Elda è salita alle malghe. Cuant che la storie e torne a misure di om (o di femine)

Cemût si contie la Storie? Chê “dal esse maiuscul”, dai libris di scuele, des grandis bataiis. La storie cui events fats sù ator di une schirie di datis impiradis su la linie dal timp, cu la lôr secuence infalibile e obietive di causis e di parcês. Le vin imparade cussì, come une entitât superiôr cul glotidôr pront a parâsi jù il destin dai oms, fale che no sedin concuistadôrs o princips, in stât di plantâ lis sgrifis e incidi il lôr non intun cjantonut des tantis pleis de piel dal mostri. Un insiemi di vicendis che par fuarce di robis la nestre nature umane e à cirût di ordenâ intune division di fuarcis propiziis e di altris negativis, obleant a une separazion tra il ben e il mâl ancje li che lis cuistions a risultavin torgulis e pôc claris, tant che i scombatiments al confin. Ae fin, si sa, il just lu decidin simpri i vincidôrs.
◆ Cemût contâ, inalore, la storie di chei che a àn pierdût, o ancjemò miôr, di chei che si son pierdûts? Chei che a àn pierdude la vite, chei che a àn pierdude la muse, chei che a àn pierdût i riferiments dal dret e dal stuart intune ete clopadice che e obleave i oms a scrufuiâsi sot dal fîl spinât e lis feminis a pleâsi sot de cjame des faturis. Cemût si contial il pês di une decision che e puarte a stâ di chê altre bande?
◆ E je la riflession che e nas di “Guance bianche e rosse. Elda è salita alle malghe”, un spetacul teatrâl di Elisa Menon di Fierascena che par une ore al inclaude il spetatôr ae cjadree de sale e lu oblee a fâsi domandis, a resonâ su lis olmis dai oms vie pal conflit, intun timp sospindût tra “il spazi de Storie e chel de memorie, tra i fats e l’at dal ricuardâ”. La vite di Elda Turchetti, “pericolose spie dai todescs” (come che le segnalarin a Radio Londre) vie pe seconde vuere mondiâl e uniche femine cjapade dentri intal maçalizi di Porçûs, si disglagne cussì a planc a planc de macete par fâsi sù tal grant glimuç dai avigniments belics, tant che un fîl di coton che a un ciert pont al scjampe dai dêts, al piert la strade, si imberdee, si ingrope e, ae fin, si romp.
◆ La ricercje, finanziade di un bant regjonâl, e judade de consulence di storics tant che il professôr Paolo Strazzolini, e je deventade ancje une publicazion. Un librut che al ten dentri il copion creât de atore, sburtade di une vicende di famee ma soredut de dibisugne di dâi une filusumie ancje a cui che al stave de bande falade. Un test delicât, cuasi poetic, ma che tal stes timp al sbroche intune energjie che e poche lis nestris cussiencis par fânus alçâ sù i voi a cirî une frute cence savê e cence colpis, sentade suntun scjalin, cui voi plantâts tai nestris, a domandânus il sens di une olme di ca o di là dai confins de storie.
◆ Ma, come che e dîs la stesse Elisa Menon, forsit cirint un confront cul nono, ancje lui intun ciert sens vitime di chê gnot maledide sù a Porçûs, il sanc al cor, chel no si ferme. Il sanc al è sanc. “No si puedin comedâ cussì lis robis, no si pues domandâ che no sedin sucedudis, si pues dome lâ indevant viers di une cicatrîs, e a coventin timp e cure par vuarî. E la cicatrîs e reste parcè che al è just ricuardâ ce che al à ofindût e ce che si à patît, e cemût che al è stât curât”.
◆ E forsit, par Elda, al è ancje vignût il moment par tornâ a meti adun i doi tocs di fîl, cusî i tocs, cirî une cicatrîs, in gracie di une azion artistiche che dal sigûr no da rispuestis, ma che nus fâs cjalâ la condane cuntune voglade diferente, e che forsit e mende ancje dal pês di une part des colpis. ❚