Il zovin pilote di Sarsêt di Martignà,
nevôt dret di Edi Orioli, al à cjamât preseâts sucès cun il kart inmaneât in cjase
S i dîs simpri che il DNA al conte une vore. Cuant che intal sanc de famee e cor la passion par une robe, facil che chê passion tu le vedis ancje tu. E, intal câs di Filippo Calligaris al è propit cussì. Furlan di Sarsêt di Martignà, imparintât cui Orioli, tant che so barbe Edi al è un dai pilotis talians plui preseâts, dispès protagonist inte mitiche “Parigi-Dakar” e no dome, il zovin al cor cuntun kart, fat con cetant inzen e passion, insiemi cun so pari Daniele. A fuarce di acelerazions e derapadis, Calligaris si è confermât intai agns come un dai pilotis plui meritevui dal panorame talian dal “motorsport”, tant che al è rivât a cori ancje a nivel european e mondiâl. Cu la lauree in inzegnarie mecaniche come pussibil travuart di concuistâ, simpri in graciis dai motôrs.
_
Filippo, il Friûl ise tiere di kart, o no?
“Si pues dî che o sin intune tiere no masse fortunade di chê bande, parcè che no vin tantis struturis par cori cui karts. Lis garis e lis manifestazions plui impuartantis si corin in Lombardie, massime inte zone di Bressie, indulà che a son pistis buinis pe ativitât. Chest an, lis provis dal campionât talian si son davuelzudis a Cremone, in Pulie e a Sarno, dongje Napoli”.
_
Ven a stâi che lis trasfiertis a son une vore lungjis.
“Tantis voltis, o fasìn ancje dîs o dodis oris sul furgon dome par lâ intal kartodrom. Si rangjìn di bessôi e, sedi di un pont di viste mentâl che fisic, al è dut une vore impegnatîf. Si partìs di Sarsêt une vore adore, aes cuatri, cinc di buinore. O vin rivât adore di vê un furgon indotât di aparâts e imprescj che o doprìn par meti adun i mieçs”.
_
Indulà puedistu alenâti in Friûl?
“No vin tantis sieltis. E je une piste sore Cividât, a San Pieri dal Nadison. Nuie altri. Par solit, o lin a Jesolo. Dut câs, pai alenaments plui impuartants si scuen simpri movisi fûr pe Italie, massime in Lombardie. L’impegn al è simpri tant e la passion e je il miôr carburant par lâ indenant”.
_
Continus de vitorie intal trofeu Trivenit.
“Cul sucès a Cividât, o vin vude la conferme de vitorie. O jeri simpri in bataie cui aversaris, in dutis lis garis. Ancje inte ultime al è stât cussì: dut câs o ai rivât a vinci, cun cetante sodisfazion”.
_
Si pues dî che tu sês un dai pôcs furlans che a corin cul kart, ise vere?
“A nivel agonistic, sì. Almancul cuntune struture professionâl daûr, che mi da la pussibilitât di cori ator pe Italie e fûr dai confins. O pensi che il fat di no vê struturis di pueste par cheste dissipline al è l’element par cjatâ fûr la reson de situazion. Cori suntun kart, come ducj i sports, al è une vore impegnatîf, sedi a nivel personâl, sedi ancje a nivel economic, parcè che lis spesis a son cetant altis. Ven a stâi che nol è facil tignî sù une stagjon interie.”
_
Cemût âstu scomençât?
“Dut al è partît par merit di gno pari Daniele. Mi à trasmetût la passion pal motorsport e pal kart in particolâr. In famee o sin simpri stâts ducj apassionâts e si pues dî che le vin intal sanc”.
_
Trop timp rivistu a dedicâ al motorsport?
O studi inzegnarie mecaniche te Universitât dal Friûl e si scuen dî che la ativitât cul kart mi puarte vie dut il timp, che tantis voltis o varès di lassâ al studi. Ven a stâi che no ai timp par nuie altri. Di un pâr di agns incà, o lavori ancje intal mont dai karts, tant che assistent mecanic a scuadris di nivel talian e internazionâl, par meti te sachete cualchi franc. La tesi di lauree sul mont dal kart? Al sarès biel scrivile: o sarès une vore preparât!
_
Di cumò indenant, cuâl isal l’obietîf dulà rivâ?
“Dal sigûr o vin voie di confermâsi e di provâ a vinci il campionât talian dal 2024. Mi plasarès cressi ancjemò, a nivel di tecniche di vuide, par jessi plui competitîf, simpri intal mont dal kart”. ❚
:::::::::::::::::::::::::::::::::::::::::::::::::::::::::::::::::::
Di campion dal trivenit di fantaçut, a vice campion talian di vuê
Filippo Calligaris al à tacât a cori cuntun kart cuant che al veve 13 agns, sburtât de passion di so pari Daniele, che lu seguìs simpri, ancje tant che tecnic e mecanic. Intal 2018 al à fat la sô prime gare e, une prove daûr di chê altre, al à rivât a vinci il Campionât dal Nordest dai amadôrs, risiervât ai pilotis di Friûl-Vignesie Julie, Venit e Trentin. Dopo di chê volte, intal 2019, al à pontât ad alt e al à decidût di competi intal campionât mondiâl di categorie, e al è stât impegnât ancje in chel European e intal Mondiâl dal 2020, corût a Lonato, in provincie di Bressie.
◆ Chest an, si è dedicât massime al campionât Trivenit e al campionât talian. Inte rassegne tricolôr al à rivât adore di rimpinâsi fin al secont puest: “Une stagjon biele dal principi – al conte Filippo –, une competizion intrigade fin tal ultin, cuintri aversaris di nivel une vore alt. Par dut l’an o soi stât ancje jo cetant svelt, sedi sul sut che sul bagnât: o soi stât content parcè che dôs des trê pistis indulà che si coreve no lis cognossevi. O vin fat ducj un biel lavôr par meti adun il mieç”.
◆ L’Interregjonâl 2023 lu à vinçût: “La esperience di dut l’an e je stade impuartante par jessi simpri competitîfs”, al comente Filippo, braurôs a plene reson dai siei risultâts. ❚
:::::::::::::::::::::::::::::::::::::::::::::::::::::::::::::::::::
Erre Esse Parolin di Padue, une societât solide par cressi ancjemò
Filippo al cor cu la scuadre Erre Esse Parolin Team di Padue. La scudarie de famee Nalon e à cjapât il zovin furlan sot de sô ale, par rivâ a concuistâ insiemi travuarts ancjemò plui impuartants.
◆ “O cognossìn Filippo di tancj agns – al conte Riccardo Nalon, par ducj Ricky, il pilote di ponte dal team Erre Esse Parolin -. Vêlu in scuadre al è simpri stât un nestri desideri e chest an o vin rivât a tirâlu dentri. O vin corût cun lui il Campionât talian e cualchi gare dal Trivenit. Par me e je lade une vore ben, parcè che sedi l’an passât, sedi chest an, o ai vinçût il tricolôr, inte categorie dal KZN Over. Intai ultins doi agns o vin fat il Campionât dal Mont e intal 2023, in Gjermanie, si sin classificâts tal cuart puest. L’impegn? Une vore! Sante scugne, la passion pal motorsport e ven daspò dal lavôr. O podìn definîsi semi professioniscj. O cumbinìn a fâ dut ce che al covente, sul kart, a 360 grâts. Cumò o pontìn a confermâ il sucès in Italie e o lin ai Mondiâi par rivâ sul podi”.
◆”Riccardo nus à passade le passion pai motôrs – al conte Sebastiano Nalon – e, di tancj agns o corìn sù e jù pe Italie e pe Europe par competi. Metude adun la associazion, cumò o puartìn indenant tancj pilotis: alenament, assistence, consulence, no dome sui motôrs, ma ancje sui diviers aspiets dal jessi pilote. Daspò di dut chest, o fasìn ancje ativitâts di marketing e sui social, parcè che, intal 2023, a son fondamentâls par lâ indenant. Dut câs, la part plui complicade e je simpri chê di meti adun il mieç pe gare de domenie. O vin une desene di pilotis: Riccardo e Filippo a son chei che a pontin ai risultâts plui impuartants, a nivel talian e internazionâl”. ❚
