LA INTERVISTE. Diego Travan: De planure furlane al cîl di Dubai

Dismonte di un avion e cor a cjapâ un altri. Riunions, conferencis, progjets di valutâ, une aziende di mandâ indevant e une tasse di documents parsore de scrivanie dal studi legâl. Doi fîs, une famee. E l’impegn in politiche, in provincie a Udin. Propit li lu cjatìn.
Al à pôc timp par une fevelade: al è rivât de France cualchi ore prime, une doce a cjase e cumò une cunvigne che lu spiete. «Plasê, dut ben?», «Sì, graciis. O soi dome un pôc di corse». I lin daûr a pas svelt su pes scjalis, dentri di un coridôr. E intant lui al conte la frenesie de sôs zornadis, par scusâsi de premure. Ma al conte ridint. Al somee seren. «Ce lavôrs stressants, cemût fasial?», «Eh, la vite e va cjapade cun filosofie!». «E cuâl isal il segret…», «Fâ simpri ce che al plâs».
Rispuestis scontadis? Forsit sì. Ma lui al è l’esempli concret che la passion e fas rime cun fortune. Diego Travan, 54 agns, al à une aziende che si clame Interna e che e je une des primis dîs impresis tal mont pe furnidure «clâfs in man» di furniments pal marcjât di lus. Tant par fâus capî, al à aredât lis boutiques di Louis Vuitton e di Cartier ator par dut il mont, la nâf di crosere Carnival Dream, i hotel a 5 stelis dai plui nomenâts (Hilton, Hyatt, Sheraton,…),  yacht, ristorants, museus. E cumò i tocje ancje il prin albierc di Armani, a Dubai, tai Emirâts Arabics. Une tor di 800 metris, l’edifici plui alt dal mont e chel cun plui plans in assolût. 160 suites e 144 apartaments di lus. Dentri, dutis lis cjadreis, i mobii e i jets a son di Interna, sîs mil tocs unics.
Travan, cemût aial fat a rivâ fin a Dubai?
O ai partecipât a une gare internazionâl insieme cu lis societâts plui prestigjosis e, ae fin, al à vint il «made in Italy». Une biele sodisfazion! Ca di un pôc, a finissaran di fâ sù la tor – dentri a son plui di 14 mil operaris che a lavorin ogni dì – e dopo a començaran a mobiliâ lis cjamaris.
Garis, apalts. Ma par vinciju bisugne sei brâfs o vê il santul just?
Ator pal mont e conte la professionalitât. In Italie, invezit, no son regulis: al passe l’amì dal amì, chel che ti à fat un plasê, robis cussì.
Alore, ce che si lei sui gjornâi e je la veretât?
I conti ce che mi è sucedût a mi: tal 2008 o soi vignût a savê che te isule de Maddalena a vevin di fâ un hotel par dâur acet ai «grancj» dal G8. Alore mi soi informât e o ai scuviert che il delegât pal event al jere Guido Bertolaso, chel de Protezion Civîl. Ben, i ai inviât une propueste pe furnidure dai mobii e…pensial che cualchidun mi vedi rispuindût? O ai telefonât tai uficis di Rome ma o cjatavi simpri ocupât; o ai mandât letaris di riclam dulà che o rimarcavi di sei pardabon interessât al progjet. Ma nuie. Cidinôr totâl. Dopo un pôc, finalmentri cualchidun al rispuint al telefon e mi sint a dî che lis oparis a jerin za stadis apaltadis. Cui aial vint? Parcè? Cemût àno fatis lis selezions? Bo!
Pardut il mont e je la plui plene trasparence. Ti disin cui che al partecipe aes garis, cui che al piert e cui che al vinç. Ma in Italie al è il Far West.
Ma la colpe di cui ise? De politiche o dai imprenditôrs?
Di ducj i doi, al è clâr. Une situazion vergognose e insostignibile par ducj chei che come me a crodin te libare concorince, chê che e premie il miôr e e sburte a sei plui competitîfs.
Lui al ven de scuele di Rino Snaidero…
Sì, un mestri e il prin che al à crodût in me.
Cemût ise tacade?
Mi soi laureât in jurisprudence e specializât in dirit comerciâl internazionâl e daspò o soi lât a vore ae Snaidero. Cuant che Rino Snaidero al à volût diversificâ la produzion e vierzi une sezion dedicade al furniment par albiercs e uficis, mi à domandât di deventâ diretôr aministratîf. Ma o vevi dome 28 agns.
E alore?
O ai pensât che e jere une matetât. Ma o ai acetât. E il biel al à ancjemò di vignî, parcè che cualchi an dopo Snaidero al à decidût di concentrâsi su lis cusinis e di lassâ stâ chê altre robe. E duncje, al à sierât la sezion dulà che o lavoravi jo. Alore o ai cjapât sù il telefon e o ai clamât i clients par visâju che la colaborazion e finive, ma plui di cualchidun mi à dit «parcè no cjapistu in man tu la robe?». O  vevi 32 agns, un fi di 6 mês e l’esempli di doi gjenitôrs che par dute la vite a àn fat i «statâi», cul puest di lavôr fis.
Però si è butât!
Eh sì. Tal 1989 e je nassude «Interna». E je stade la incussience de zoventût a fâmi dî di sì: cumò che a ‘nd ai 50, no lu fasarès mai. Però, o ai di dî che o soi stât premiât de fortune parcè che propit il prin dì di lavôr o ai ricevude une comission. Un ex client, che al veve di mobiliâ un albierc dongje Milan, al à fat di dut par cirîmi. In chei agns no jerin i celulârs e insome, dopo un zîr di clamadis, al è rivât a vê il gno numar di cjase e li mi à cjatât. Fortune.
Dal 1989 a vuê a ‘nd è passade di aghe sot dai puints. Diego Travan, insieme ae femine Derna Del Stabile, al à metût in pîts un grup industriâl cuntun volum di afârs di 20 milions di euros. Te aziende a lavorin plui o mancul 50 personis tra architets, inzegnîrs e comerciâi. Ducj assunts a timp indeterminât, etât medie di 30 agns, tantis lis feminis. Une imprese «virtuâl», fate di çurviei e no di mûrs. A Tavagnà, di fat, dome si progjete. Ae realizazion i pensin i artesans furlans e venits che a colaborin cun Interna. Un indot di plui di un miâr di personis. Ancje Interna e à sintût i efiets de  crisi economiche, nus à dit Travan, ma il lavôr nol mancje. Lui al va dilunc, sù e ju pal mont.
Isal pôc a cjase?
Jo mi sint a cjase dapardut. O soi un sostenidôr dal multiculturalisim, ancje se mi sint furlan a ducj i efiets. Però un furlan moderni, dal 2000, di chei che no si sierin tra lis tradizions. Ven a stâi, bisugne savê il furlan ma ancje l’inglês.
Lui tropis lenghis fevelial?
Sîs: todesc, spagnûl, francês, inglês, talian e furlan.
Ma la sô cjase, che di mûr, dulà ise?
A Felet: le ai comprade 20 agns fa, une cjase di epoche in stîl Liberty che o ai za ristruturât un pâr di voltis.
Viodût che al comercie mobilie di lus, cuâl isal il sghiribiç plui grant che si à regalât?
Une stanzie librarie, al ultin plan. Dentri o ai cuatri mil libris, ma a puedin stânt almancul vot mil.
Imprenditôr, avocat e politic. Diego Travan, classe 1956, al è origjinari di Gradiscje sul Lusinç, un paîs de provincie di Gurize. Al è il president di Interna Holding, aziende leader a nivel mondiâl tal setôr dal furniment di lus, cun sede a Tavagnà. Ma al è ancje avocat specializât in contratualistiche internazionâl di imprese, e al à il studi legâl in vie Manin, a Udin. Tal 2007 si è butât in politiche, cul Pd. Al à sfidât, cence sucès, Pietro Fontanini (Lega Nord) te corse pe presidence de provincie di Udin e cumò al è conseîr provinciâl dal Partît Democratic e coordenadôr dal circul dal Pd di Tavagnà. «In politiche no ai grandis responsabilitâts – nus à contât –, e par cumò no mi puarte vie tant timp».
Impegn plui consistent chel de aziende che lu puarte ator pal mont a discuti cun dirigjents e manager. Interna, che e prodûs dut in Italie, e je scompartide in trê impresis specializadis: Interna Contract, Interna Collection e Logica. Dutis a parteciparan al salon dal mobil di Milan, ae metât di Avrîl. «O sarìn presints sedi in fiere, sedi – al à precisât – cuntun event fûr salon par presentâ une colezion di cinc gnovis cjamaris che o vin dissegnât pal setôr alberghîr».
Diego Travan al è maridât cun Derna Del Stabile, za insegnante di todesc a scuele e cumò impegnade in aziende. «Jê e je la creative dai doi – al à dit –, si ocupe di tecnichis di vendite e des  publichis relazions». A àn doi fîs, Federico di 22 agns e Massimiliano di 12. «Il prin lu ai gjoldût di mancul, parcè che cuant che al jere piçul jo o lavoravi tant che dirigjent di aziende e o vevi oraris pôc flessibii – nus à contât – , invezit al secont i ai cambiât i panzits e dât di mangjâ».
Une cariere brilante che no si sa fin dulà che e rivarà ancjemò. Ancje parcè che i siei siums, Diego Travan, no ju conte a di nissun. «Di solit, si dîs che a son segrets. E alore lassìnju tal scansel».
Valentina Pagani