Aiar di dîs di vore… a San Denêl

Al jere une volte un paisot sul finî de plane, poiât suntune culine, innomenât pal persut. Un prodot di gale! Nol jere un câs, al rivave di une tradizion secolâr. Cjo, si lavorave ben, si deve sot. Intant si partive dal purcit neri furlan, une bestie nostrane tirade sù dulintor, soredut di Feagne che e jere la “Porcopoli dal Friûl”. Tignût tal cjôt come un di famee, tirât sù a paston di patatis e di semule, spadât che lis cjars no savedin di pissin, copât te stagjon juste e infin purcitât di mans savintis. E po lis cuessis metudis sot sâl, pressadis e massazadis come che Diu al comande par butâ fûr dut il sanc. Lassadis polsâ a lunc tal camarin cui barcons in sfese che al jentràs l’aiar. Un aiarin lizêr, dolç, profumât che al rivave fresc des monts li dongje e si misturave cun chel salmastri de marine che al rivave sù dal Tiliment che i deve la umiditât juste. Une brise che e lenzeve par ben lis cuessis, e che lis faseve deventâ une scuisitece. Un lavôr mostri che però al deve risultâts bogns, tant che il persut di San Denêl al jere cognossût pardut e al jemplave lis taulis di gardenâi e imperadôrs, predis conciliârs e nobii.
◆ Une volte ad an e vignive metude in pîts une fieste di gale. Ta chei trê cuatri dîs di sagre une fulugne di int e jemplave la place denant dal Domo di Sant Michêl e de biblioteche Vuarneriane. Dut par mangjâ une fetute di persut fate sù tor di un grissin e par bevi un tai di Tocai che si compagnave ben. Si sintive pardut a fevelâ furlan, chel nomenât “furlan vêr”, chel di San Denêl, la Siene dal Friûl. Che anzit, a disevin che i poetis furlans, prime di publicâ i lôr scrits, a passassin propit chenti par “resentâ i peçots tal Cuar”. In chê ocasion adiriture si faseve la Fieste Interladine, dulà che si cjatavisi cui “fradis ladins” des valadis di Fasse, Badie, Gardene e chei dai Grisons, par discuti adun lis nestris cuistions. Une sagrone che, propit par celebrà chel svintulin lizêr, e vignì clamade “Aiar di Fieste”. Int di dapardut, soredut dal mont todesc, e vignive jù a pitinton par cerçâ la bontât di chel persut e dai nestris vins. Lôr, abituâts a würstel e bire, figurìnsi…
◆ Po dopo l’aiar al è cambiât. Simpri mancul furlan, tes buteghis e tai borcs, par vie che i plaçarûi a fevelin talian, nuie plui fieste ladine, simpri mancul voie di lavorà, tant che a àn viert une ostarie “al Michelaç” che nol è propit un biel mistîr. Pierdût il purcit neri, cumò i purcits a rivin di vie pe Italie, arlevâts a miârs in grandis stalis, un tacât di chel altri e alimentâts cu la mangjine belançade. Parons di fûr a àn comprât i prosciuttifici e a fasin tancj “clauts” di persuts, vendûts incellofanâts in sacuts di plastiche… E par finî, di chest an, dopo plui di trentesiet edizions, al pararès nuie nancje “Aiar di Fieste”. Sierade ancje la sagre simbul dal persut, dal ‘tipicamente friulano’ che al permeteve une volte ad an ai contadins di chenti di disvuedâ i camarins, di resentâ lis cantinis ma ancje di presentâ la miôr muse di un teritori e di une culture locâl identitarie une vore preseade.
◆ Pussibil che vuê, cul Consorzi dal Persut, cul Parc Agroalimentâr, cu la Fondazion, cul Cluster, cu la Pro Loco, dongje dal Comun e de Comunitât Culinâr, no si rivi plui a meti adun chê fieste? Ce isal sucedût?
◆ No volaressin che chel aiarin cussì bon chel al ven de mont e che si misture cun chel de Basse al deventàs “Aria di FVG”. Event organizât magari dal Turisim FVG e che, piês, ancje il persut – Diu nus diliberi – al cambiàs sant. E che la “marche di garanzie” figurade de cuesse stilizade che e ven sgnacade a fûc sul persut, cul simbul tal mieç, ben evident SD “San Denêl” e vignìs mudât intune altre cu la scrite SG “San Giusto”… ❚