Une sclese dal cûr di ognidun di nô, tignût dongje tal gnûf album di Alvise Nodale: “Gotes”

Alvise Nodale nus incjante di simpri cu lis sôs melodiis. Al è dal 2015, cu la publicazion dal so prin album “Conte Flame”, che i stin daûr a chest zovin cjantautôr di Sudri, che nol mole di puartâ ator la marilenghe e che in ogni sô cjançon al met un toc dal so cûr.
◆ Dopo la jessude dal ultin album “Zornant”, publicât tal 2021, al à continuât a sunâ cun artiscj e cjantautôrs come Franco Giordani e Lino Straulino par diviers lôr progjets, e al continue a fâlu in ogni ocasion pussibil.
Sul finî dal 2022, insiemi a Veronica Urban al a metût adun un doi di musiche tradizionâl irlandese, i “Darìnt”. Il folk irlandês al à di simpri influençât il percors di chescj doi zovins artiscj, tant che Alvise al à di poc publicat une racuelte clamade “Gneules” su spotify cun lis cjançons e artiscj che lu an di simpri ispirât pe composizion dai soi tocs.
Contemporaniementri, insiemi a Veronica Urban e Luca Boschetti, al a tacât a lavorâ su la musiche popolâr furlane, dant une vision plui moderne ai tocs tradizionâi. Il lôr grup, i “Trivial”, al à za vint il Premi Alberto Cesa di Folkest, al sta planc planc cjatant une sô forme e spazi. Sigurementri tra chi di poc o tabaiarin di lôr.
◆ «Il gno progjet solist al à vût une buine lune chest an passât» nus conte Alvise. Tal 2023 al a di fat vinçût doi concors: la residence artistiche “Mille anni al mondo, mille ancora” a Prât in Cjargne organizade dal Associazion Culturâl CulturArti e il “New Sounds of Acoustic Music” ae fiere di Cremone. Al à ancje sunât al “Ferentino Acustica”, un festival di ghitare acustiche a Ferentino in provincie di Frosinone, e a nus dîs «al è stât un bielissim festival e ancje se il Furlan nol è capît al è stât un grum preseât.»
◆ Cussì, o rivìn a “Gotes”: il tierç album di inedits dal cjantautôr, che al vignarà presentât a Prât ai 21 di Jugn.
“Gotes” si clame cusì parcè che ogni cjançon dal gnûf lavôr e je intindude come une gote. Ogni toc al à une sô identitât, «ancje se a un scoltâ distrat a podaressin someâ “dutis compagnis” dentri di lôr a scuindin une tampieste, propit come lis gotis che a viodilis cusì a son dutis compagnis, ma probabilmentri nol è propit cusì.» Ogni cjançon e je une gote, e ogni gote e je une esperience che l’artist al met in musiche.
Lis gotis a son ben dîs. Dîs tocs intims, cun sonoritâts acustichis, che a contin la fragjilitât, i dubis, i amôrs e torments, essenziâi par frontâ il cambiament.
«O ai cirût di meti in musiche esperiencis, situazions, torments e amôrs che ognidun (a sô maniere) al pues scuintrâ intune vite. A son dutis esperiencis che nus podin cambiâ, o judâ a cambiâ mûts di fâ o di jodi las robis ator di no.»
Il cambiament al è duncje il teme principâl che al coleghe tra di lôr lis cjançons, dutis scritis e cjantadis te variant cjargnele dal Furlan.
◆ Alvise nus conte che il toc che plui di ducj al rapresente l’album al è il numar cinc, dal titul “Gotes”. Un toc che al è dome strumentâl ma che cun la sô evoluzion al rint ben la idee de tampieste e cambiament che e fas di fîl condutôr dal album.
Il toc al cuâl al è plui afezionât al è “Cuintrevint”, par une serie di motîfs personâi. No nus reste che la a scuvierzi parcè…
A creâ un leam tra i tocs e je ancje la sonoritât acustiche. Di fat par componi l’album no son stâts doprâts struments eletrics o efiets in studi, tant che las cjançons a son stadis regjistradis dal vîf, sunant e cjantant tal stes moment.
Chest gnûf album al è inricjît di bielissimis ilustrazions e di colaborazions: cun Alvise a an lavorat Flavia Barbacetto e Stefano Cabrera «che a son dôs personis deliziosis oltri a jessi musiciscj fûr dal ordenari. Flavia e a impreziosît cualchi toc cun la so vôs e Stefano al à sunât il violoncel, rispietant e valorizant la semplicitât dai tocs.»
◆ L’album “Gotes” al è stât produsût de Associazion Culturâl CulturArti e di Edoardo De Angelis. «A lôr un graciis particolâr parcè che a an crodût tas mês cjançons e, plui in gjenerâl, te Marilenghe cjantade, cjatantle origjinâl, vere e sclete come che efetivementri e je».
◆ Alvise nus promet che a saran tantis lis ocasions par sintî l’album sunât dal vîf e comprâ il cd. Lis datis za siguris a son: la buinore dai 21 di Lui a Fors pe rassegne “Palchi nei Parchi” e la sere dai 30 di Lui a Palaç Morpurgo a Udin. Pai doi concierts Alvise al sarà compagnat di Davide Raciti cul so violin.
L’album al podarà prest sei disponibil ancje in linie, ma il consei dal artist:
«Chest nol vâl dome par me, ma par ducj chei che fasin musiche, al è di vegni ai concierts, partecipâ a events culturâls e jessi presints il plui pussibil, parcè che a son simpri esperiencis che al vâl la pene fâ, tal ben e tal mâl e son simpri ocasions di confront e di cressite personâl che nus podin judâ in chescj timps no propit sempliçs.»
◆ Spietant lis ocasions di scoltâ Alvise Nodale dal vîf e par restâ al pas cu lis sôs novitâts musicai seguîtlu su Facebook e Instagram.
Une volte che o veis cjolt l’album, scoltaitlu a voi sierâts, cussì che par ogni sunôr o podês imagjinâ di jessi come lis gotis di aghe che dal cîl e svolin i paisaçs dal nestri Friûl e respirâ a plen polmons l’aiar dal cambiament, dai profums dai cjamps, dai monts, da lis ondis dal mâr, prime e dopo lis tampiestis. No podin sigurâus che i vuestris voi no si jempledin di “Gotes”… ❚