La nestre tiere e jere la plui grande produtore taliane; cumò a restin in mans nostranis dome fabrichis artesanis
Istât di auments di presits, di bissebovis e di pestefruce. Biel che si fâs la conte dai dams, in spiete di meti man al tacuin, al sarà il câs di butâle intal bevi in compagnie, tra i jesolaments e i (tancj) porcui.
◆ A cjalâ lis tamesadis tai vignâi, dut câs, al somee che al sarà di vaî ancje pal setôr vitivinicul, si che duncje, impen dal tai, miôr consolâsi cuntune bionde, o une rosse, o ancje cuntune nere.
◆ Dal rest, pal Friûl chest al somee pardabon l’an de bire, e par tantis resons diferentis, buinis e mancul.
◆ Stant che bisugne tirâsi sù, al sarà miôr tacâ cu lis gnovis positivis: in regjon si produsin simpri plui biris artesanâls, cuntun numar di impresis produtoris che in 10 agns al è passât di 19 a 37, cuntune incressite dal 95%. Clare, al è un setôr di nicje, che dut câs al da lavôr a passe 170 personis, massime zovins, che si svicinin e si passionin a cheste realtât. In gracie de formazion specifiche (i prins cors a son stâts inviâts de Universitât dal Friûl) e de rêt che si è creade tra i produtôrs, la cualitât de bire furlane e je simpri plui alte, cemût che a puedin confermâ ancje i ricognossiments, talians e forescj, che i nestris birârs si menin cjase. Chest an, par esempli, ae fiere di Rimini, su 2.227 propuestis di 305 produtôrs, Unionbirrai e à premiât trê biris nostranis (une nassude di une colaborazion tra une birarie di Tisane e une di Lignan, une di Triest e une di Foian Redipulie). Cun di plui, al concors internazionâl di prodots biologjics di Limas, in France, dôs medaiis a son ladis a une altre realtât di Cjasteons di Strade, l’unic agribirifici in Friûl a vê la dople certificazion bio e cence glutin (e ancje l’unic produtôr talian a jessi premiât chest an).
◆ La mode de bire e somee jessi sclopade dapardut e, des catidris dal Ateneu, i cors a àn cjapât pît ancje intal Istitût agrari di Puçui, li che i students dal cuint an a àn dade vite ae lôr bire, doprant l’implant produtîf de scuele.
◆ Travuarts che a rindaressin braurôs ancje Luigi Moretti, fondadôr de storiche fabriche udinese di bire innomenade in dut il mont. Chest an, par altri, al cole propit l’inovâl dai 200 agns de nassite di chest impresari furlan (la famee e jere di Gnespolêt di Listize) che, ancje in gracie dal patrimoni de femine (detai che tantis voltis al ven dismenteât), al rivà a meti sù un vêr imperi fondât suntun prodot nostran.
◆ Il so non al è tornât fûr ancje inte mostre “Trent’anni senza Moretti” (fin ae fin di Zenâr di chest an alì dal Museu etnografic dal Friûl, a Udin), che cul titul e ricuardave l’an che e cessà la produzion intai stabiliments di Udin (1992), par passâ a San Zorç di Noiâr. Li la Moretti e tignì bot fin al 1997, cuant che e vignì creade la societât “Castello di Udine”, di mût di comprâ di Heineken Italie il stabiliment de Basse furlane par inviâ une altre aventure dute furlane, la bire Castello. Magari cussì no, il leam cul teritori di cheste realtât (che fin a cualchi an indaûr e jere la plui grande produtore di bire taliane) si è sfantât pôcs dîs indaûr, cu la gnove de cession dal implant di San Zorç (cuntune capacitât produtive di un milion di etolitris di bire ad an) ai danês di Royal Unibrew (chei di “Ceres c’è”, par intindisi). La reson motivade de aziende? Une strategjie di marcjât par rinfuarçâ la marche e il stabiliment Pedavena, rilevâts intal 2006 de stesse Heineken di li che al jere tacât dut.
◆ Un colp al cûr che al rive daspò di une seconde scjassade par un altri non mitic: chel de Dormisch, bire storiche nassude intal 1881 e restade “udinese” fin al 1988, an che il stabiliment su la Ledre al sierà la produzion, lassant murî la etichete. Intal 2017, la Peroni, che e veve comprât la marche intal principi dai agns Sessante, e veve decidût di tornâ a doprâ il non Dormisch par une bire che, ancje se fate a Padue, e doprave vuardi furlan, daûr de ricete di un mestri birâr di Tresesin. Ancje in chest câs, la gjonde e je durade il timp di un cjapiel di sbrume: intal 2019 la aziende e à decidût di fermâ la produzion, copant pe seconde volte il non de Dormisch, evocât tant che une fantasime ancje des cistiernis saltadis fûr dai rudinaçs dal stabiliment di Udin, aromai pront a deventâ part di une gnove storie di cheste citât e forsit ancje l’as di une partide di briscule zuiade des gnovis fameis che a paronin la economie regjonâl.
◆ Ma cumò, lassant di bande i siôrs industriâi, tornìn a noaltris letôrs de Patrie: vierzêt il frigo e leiêt la etichete de bire che o vês in fresc. Vadie pardabon la pene di spindi chei cuatri francs al supermarcjât par un prodot che al salte fûr di une multinazionâl? O isal miôr dâi uns doi euros in plui a une aziende nostrane, che ogni dì, cun passion e sacrifici, e fronte lis disfidis de globalizazion braurose di cheste nestre tiere e di ce che e pues dânus? E cuissà che, di chei 40 produtôrs di vuê, un doman nol salti fûr un gnûf Luigi Moretti, pront a puartâ adalt il non dal nestri Friûl. ❚
::::::::::::::::::::::::::::::::::::::::::::::::::::::::::::::::
Bire Moretti… in gotis
La “Fabbrica di birra e ghiaccio” Moretti e vierç in viâl Vignesie a Udin intal 1859. Luigi Moretti al à 36 agns.
◆ La fabriche e fâs fortune bot e sclop, e dongje e ven vierte la birarie: intune gnot di Istât si rive a dâ fûr ancje 7.000 bocâi di bire.
◆ Intal 1893 Luigi Moretti, malât di cjâf (al murarà daspò doi agns), al ven interdet dal Tribunâl di Udin. Il so patrimoni al è di passe un milion di liris, e tra i bens imobii, in plui de fabriche di bire, a son ancje une buteghe di coloniâi e alcul, une salsamentarie, une fabriche di asêt e une oficine di botârs.
◆ Pe Esposizion Regjonâl dal 1903, al ven tirât sù un paveon badiâl a forme di bocâl di bire. La Moretti e vinç la medaie di aur, cun visite dal re Vittorio Emanuele III e de regjine Elena.
◆ Dai 1.066 etolitris ad an dal 1873, tal 1923 si rive a une produzion di passe 33.000 (cun polse tal ‘18 par vie dai implants fracassâts dilunc de invasion).
◆ Intal Avost dal 1924 si scree il gnûf cjamp polisportîf Moretti. Tal mês di Otubar, presint il Re, si fâs il carosel storic pai 300 agns de brigade Savoia.
◆ Il mostacjon simbul de Moretti al jere… un muc! Stant ae version di Lao Menazzi Moretti, e je une sô fotografie fate fûr di une ostarie di Tresesin a un sogjet che in cambi i domande di bevi. Par juste, e je opare di une fotografe todescje che le ricognòs intune publicitât de Moretti a Tarvis. Il dibatiment tra lis parts si siere cuntune ufierte economiche. Cui bêçs, la artiste si compre une stue. Il mostacjon, invezit, nol à mai savût di jessi deventât famôs e nol à mai viodût un boro.
◆ Tal 1988, la Moretti e devente la prime bire taliane vendude ancje tes birariis di Munic. Tal stes an, e monte ancje sul Orient Express par jessi servide ai passizîrs.
◆ A Tarcint al esist ancjemò il palaç di famee, vile Moretti, tirade sù intal 1904 su la fate dal cjistiel di Miramare. Daspò dai dams dal taramot, e je restade abandonade fin che il Comun le à comprade e metude a puest. Tra i ospits che a àn visitade cheste cjase si puedin nomenâ Arturo Malignani, Giovanni e Olinto Marinelli, Raimondo d’Aronco, Marcello Mastroianni, Alberto Sordi, Vittorio Gassman, Mario Monicelli, ma ancje, in gracie dal premi “Moretti d’oro”, Ignazio Silone, Biagio Marin, Mirko Basaldella, Giorgio Strehler e tancj altris. ❚
:::::::::::::::::::::::::::::::::::::::::::::::::::::::::::::::::::
Italie o Friûl?
Se si va a viodi il sît uficiâl de Moretti, stant ae presentazion pal marcjât talian, chê de aziende e je “une storie dute taliane”. Pecjât che cambiant marcjât (de Bulgarie ai Stâts Unîts) la vision e mude, cuntune descrizion une vore clare de storie de regjon (tal principi sot dal imperi austroongjarês) e dal passaç de distribuzion di furlane a taliane.
◆ Bire Moretti no je plui furlane di passe trente agns, ma no je nancje cuissà trop “polentone”. I stabiliments di produzion talians si cjatin a: Assemini (Sardegne), Comun Nuovo (Lombardie), Massafra (Pulie) e Pollein (Aoste).
◆ Nol è tant che la aziende e à sburtade ancje la sô Vile Moretti, par celebrâ “the italian lifestyle”. Une biele maniere par tornâ a valorizâ chê che e jere la Miramare di Tarcint? Po sì po. Vile Moretti e je sui çucs de Toscane. Une tignude cercenade di ciprès, cun pissine, visitis a Florence, cors par imparâ a fâ tortelins, ziruts in Ape e aperitîf in mongolfiere.
No sai voaltris, ma a mi mi somee che cul lâ dai agns cheste bire e vedi cjapât un savôr simpri plui mareôs… che al sedi colpe dal “Italian lifestyle”? ❚
