin o che le àn cjalade intal passât resint. Masse dispès lis gjenerazions zovinis – in particolâr chês che a àn bandonât lis areis internis – a patissin pe mancjance di spazis di divertiment e di agregazion e duncje a son puartadis a calcolâ chescj lûcs inadats pal lôr progjet di vite futûr, gjavant il fat che dopo a cjatin chei stes spazis plens di oportunitâts inesploradis. Si à di incidi su chescj “tornâ dongje”, e stimolâju; e ancje chês figuris, tant interessantis, che di difûr a àn visions no condizionadis dai elements negatîfs descrits ca parsore. Chest al podarà dal sigûr incoragjâ il tornâ a stâ in chescj lûcs in maniere sostignibile. No podìn plui pensâ a une concentrazion di ativitâts umanis e animâls come che le vin cognossude dome cent agns indaûr. E duncje, ativitâts produtivis di ecelence (o di nicje), insiemi cuntune gjestion corete des risorsis (aghe, grave, len) si puedin integrâ cu la ativitât turistiche, cu la tutele ambientâl e cul disvilup di microeconomiis integrativis. Se o pensìn dome al mont dal lavôr che al è cambiât a pet dai agns 70/80 – cuant che la int di mont e à sielzût in toto il lavôr des fabrichis jù in val, dedicant la energjie totâl a chestis ativitâts, in cierts câs tant fadiosis – cumò, la riduzion dal orari di lavôr, la precarizazion, lis variis turnistichis, a permetin di vê timp libar che al pues jessi doprât, par esempli, intes ativitâts cooperativistichis di comunitât, che a van incentivadis. Lis potenzialitâts a son, a àn dome di jessi vuidadis (supuart al inviament di imprese, formazion, tutorament… che nol vûl dî ancjemò cunvignis e analisi… e je ore di concretizâ cognossincis che o vin za) e in minime part incentivadis. Un aspiet impuartant lu à dut il teme dal patrimoni edilizi e de disponibilitât di lozaments che a àn di jessi a disposizion par un prin svicinament. In mont no si cjatin cjasis a fit e tancj zovins no puedin permetisi di “sperimentâ” il futûr ipotetic di mont partint za di un invistiment impuartant par comprâ une cjase. Oportunitâts che “te Basse” si cjatin a bon presit! Chest al è il rûl de politiche: de buine politiche. Se al è vêr che lis tieris dispopoladis a àn un interès pardabon scjars di un pont di viste eletorâl, al è ancje vêr che par contentâ lis spietis di chescj teritoris no coventin risorsis esorbitantis (la sole realizazion de ovovie di Triest e podarès rapresentâ un plan di disvilup locâl par dut il teritori di mont dal Friûl ocidentâl). A son sieltis. ❚