L’impegn di Aura Zanier pe sô Cjargne
«Lis feminis a puedin fâ tant par fâ tornâ a nassi lis areis internis, pal progrès economic, sociâl, culturâl e ambientâl des comunitâts, propit in gracie de lôr identitât di gjenar. A puartin cun se, di fat, esperiencis, prospetivis e sensibilitâts unichis». Aura Zanier lu testemonee in persone. Cjargnele, e vîf e e lavore a Triest di agns, ma il leam cu la tiere di origjin al è simpri fuart. Tant che l’impegn, determinât e apassionât, par tornâle a disveâ, par dâ un avignî ae sô int.
◆ Pe sô tiere Aura e fâs la facilitadore. In pratiche, e fâs di puint tra la politiche e lis comunitâts, di mût che a rivin a fevelâsi in maniere eficace e costrutive. Une ativitât puartade indevant dentri di Rifai, la rêt taliane dai zovins facilitadôrs des areis internis che Aura e je socie fondadore e rapresentante pal Friûl-Vignesie Julie.
◆ «Rifai e je une realtât cun passe 100 socis, pe plui part sot dai 35 agns, che e vûl deventâ il megafon des esigjencis, dai siums e des sfidis dai zovins che a vivin tes tieris margjinâls talianis. E par chest e inmanee incuintris e laboratoris par promovi la inovazion sociâl, scambiâ buinis pratichis, cognossi competencis e visions, sburtâ un sens di partecipazion e responsabilitât te comunitât. E je formade di associazions e di personis ativis sul teritori. Grups regjonâi si son costituîts ator di realtâts di riferiment in Piemont, Friûl-Vignesie Julie, Sicilie, Lombardie e Marcjis, intant che in Emilie-Romagne, Venit e Val di Aoste a son in vie di costituzion». Une esperience nassude tal Setembar dal 2020 a Valloriate, in Piemont, dal lavôr di un grup di zovins – tra chescj Aura Zanier –, che al à puartât al manifest “La rivincite des areis internis”: un document su lis dibisugnis dai zovins che la politiche e à di tignî cont.
◆ «Par areis internis – che par solit a corispuindin aes zonis di mont e culine dilunc di Alps, Apenins e isulis – si intindin chei teritoris che no àn servizis essenziâi tant che scuelis, traspuarts publics, ospedâi. A son dispès dispopoladis, a àn problemis peâts al isolament gjeografic, ae mancjance di infrastruturis adeguadis, ae carence di oportunitâts di lavôr e culturâls, ae percezion di jessi margjinalizadis rispiet aes zonis plui urbanizadis. Epûr no son lûcs cence avignî. Ma i zovins che a vivin o che a vuelin tornâ ta chei lûcs a àn bisugne di oportunitâts concretis pal futûr, e chest al domande invistiments tai servizis e une vision a tiermin lunc – e marche Aura –. Vuê lis areis internis a àn une rilevance particolâr parcè che il model che al viodeve tes citâts l’unic element bon di tirâ il disvilup di dut il Paîs al è jentrât in crisi, mostrant ducj i siei limits. Dongje di realtâts urbanis straplenis e cuntun cost de vite simpri plui alt, e je une grande cuantitât di comuns cun andament demografic negatîf e cuntune gruesse disponibilitât di terens e cjasis, ma che juste apont a fasin i conts cu la margjinalitât. Propit pes lôr carateristichis, lis areis internis a vierzin grandis sfidis, e insiemi a son sioris di oportunitâts: a rapresentin lûcs unics dulà costruî inovazion e tornâ a meti in pîts filieris peadis al teritori, tant che chê dal len o dal arlevament, dulà sperimentâ un mût di vivi in armonie cu la nature».
◆ Une grande ocasion par meti al centri i teritoris e il lôr progrès dant vôs a cui che ju vîf, a tacâ des gjenerazions zovinis. Inviâ chest procès al è pussibil, e necessari. E i bêçs a son. «In mont, par esempli, a son un grum di invistiments e risorsis sul sisteme schiistic, par tancj di lôr la uniche font di redit par chestis zonis ancje se la situazion e je cambiade cu la nêf che e je simpri mancul, i Inviers plui cjalts e il sec un probleme simpri plui atuâl. Cul scurtâsi de stagjon schiistiche, i invistiments su gnûfs implants sot dai 2 mil metris a son sorpassâts e a gjavin risorsis a politichis di disvilup sostignibil che a varessin di valorizâ lis specificitâts dai teritoris, tignî cont dal lôr valôr ambientâl e paisagjistic, incentivâ la inovazion e la imprenditorialitât par creâ puescj di vore, garantî servizis educatîfs, sanitaris, infrastruturis, promovi un turisim lent. Cul obietîf di tornâ a puartâ int».
◆ Ta chest percors di rinassite, lis feminis a zuin une part impuartante: a puedin jessi motôr di cambiament e cressite. «Plui feminis impegnadis in politiche a puedin puartâ a une rapresentance plui juste e inclusive tai procès decisionâi, contribuî a promovi politichis e programs sensibii al gjenar e a garantî plui atenzion aes cuistions che a rivuardin lôr e lis lôr fameis. Invistî te istruzion, tal acès ae ocupazion e ae imprenditorialitât pes feminis al pues miorâ il lôr benstâ individuâl e contribuî al disvilup economic e sociâl. No ultin, lis feminis a son dispès custodis des tradizions culturâls e storichis. Coinvolzilis tal promovi e protezi la culture locâl e pues contribuî a mantignî vive la identitât des comunitâts».
◆ Aura lu prove ad implen. Dal 2020 e je la Presidente dal Comitât Gianfrancesco da Tolmezzo ODV di Soclêf, componût di passe metât di socis cun mancul di 30 agns, pe plui part feminis. Il Comitât al gjestìs la Biblioteche comunâl, al inmanee une rassegne di musiche dant acet a artiscj dal puest e la mostre di artesanât “Rassegna carnica: arte, cultura, lavoro”, ma massime si impegne par tutelâ l’ambient – cuntune atenzion particolâr pe tutele des aghis dal Tiliment – e par valorizâ la culture e la art de Cjargne, organizant a Soclêf mostris, cunvignis e events ancje colaborant cun altris ents, publics e privâts.
«La Cjargne e je plene di bielecis naturâls, culture e tradizions che mi àn trasmetût di simpri un sens di apartignince e afiet profont. E reste un lûc là che al sarès pussibil vivi une vite plui semplice, autentiche. O soi leade insot a cjantons, trois, rumôrs de nature e al cidin. Ogni volte che o torni, mi emozioni». ❚
…………………………………………………………
IL PROFÎL
Aura Zanier, 28 agns, cressude in Cjargne, tra Tumieç e Soclêf, si è diplomade al Liceu sientific “Paschini” di Tumieç e si è laureade a Triest in Studis umanistics tal 2017; po e à frecuentât un master in Imprenditorie dal spetacul a Bologne. E vîf e e lavore a Triest tant che operadore culturâl tal setôr dal spetacul dal vîf par un teatri che al nas de rigjenerazion di une vecje caroçarie: un spazi libar, acessibil a dutis e a ducj, pensât tant che un lûc di creazion e di formazion culturâl e artistiche, un motôr di ativitât tal cuartîr di vie Cologna e te citât.
◆ Intant, e je impegnade in Cjargne, par vie che dal 2020 e je la Presidente dal Comitât Gianfrancesco da Tolmezzo ODV che al inmanee events e iniziativis culturâls di gjenar diferent a Soclêf.
◆ E je socie fondadore e rapresentante regjonâl di Rifai, rêt taliane dai zovins facilitadôrs des areis internis. ❚
