Il Teatri Stabil Furlan e la Societât Filologjiche Furlane, in colaborazion cun MateâriuM, Caffè Letterario Codroipese e Comitato Amici di Franco Marchetta, a àn memoreât, a dîs agns de sô muart, l’inteletuâl mancjât masse adore
Un test no finît. Il ricuart vîf di un amì. La volontât di lâ indenant a nudrî lis intuizions di un cjâf di grant inzen. A son chescj i ingredients di une serade dedicade a la opare di Franco Marchetta, a dîs agns de sô muart, rivade masse adore cuant che al veve pôc plui di sessante agns.
◆ Par ricuardâ l’inteletuâl furlan, martars ai 28 di Mai, aes 18, li dal Ottagono di Codroip, il Teatri Stabil Furlan e la Societât Filologjiche Furlane in colaborazion cul Laboratorio permanente di scrittura MateâriuM, il Caffè Letterario Codroipese e il Comitato Amici di Franco Marchetta, cul patrocini dal Comun di Codroip, a àn metût adun une leture seniche intitulade “La fumate”, traduzion par furlan di “La Nebbia”, «test teatrâl che al conte di atmosferis e personaçs di un romanç no finît: “La biblioteca segreta” e che o sperìn prin o dopo di publicâ», al à spiegât Umberto Alberini, amì di Marchetta di tant timp. «Un romanç distopic, là che il Friûl al è stât scjassât di un taramot e dopo di une pandemie (un test profetic!). Franco al imagjine Udin tant che un grum di ruvinis là che al vîf un piçul trop di resistents che nol vûl lassâ indaûr la memorie e la culture dal puest. Intant che la plui part de int si è dade dongje in grancj centris comerciâi, che a son deventâts la lôr gnove cjase».
◆ Ma no je stade une leture seniche come chês altris. Se si lei il test, al è clâr che di un pont precîs indenant, il lavôr dal dramaturc al devente une schirie di notis suntun finâl pussibil. O fevelìn di 2547 caratars, che su chei 73 personis di dute la Italie a àn partecipât a une disfide creative (mandade fûr di MateâriuM intai mês passâts). In 27 a àn consegnât il lôr elaborât cun dentri un finâl alternatîf. Cinc di lôr a son stâts sielzûts dal grup che al à organizât l’event – «daûr di ce che al à dit il cûr», come che al à sclarît Alberini – e a son lâts in sene propit a Codroip interpretâts di Alessandro Maione, Paolo Mutti, Chiara Donada e Klaus Martini. Prime de leture seniche di “La fumate” e dai pussibii vincidôrs finâi de call (Stefano Moratto, Massimiliano Aita, Sara Beinat, Paolo Sartori, Claudio Romanzin) al è stât ancje un incuintri cun Umberto Alberini, Walter Tomada e Gianmaria Marchetta che a àn fevelât” dal inteletuâl. «Franco al è stât un tra i scritôrs plui impuartants de sene culturâl furlane tra il Nûfcent e il Doi mil – al ricuarde l’amì –. Al à vude une formazion di architet, intai agns ‘90 al à tacât a publicâ par talian, massime daûr de scriture di Elio Bartolini, che cun lui al veve une frecuence cuasi familiâr. Di un ciert moment inlà, al à tacât a scrivi par furlan, cun chê di incressi il nivel di espression, in prose, fevelant di temis su la cundizion dal om, su la societât, sul disvilup, sul progrès. Argoments che lis grandis leteraturis europeanis a àn simpri frontât. Al à cirût di atualizâ la lenghe, cun grande atenzion ae espression dal mont dai zovins, ancje digjitâl. Par chest al veve metût adun un blog, là che al cjapave sù i contribûts di zovins scritôrs furlans. Cun Paolo Cantarutti di Radio Onde Furlane, Walter Tomada e Maurizio Mattiuzza, al veve metût sù une scuele di scriture furlane. Massime intai ultins agns, al cirive simpri ocasions di creazion coletive. Ma si à di visâsi – al siere Alberini – che al è stât ancje il prin furlan a vinci par trê voltis il Premi San Simon; e che al veve inventade la formule dai romançs seriâi par furlan». ❚
