A van sù a 141 i Comuns aderents ae Aclif
dopo de jentrade di Visc e Travês
A van sù a 141 i Comuns aderents ae Assemblee di Comunitât Linguistiche Furlane (ACLIF), nassude intal 2015 e uniche realtât istituzionâl che e da dongje lis Comunitâts dulà che e je fevelade e ricognossude la lenghe furlane. Dopo de adesion resinte di chest Istât di Cjamin di Codroip, a son rivadis cumò ae fin di Setembar chês di Visc e di Travês. In dome 8 agns, duncje, il numar al è cuasi triplicât, viodût che tal moment de costituzion i Comuns membris a jerin une cincuantine. Di ricuardâ cemût che i Comuns membris a sedin distribuîts sui teritoris des ex provinciis di Gurize, Pordenon e Udin, plui doi intal vicin Venit dulà che si fevele par tradizion il furlan, tant che par esempli Sant Michêl dal Tiliment e Tei.
◆ “O din il benvignût a chescj Comuns che a àn aderît di resint. Cheste cressite – al marche il president de Assemblee Daniele Sergon, sindic di Caprive – e ven dal fat che 141 conseis comunâi a àn deliberât in maniere volontarie la adesion ae Assemblee. Fâ part de ACLIF e je duncje une libare sielte, une decision che e nas e che e cres dal bas. O pensi che chest al sedi un element cetant impuartant di ricuardâ, stant che al jude a capî subit cemût che la nestre ativitât e partissi di un interès vîf de bande des singulis realtâts furlanis”.
◆ Ativitâts che midiant di divers progjets (cunvignis e cors di formazion pai ents locâi, scambis di esperiencis cun chês altris minorancis linguistichis di Italie, iniziativis par judâ i Comuns a slargjâ l’ûs de lenghe furlane e la cognossince de culture, poie a programs radiotelevisîfs) a pontin al obietîf de unitât identitarie. “Unitât che e je ae fonde dal mandât tacât in Jugn cu la mê presidence – al zonte Sergon – ma che nol è di intindi in maniere monolitiche, anzit. Mi plâs simpri vê iniment, intes mês visitis ai Comuns aderents, cemût che il Friûl al sedi un unic grant mosaic formât di tantis tessaris, come che tantis a son lis diviersis sfumaduris de lenghe furlane e il mût di vivi cheste culture de bande dai furlans stes. Sfumaduris che a van valorizadis e acetadis, cence “barieris” in jentrade, de Livence al Timau”.
◆ Un altri element significatîf inte azion dal ACLIF al è chel de difese de specialitât regjonâl. “Che – al siere il president – e passe propit traviers la tutele e valorizazion des cuatri lenghis uficiâls dal Friûl-Vignesie Julie, ricognossudis ancje de Union europeane: talian, sloven, todesc e furlan. Cu lis nestris iniziativis o volìn rindi simpri plui cussiente la societât dal fat che la presince e tutele di chestis lenghis no je dome une ricjece culturâl ma ancje un mût di mantignî il status di Regjon autonome: cence di chel, il futûr de nestre tiere al sarès dal sigûr plui puar in ducj i sens. O vin di fâ jentrâ intal Dna de nestre Comunitât regjonâl a ducj i nivei la cussience che o sin unics e speciâi intal mont pe nestre multiculturalitât”.
◆ I Comuns aderents ae ACLIF a son Dael, Damâr, Aquilee, Darbe, Darte, Dartigne, Davian, Basilian, Bertiûl, Bicinins, Buri, Cjamin di Codroip, Cjampfuarmit, Cjamplunc Tapoian, Caprive, Cjarlins, Cjasarse, Cjassà, Cjistielgnûf, Cjasteons di Strade, Cjavàs, Cjavaç, Çurçuvint, Çarvignan, Cjopris Viscon, Scluse, Claut, Clausêt, Codroip, Colorêt di Montalban, Comelians, Cordovât, Cormons, Cuar di Rosacis, Cosean, Dignan, Dogne, Dolegne, Feagne, Fane, Fare, Flumisel Vile Visentine, Flaiban, Forgjarie, For di Avoltri, For Disot, Frisanc, Glemone, Gonârs, Gurize, Gardiscje, Lauc, Listize, Lignan, Maian, Manià, Marian, Martignà, Migjee, Midun, Merêt di Tombe, Mueç, Muimans, Monfalcon, Montenârs, Morâr, Morsan des ocjis, Mortean, Morùs, Mosse, Muçane, Osôf, Davâr, Pagnà, Palaçûl, Palme, Paluce, Pasian di Prât, Paulâr, Pavie, Pontebe, Porpêt, Paulêt, Puçui, Prissinins, Premariâs, Prepot, Ruvigne, Raviei, Reane dal Roiâl, Remanzâs, Resiute, Rigulât, Rivis Darcjan, Rivignan Teôr, Romans, Roncjis, Rude, Segrât, San Denêl, San Zorç de Richinvelde, San Zorç di Noiâr, San Zuan dal Nadison, San Lurinç dal Lusinç, San Martin di Voleson, Sant Michêl dal Tiliment, San Quarin, San Vît dal Tiliment, San Vît de Tor, San Vît di Feagne, Sauris, Sedean, Secuals, Siest, Spilimberc, Talmassons, Tarcint, Tarvis, Tavagnà, Tei, Tierç, Tumieç, Tor di Zuin, Tramonç Disore, Tramonç Disot, Trasaghis, Travês, Trep Liussûl, Trep Grant, Tresesin, Udin, Voleson Darzin, Vildivar, Vençon, Verzegnis, Vile di Cjargne, Vilès, Visc, Vît, Çopule, Zui. ❚
