La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”.
Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis tal libri che al met dongje 25 storiis di feminis furlanis dal dì di vuê, diferentis par etât, divignince, esperiencis formativis e professionâls, leadis de fuarce che a esprimin tal cirî di realizâsi cun tignince, e de braùre pes lôr lidrîs. L’apontament si tignarà doman, miercus ai 8 di Mai, aes 18, a Palaç Antonini-Stringher a Udin e al viodarà la partecipazion des professoressis Cristiana Compagno, docente di Economie e Gjestion des impresis ae Universitât dal Friûl, che e je stade retore, e Roberta Nunin, docente di Dirit dal Lavôr ae Universitât di Triest.
Il libri al sarà po presentât al prestigiôs Salon internazionâl dal libri di Turin sabide ai 11 di Mai, aes 13, tal stand de Regjon Friûl-Vignesie Julie, de autore Erika Adami e dal diretôr da “La Patrie dal Friûl” Walter Tomada.