Il gnûf “Come un soffio” tra modernitât e tradizion
A son cutuardis i tocs che e componin l’ultin album dal côr Vôs de Mont direzût di Marco Màiero. Si intitule “Come un soffio” e al è propit un sofli tra lis orelis e il cûr che al tocje la anime. Di là di une rileture di doi cjants de tradizion tant che “Mieli” e “Montagnutis” – il prin al vierç e il secont al siere cheste gnove produzion discografiche – dutis lis composizions a son lavôrs scrit, sedi il test che la musiche, di Marco Màiero che al dirêç la formazion corâl nassude tal 1979.
◆ Cuarante e cuatri agns di esperience ju àn puartâts a realizâ insiemi une gnove antologjie di cjants ben ispirâts, indulà che la vocalitât cence bilisiis strumentâls, dut a capele, si fâs interprete di une schirie di emozions che a riclamin la nature, indulà che la peraule e je l’element propulsîf de fantasie creative dal compositôr. Fuarte e je la mude compositive che si ten ben strente ae tradizion: no une copie fedêl di cemût che si scriveve tal secul passât, ben si intint, ma nancje une declarazion di poie aes modis contemporaniis de gnove scriture. Màiero al reste se stes cence stravolziments estetics, mantignintsi dentri de tonalitât, in favôr de clarece dal test e dal so significât, cence stravagancis sfuarçadis, pluitost elegant e ordenât, rispietôs des condotis des vôs par une maniere di cjantâ che e je l’ambit ideâl di chest “côr di autôr” furlan. Al scrîf Giovanni Acciai inte prefazion dal librut che al à dentri tantis informazions, i tescj des musichis e ancje lis traduzions di cuatri cjants furlans, in plui che une spiegazion sintetiche di ogni cjant: «Une musiche che nus interoghe. Une musiche che nus oblee a pensâ. Une musiche che, scoltantle, e disvele i sucrits plui profonts de psiche umane, scandaiade in ogni sô plee, scure e dolorose. Une musiche che, come un sofli, nus tire sù, intun lûc che no varessin mai pensât di jonzi. Une musiche cussì no je une musiche come tantis altris. E je une musiche siore di sunôrs, di ducj i ecos, di dutis lis dolcecis e di dutis lis durecis de musiche di cheste tiere e, insiemi, de musiche di un altri mont: chel dal spirt».
◆ Ben evocativis chestis peraulis, tant esaltantis, che a dan rason des intenzions di chestis poesiis in musiche indulà che clarementri la vocalitât e je parone, la sostance prime, par peraulis che – al va dit – dispès si ripetin, si reiterin, forsit par une volontât intenzionâl di marcjâ un determinât sintiment, une evidenziadure di sens e significât che intes tramis sonoris a cjapin altris sfumaduris. A son cjants che a revochin in maniere personâl i cjants di mont, come il toc “Julius” che al è un omaç a Julius Kugy, ricognossût tant che “scuvierzidôr” des Alps Juliis. Tant al ven dât ae vocazion e rievocazion dai elements de nature e des sôs bielecis, come “Violetta”, “È tornato inverno”, “Usgnot”, in plui che lis tradizionâls “Mieli” e “Montagnutis”, e “Di te”, là che il vint, il bosc, la ue, lis gneulis, la sere e un reful di primevere, a dan forme ae nostalgjie, un ricuart che al vîf di sensazions. Une atenzion speciâl le à ancje l’aspiet religjôs, come “Eloì, lemà sabactàni?”, cjant ispirât al Salm 22, ven a stâi “Pari, parcè mi âstu bandonât?”; e tal stes ambit “Nella culla c’è un Re”, ispirade al Nadâl. “In d’algò”, o ben “In cualchi lûc”, al è un omaç al univiers in dute la sô grandece, il niu che plui nus svicine ae sô cussience: la nestre umiltât. Infin, il toc che al da il non al disc, “Come un soffio”: la sperance di une gnove stagjon che il côr Vôs de Mont nus fâ respirâ insiemi dal so mestri e autôr Marco Màiero. ❚
