I LaipNessLess si stan za preparant a butâ fûr il lôr prossim album, e intant chest Istat a àn puartât ator pal Friûl il lôr ultin lavôr
Si stan za preparant a butâ fûr il lôr prossim album, e intant chest Istat a àn puartât ator pal Friûl il lôr ultin album.
A vegnin sù de Basse cui barcjons, a son sporcs, triscj, bruts e blasfems, faunis de malelenghe, satirics e satirs dal politichementri scoret come uniche vie di libertât di pinsîr… Vêso za induvinât di cui che o fevelìn?
◆ O vin za scrit un toc su di lôr tal 2016, cuant che a àn publicât il prin album “Bestiis forestis”. Lis bestiis in cuistion a son i LaipNessLess de Basse furlane, plui di precîs tra il Cormôr e il Stele, tal paîs di Muçane. La formazion e je la solite: al cuintribàs Davide Sciacchitano, ae ghitare Jacopo Casadio, e ae vôs Rudy Citossi.
◆ Tal Dicembar dal 2019 a àn fat jessî il lôr “tierç” album, dal titul “Cormôrra”.
A partî dal prin album dal titul “Bestiis Forestis”, che al fevele dai temis come l’alien di Mortean, la nutrie, l’aligatôr de lagune di Maran e altris bestiis forestis, a àn decidût di saltâ il secont album – che si sa che al e il plui dificil par ogni grup – e par chest a àn publicât il lôr tierç album: “Cormôrra”.
“Cormôrra” al è un lavôr che al fevele di criminalitât, omicidis e crimins feroçs.
◆ I artiscj nus traspuartin tal mont de Basse furlane, tiere di malevite e abûs di ogni gjenar. “Cormôrra” al e un curtìs strent tra i dincj, par spietâ la prede, une pistole che si incugne tal mieç di une rapine e storiis finidis mâl.
I LaipNessLess a mut lôr a rapresentin une part de nestre societât, a contin in mût dissacrant, iriverent, ma ancje satiric lis storiis de vite che la int no viôt, o forsit no vûl viodi.
◆ Alore fasìnsi traspuartâ imbavaiâts tal baûl di une Alfa 2000 intun viaç ae scuvierte de Mafie dal Cormôr. Un dai tocs plui preseât dal album e je la cjançon “A je dute colpe di Bob Marley”. «E je dute colpe di Bob Marley se nô cjavelons o sin discriminâts» cussì a scomencin i LaipNessLees contant de lôr cjançon. Une cjançon che e je un berli di bataie cuintri di ducj i stereotips. Cul ritmi che al misclice il reggae des origjins e la lenghe furlane, a plui di cincuante agns di distance dal toc dai Nomadi “Come potete giudicar per i capelli che portiam”, si fevele ancjemò di discriminazion dal om che al à i cjavei luncs e de femine cui cjavei curts.
◆ “A je dute colpe di Bob Marley se i polizai pa le strade mi fermin, se i gavanei di fumâ mi domandin, se ducj i neris dal mont a mi saludin e lui lu sa che e je dute colpe sô…”
Duncje no stait a fâ batudis su la cjavelade dai oms cui “dreadlocks” o cui cjavei luncs. E soredut, no stait a fa batudis al Citòs.
◆ Cormôrra al à dentri in dut undis tocs, cun titui che za us lassin capî di ce che a contin: “Uh chi beddu casteddu a Udine”, “ih ih ih”, “complotiscj”, “fighets”, “Gjino e el zîr dal mont in trebie”, “kabobo”, “el sicari dal inps”, “oi Mariute Mariute”, “Udine spara…Muzzana risponde!”, “Al diminutivo”. Cun ritmis punk folk, batudis caustichis e umôr neri, il grup plui politichementri scoret dal Friûl nus fas rifleti su dut chel che no vin voie di pensâ.
◆ «A fuarce di pestâsi, incjocâsi, discuti, mangjâ, bevi e sunâ pôc… o stin tacant a meti adun il gnûf album. Cumò come cumò o sin a 2 tocs finûts e altris 3 biei che imbastîts. Chest Autun o tornìn sul album e o viodìn se si rive a lâ in studi pal Invier. Si fevelarà di:
Incuinament, robe fraide, amôr, e muart!!! Da Masini alla raffineria, da Betlemme al Gange!».
Sul lôr sît e te lôr pagjine Facebook a àn za proclamade la jessude dal lôr prossim album. Di fat il cuint – parcè che il cuart lu saltin come il secont – cuntun titul che salacor al sarà “Putridambur”. Preparìnsi ancje nô a chest album psichedelic. Par fâus gole, lait a viodi fotos, messaçs e videos su lis lôr pagjinis uficiâls: http://laipnessless.blogspot.com/ e pal moment scoltìnsi l’album “Cormôrra”, e lait a sintîju dulà che chestis “bestiis” a àn il lôr côf: tes miôr ostariis e frascjis daûr cjase. ❚
