La rievocazion e clame dongje cinccent revocadôrs cun vistîts e armis storichis
che a vegnin di dute Italie e de Europe
Dal prin ai 3 di Setembar dal 2023 e je tornade a Palme la plui grande rievocazion storiche napoleoniche organizade in Italie, e ancje une des plui impuartantis in regjon, o ben “Palme aes armis – 1809 l’assedi”.
◆ Di fat, dal 2019 indenant, la citât stelade furlane e da acet a chest event che al ven celebrât un an sì e un no, alternantsi cu la tant plui datade (scomençade tra il 1974 e il 1975) Rievocazion rinassimentâl che e ripuarte ae lûs massime il secul dal Sîscent.
◆ Chest an “Palme aes armis-1809 l’assedi”, di là di ufrî la animazion di cuasi cinccent revocadôrs cun vistîts e armis storichis che a vegnin di dute Italie e de Europe, e je stade inricjide di un element gnûf: la presince de figure di Napoleon Bonaparte.
◆ Lis zornadis di sabide ai 2 e di domenie ai 3, di fat, a fasaran rivivi lis zornadis cuant che il gjenerâl francês al è stât presint in maniere fisiche inte fuartece di Palme (fat che al è sucedût pe prime volte intal 1797), e cuant che propit de fuartece al à emanât il Manifest di Palme, che cun chel al declarave vuere a Vignesie.
◆ Po dopo, Bonaparte al è tornât a Palme intal 1800, par stâ daûr ai lavôrs di costruzion des lunetis de fuartece, che vuê a son patrimoni UNESCO (come che, dal rest, dai 9 di Lui dal 2017 e je dute la citât di Palme).
◆ Chescj fats nus ilustrin cemût che la citât stelade – fondade dai venezians intal 1593 – e sedi stade completade propit sot dal domini napoleonic cu la sô tierce cente difensive e cemût che e sedi deventade la fuartece strategjiche che ancjemò vuê o podìn amirâ in dute la sô imponence.
◆ L’episodi centrâl de rievocazion al è l’assedi des trupis austriachis che al à colpît la citât intal 1809, cuant che la fuartece e je stade blocade dai austriacs dopo de ritirade de armade francese taliane bande il Tiliment e l’Adis.
◆ “Palme aes armis – 1809 l’assedi” e je cognossude par vie che e je une ricorence plene di svariâts events (i spetacui grandiôs di bataiis, lis paradis, il cjamp militâr formât di ben dusinte tendis, sfiladis, musichis e ristôrs), ma ancje pal fat che e costituìs une ocasion didatiche di aprendiment e di aprofondiment des cognossincis storichis, cemût che e dimostre la grande presince di storics e studiôs che a partecipin simpri.
◆ Tal cjamp militâr si po amirâ e imparâ la art militâr dal timp di Napoleon, scuvierzi la vite che a fasevin i uficiâi, lis trupis e la cavalarie, e plui in gjenerâl cognossi chê che si faseve par abitudin intai cjamps.
◆ A contribuî in misure plui grande ae poie economiche necessarie par davuelzi la rievocazion, al è il Comun di Palme, acompagnât di contribûts regjonâi e statâi (tal specific, dal Ministeri de Culture).
◆ Par ce che al tocje invezit la organizazion, la Pro Palma (Pro Loco locâl) si ocupe de part logjistiche, intant che la associazion “113ème Régiment di Infanterie di Ligne” (unitât militâr storiche rievocative dal reziment toscan omonim de Armade napoleoniche intai agns che il teritori dal Granducât al è stât anetût al Imperi francês) si dediche ae part militâr e al ingai dai varis grups partecipants.
◆ La partecipazion al event e il preseament de bande dal public a son cressûts in maniere graduâl, ancje se al è stât dal sigûr un moment di polse intai agns de pandemie. Intal 2022, però, Palme si è cjatade in cheste ocasion a dâ acet a ben vincj mil personis, dât impuartant che al puarte a previodi une partecipazion compagne, se no fintremai plui grande, pal 2024. ❚
