Il professôr furlan, dopo di une vite passade a insegnâ intes scuelis, cumò al tire dilunc cu la Comunitât dal Melograno, la Gnove Atletiche dal Friûl e il Comitât Sport, Culture e Solidarietât, simpri cuntun voli pes sôs creaturis
Cjapâ dentri intune uniche definizion Giorgio Dannisi al è dibot impussibil. Il professôr di Reane, in pension dopo vê insegnât educazion fisiche par dut il Friûl dai prins agns Setante indenant, vuê al puarte indenant cetantis ativitâts, associazions e iniziativis peadis al teritori e ae inclusion sociâl. Al è president de Comunitât dal Melograno, a Lovarie di Pradaman, une associazion che e da acet a une vore di personis che a àn bisugne di assistence, in struturis metudis sù intai agns propit dal Professôr e dai siei colaboradôrs. Ogni Istât al va ancje indenant a puartâ a Lignan il miôr de atletiche mondiâl, cence mai taiâ il so leam cu la scuele. Vuê al cjale il sucès des iniziativis dedicadis ai zovins.
_
Professôr Dannisi, di dulà vino di scomençâ a fevelâ dal so mont?
“Intal 2023 o vin fat fieste pal 25m aniversari di fondazion de Comunitât dal Melograno, in ritart di un pâr di agns par vie dal Covid. Chest an o fasìn 28 agns, parcè che e je stade metude sù intal 1998. Dut al è partît di un nucli di personis che, in chei agns, a àn vût bisugne di metisi insiemi par tirâ sù un contignidôr par includi familiârs e parincj cun disabilitât di caratar inteletîf, par ufrîur ativitâts, timp e jutori di bande di professioniscj. Dut cul pinsîr fis dal rivâ a lâ indenant cun chestis iniziativis ancje “dopo di nô”. O sin stâts fintremai pionîrs intal meti adun lis personis par fâ sisteme in chest setôr”.
_
Le reson di dut chest mateâ?
“La cundizion di disabilitât e pues lâ une vore in miôr dentri di une comunitât inclusive. O vin viodût cun cetant anticip che lâ in cheste direzion al jere positîf. Le nestre ativitât e je deventade un laboratori di sperimentazion: la leç 41 dal 1996 e à tacât a cjapâ dentri alc di ce che o fasevin. Intal 2006 la Convenzion de ONU pai dirits de disabilitât e à fissât il principi dal rispiet des personis in ducj i aspiets de vite e il principi di autonomie simpri pussibil intal propri domicili. La leç e je stade cjapade dentri in Italie intal 2009. Intal Novembar dal 2022, invezit, la gnove leç regjonâl su la disabilitât e à rigjenerât la 41/96 cun dibot dutis lis necessitâts che o vevin nô cuant che o vin fondât la Comunitât dal Melograno”.
_
Si è spindût une vore in prime persone e cui siei colaboradôrs.
“O vin simpri gjestît in autonomie i rapuarts cu lis istituzions e i Comuns, lant indenant cu lis ativitâts in graciis dal autofinanziament e dai contribûts des Aministrazions Comunâls. O vevi esperience parcè che o ai fat l’insegnant di educazion fisiche dal 1972 al 2010 e o ai cognossût une vore di associazions, personis e students che a son deventâts oms, feminis, professioniscj, paris e maris di famee. Il Meeting di Lignan, za de prime edizion intal 1990, inmaneât cu la NAF, la Gnove Atletiche dal Friûl, al va dentri di chest principi: organizâ events e manifestazions par fâsi cognossi e par tirâ incà risorsis par lâ indenant”.
_
Dibot, o vês clamât il Meeting di Atletiche “Sport e Solidarietât”.
“O sin stâts i prins intal mont a cjapâ dentri sport e disabilitât. Intal 1990, l’american Calvin Smith, campion olimpic e mondiâl, al à dit che nol veve mai corût in piste cun atletis disabii e al jere une vore content. Intal 2000 o vin organizât tal stadi di Udin la Partide dal cûr, in colaborazion cu la Associazion “Udinese per la vita”. Disevot mil personis a viodi zuiâ la Nazionâl dai cjantants, al jere ancje Zico. Dut par rivâ a vê risorsis par puartâ indenant progjets che a vevin la Associazion dal Melograno tant che pont di riferiment. Un pôc par volte, o sin rivâts a vê la suste juste, dut câs ancje cul jutori di tancj amîs. Il prin prefabricât par sotetâ lis personis de Comunitât al è stât donât dal Comun di Tresesin. Plui tart o sin rivâts a tacâ i lavôrs pe prime e preseade cjase a Lovarie, che e jere de Fondazion Muner De Giudici dal president Pauli Corubolo, screade intal 2013 e inaugurade intal 2014. E cumò, cul progjet “Abitare Possibile”, o sin daûr a meti a puest ancje le cjase dongje, dulà che lis personis cun disabilitât a podaran stâ dentri in cundizions di protezion, cul jutori di assistents e professioniscj, intune comunitât che e je une famee”.
_
Al à insegnât a scuele par 42 agns. Ce disial des peraulis dal Ministri dal Sport Andrea Abodi, che al sburte par vê plui di dôs oris par setemane di educazion fisiche?
“O dîs che al à reson! Le nestre iniziative “Dai e vai”, che e cjape dentri il sport inte scuele par meti insiemi students zovins e personis cun disabilitât, al è un progjet che al va indenant di 17 agns incà fûr dal orari scolastic. Al à cetante adesion parcè che dibot l’80 o 90% dai students di vot scuelis di Udin e provincie a lavorin intal progjet inclusîf. La scuele e je il gno mont, o ai ancje puartât indenant la riviste de NAF, un pont di riferiment par dut l’ambient sportîf, dal 1973 indenant par 42 agns. Dutis chestis iniziativis a son un imprest di comunicazion e di culture straordenari a nivel formatîf, util par fâ stâ miôr ducj”.
_
Tancj agns di lavôr, cetantis sodisfazions: il Meeting, la NAF…
“Il Meeting Sport e Solidarietât al è scomençât a Udin intal 1990, cun int come Calvin Smith, Evelyn Ashford, Michael Johnson e cumò si fâs a Lignan. Al è inte élite dal circuit mondiâl e cognossût in dut l’ambient, ancje pe presince continue di tancj atletis di nivel olimpic, par esempli i nazionâi de Gjamaiche, cun nons tant che lis campionessis Shelly Ann Fraser e Elaine Thompson. Al è un plasê puartâ in Friûl cetante nobiltât sportive. E la NAF, che cumò e stâ daûr massime ai masters, cun campions talians tant che Brunella Del Giudice e no dome, e lavore intal mont dal sport dai agns ’80 indenant. O vin vût Luca Toso, che in chei agns al jere il numar 4 dal ranking mondiâl: al à saltât 2.32m intal 1988 e al è lât aes Olimpiadis. Par un sportîf e une societât sportive, chest al è il massim”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::
La terminologjie juste in materie di disabilitât: il lavôr dal professôr par contâle simpri juste
Giorgio Dannisi al à scrit un test su la terminologjie plui juste di doprâ in materie di disabilitât, peât ae leç dal Novembar dal 2022 de Regjon Friûl-Vignesie Julie che e à ricuardât la Convenzion ONU ratificade in Italie intal 2009. L’obietîf al è stât chel di meti in clâr tantis peraulis faladis e di confermâ chês justis. Si scuen fevelâ simpri di “persone cun disabilitât” e di “persone cun bisugne di poie e supuart une vore alt”. Invezit di definî un persone “disabil grâf”, si à di clamâle “persone cun bisugne di jutori intensîf”.
◆ “Tantis voltis – al spieghe Dannisi – lis peraulis a son come pieris e, intal mont de disabilitât, a puartin confusion. Lis personis cun disabilitâts, invezit, a àn bisugne di rispiet e di dignitât come ducj”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::::::
“LA INCLUSION E JE UNE SITUAZION DI DÂ E DI VÊ, CENCE POLSE”
“O ai fat la prime gare intal 1962, alenât di Sergio Zanon e, dopo trê agns, o ai saltât cu la aste il record talian de categorie dai zovins. O soi stât carabinîr, mi soi diplomât al Isef, o ai metût sù manifestazions dapardut, ancje intes placis dai paîs furlans, par tirâ dongje personis. A scomençâ dal sport e, massime, de atletiche e dal mont de scuele, o ai simpri mateât par fâ e tirâ dentri la int. Cu la Comunitât dal Melograno o fasìn sport, culture e o curìn la solidarietât e la inclusion a 360 grâts, metint insiemi associazions, personis e cetancj colaboradôrs. Si fâs une vore di fature, dut câs o lin indenant. Il bonvivi dai ospits de Comunitât e di ducj chei che a vignaran dongje, ancje dopo di me, al è simpri la prime robe. E la inclusion e je une situazion di dâ e di vê, cence polse: dâ al è biel e util e ce che ti torne indaûr al è ancjemò plui biel.” ❚
