………………………………………………………..
I TRÊ PROVERBIS DI AVRÎL
Di cisilis e di flôrs
al è plen Avrîl
❋❋❋
Ploie di Avrîl
e jemple il barîl
❋❋❋
In Avrîl si bute
la cjalce pal curtîl
………………………………………………………..
LA CUSINE DI AVRÎL
Sparcs cui ûfs dûrs
Risot di urtiçons
Risot cu la pitine
Cjarsons cun jerbis di Primevere
Mignestre di vuardi, verduris
e luianie
Mignestre cu lis jerbucis
Mignestre di mei (mignestre
de vilie)
Gnocs cuinçâts in mil manieris
Fertaie cun urtiçons o altris jerbis
Lidrichesse lessade e cuinçade cui ûfs dûrs
Sparcs gratinâts
Robe insacade di purcit (salam, luianie, muset, panzete, socol, cope, ardiel, e v.i.)
Fiât di vidiel cu la cevole
Frico crustulin o cu la cevole
e patatis
Poleç infagotât
Salam cul sclopit cuet
inte fersorie
Patatis lessis cu la cevole garbe e panzete o speck
Plats cun bestiis di curtîl
Cunin in padiele o infagotât
Agnel cul spergot e patatis
Agnel involtolât
Cjavret in rost
Cjavret e patatis tal for
Uciei scjampâts
Brancin in croste di sâl
Trute cusinade in tantis manieris
Folp cun patatis e verduris
Rafioi di pes di mâr
Sope di pes di Maran
Sepis cu lis verduris
Freulis cul vin blanc
o cu la sbrume di lat
Colombe, fuiace, pinze, putize, pan zâl, pan dolç, pistum, pan di sorc, strecis, muiniis, strucui, pan di Pasche.
………………………………………………………….
IL SANT DAL MÊS – SANT ZORÇ
Stant ae tradizion cristiane, Sant Zorç al è stât un martar muart sot des muris di Nicomedie tal 303 e po dopo venerât di scuasit dutis lis Glesiis cristianis. Ancje lui al è un sant di riferiment stagjonâl, par vie che la sô fieste, celebrade ai 23 di Avrîl, e à cjapât sù funzions “segnaletichis” tal calendari de campagne, che a son compagnis di chês di Sant Marc (25-IV). Une volte, cu la fieste di San Zorç si inviave la stagjon dai pascui libars tes armentarecis e tai passons comunitaris, che e finive cu la fieste di Sant Michêl (29-IX). Sant Zorç al è un sant une vore venerât te Sclavanie e tes regjons de Europe di Mieç, li che al à riferiments plui direts cu la fieste de plenece de vegjetazion (Re Zorç) tal moment dal so plui grant sflandôr de mieze Vierte. Tal teritori de Republiche di Vignesie, la fieste di Sant Zorç e jere une scjadince juridiche impuartante, par vie che si fasevin i cambis di cjamarance, ven a stâi la sielte dai cjamerârs des comunitâts. ❚
……………………………………………………….
LA FIESTE DAL MÊS – LUNIS DI PASCHE
La grande domenie di Pasche e jere spietade cun tante tension e grande trepidazion inte societât rurâl di une volte, che le bramave dal lontan miercus de Cinise e par dute la lungje Cuaresime. Dopo di jê, al rivave il lunis di Pasche, ancje chel une zornade di fieste. Dopo de messe de buinore e i jespui dopo gustât, cheste stranie fieste che e cole di lunis – la uniche dal calendari liturgjic dopo de antighe sopression dal lunis des Pentecostis – e rivave al so “clou” intal dopomisdì, cuant che la usance e voleve une mirinde fate intal viert. Cheste tradizion si faseve soredut su lis clevis des culinis, di dulà che a vignivin fats cori di rive jù i ûfs dûrs colorâts (“Lâ a fâ cori i ûfs”). Il picnic al previodeve une vore di pitancis pe ocasion, come salam, formadi e fertaiis, il lidric cul poc, i ûfs dûrs, il pan benedet par Pasche, vin bon e fuiacis. Par piturâ i ûfs si ju faseve boli adun cun jerbis che a dan fûr colôr e cun violis e pestelacs, operazion che par tradizion e vignive fate dal joibe ae Sabide sante. Basât sul ûf, simbul cosmic di rinassite, al jere ancje il Truc, ven a stâi il zûc che tal lunis di Pasche si davuelzeve a Cividât e dulintor, une usance pandude ancje in altri regjons de Europe, come in Lusazie dulà che si clamave “Waleinen”. ❚
……………………………………………………
FRIÛL CONTADIN. Lis voris dal mês
Començadis lis voris de campagne, il contadin al ten simpri di voli il cîl intai siei cambiaments atmosferics, cetant impuartants pes coltivazions de anade agricule. Grant davoi intai vignâi par finî lis voris di preparazion stant che cumò i vidiçs des vîts a disgotin l’umôr, segnâl de gnove vite che e cor des lidrîs fintremai aes cecjis. Tai orts, preparâts e coltâts come zardins, lis feminis a rimplantin freulis e a preparin lis jechis pai sparcs, a semenin il basili e dutis lis verduris dal Istât come carotis, capûs, cauliflôrs e çucjis e te Basse furlane anguriis e melons. Tai zardins, netâts e ordenâts, si cuincin cjarandis e simpriverts, si incalmin piruçârs e miluçârs, si fasin lis leaduris aes plantis plui zovinis, si fasin taleis di ortensie e plantis autunâls, si metin sot tiere lis patatis des spadis e si cambiin di vâs lis begoniis. ❚
…………………………………………………
LA TRADIZION DAL MÊS – Lis Rogazions
Lis Rogazions a jerin processions cristianis dal timp de Vierte, fatis par domandâ il jutori celest su lis coltivazions e sul bon andament de anade agrarie. La prime Rogazion, clamade “Maiôr”, si faseve ai 25 di Avrîl, invezit chê “Minôr” si usave fâle tal lunis, martars e miercus prime de Sense – che e colave di joibe. Cheste procession si faseve tal vert de campagne, su percors antîcs che a tocjavin borcs sparniçâts te campagne, riui, croseris, gleseutis votivis, anconis e confins di paîs, par implorâ la protezion divine su la campagne coltivade e sui siei prodots che a stavin par dâ fûr. In tantis bandis, lis processions si fermavin par fâ polsâ e mangjâ la int che e partecipave; si tratave de distribuzion di pan e di vin, fate ancje cun lassits e disposizions testamentariis. Dilunc dal percors, biel che al leieve i vanzelis, il predi al benedive cu la crôs i cuatri ponts cardinâi e al recitave la formule di sconzûr cuintri dal brut timp trist e de tampieste, dal taramot e de peste, de vuere e de miserie. In ciertis paîs i contadins a jerin usâts a gjavâ fûr strolics su la gnove anade agrarie, a sistemâ su lis spaleris des vîts o sui pomârs tocuts di cere cjapâts sù dal trangul dal Vinars Sant o piçui ramaçs di ulîf benedet o piçulis crôs di len, come segn di protezion e difese cuintri sut, brut timp e striaments. In cualchi puest la int no si sentave su la jerbe gnove dai cjamps fin cuant che no vignive benedide dal passaç de Rogazion. La Rogazion e veve ancje la funzion sociâl impuartante di conferme de jurisdizion dal teritori eclesiastic, come che e dimostre ancjemò vuê la sugjestive cerimonie de Bussade des Crôs de Plêf di Zui. ❚
