Une ufierte professionâl di alt nivel e insiore une sene amatoriâl za cetant vivarose
Se e je une ufierte che in Friûl no mancje, chê e je la pussibilitât di gjoldisi cualchi spetacul teatrâl par furlan.
De mont ae marine, di Invier tant che di Istât, al è dut un nassi di seradis li che la protagoniste parsore dal palc e je la marilenghe.
◆ Merit soredut des compagniis amatoriâls che, in sinergjie cui Comuns e cun altris associazions, a metin in sene la lôr passion pe recitazion e soredut l’amôr pe lôr fevele, libare di esprimisi cence chês limitazions che, magari cussì no, nus capite di sintî cuant che si cjacare in public (vêso presint lis jessudis: “Miôr cjacarâ par talian, che magari no ducj a capissin”, “No cjacari par furlan parcè che la mê fevelade no je chê juste” e v.i.).
◆ Buine part di chestis clapis teatrâls e je nassude sot de ale ricreative parochiâl o paisane, par dopo indotâsi di un so statût e regolament e dispès jentrâ a fâ part di associazions plui struturadis, tant che la Fita-Uilt (Federazion Teatrâl Teatri Amadôrs – Union Taliane Libar Teatri) o la Associazion Teatrâl Furlane, che e je nassude intal 1987 propit cul intindiment di poiâ il teatri amatoriâl in lenghe furlane e intes varietâts linguistichis des provinciis di Gurize, Pordenon e Udin. In dì di vuê, e ten dongje passe 50 compagniis, che a zirin par dut il Friûl in gracie di cetantis rassegnis presintis intai lôr teritoris (e no dome) sedi vie pal Invier, disfrutant lis salis teatrâls, sedi vie pal Istât, tal viert o sot dai tendons, dispès inte suaze des sagris e in colaborazion cu lis pro locos.
◆ In sene si pues pardabon viodi di dut: dai spetacui di cabaret, al teatri dal assurt, dai classics voltâts par furlan, ai cjavai di bataie di inizi Nûfcent (tant che “Une sblancjade di Pasche”, “La massarie dal plevan” e v.i.), fin a rivâ al musical o a propuestis plui sperimentâls.
◆ Clâr che il gjenar plui preseât di bande dal public al è chel comic, ancje se no mancjin propuestis di caratar storic o plui introspetivis, tant che chês proponudis ancje de ATF stesse, che e à produsût i vincidôrs dal “Concors par tescj teatrâi in lenghe furlane” (in curt al vignarà fûr il bant pe gnove edizion). Tantis voltis, i spetacui di chestis compagniis a son pardabon di nivel, ancje in gracie de formazion e de consulence cun regjiscj e cun artiscj professioniscj, ancje par chel che al inten la dramaturgjie e la assistence tecniche.
◆ Darest, la stesse ufierte teatrâl professionâl si è insiorade intai ultins timps in gracie dal Teatri Stabil Furlan, che ogni an al propon rassegnis simpri plui sioris e si met ae prove cun progjets simpri plui sfidants. Altris realtâts che a proponin riflessions e stiçadis interessantis a son Matearium, Servi di Scena, Teatro della Sete, Teatrino del Rifo, ma ancje Molino Rosenkranz, Fierascena e altris sogjets plui resints che a àn viodût inte lenghe furlane une risorse, in plui di un spieli par mostrâ la anime di chest teritori (come che al sa ben Carlo Tolazzi, che par contâ lis sôs storiis al à savût disfrutâ ancje lis varietâts plui particolârs, tant che chê dal Cjanâl Pedarç).
Cun di plui, bisugne preseâ ancje il sfuarç intal cirî di proponi leturis senichis e spetacui teatrâi par furlan ancje di bande di altris ents (“Maçalizi”, produzion CSS e Mittelfest in colaborazion cu la ARLeF, o lis narazions jessudis di chê fusine creative che a son stâts i Colonos).
◆ Po dopo, cemût dismenteâ chês trê canaiis (merit dal teatri, che ju rint plui zovins) dal Teatri Incerto? O Catine, i Trigeminus, i Papu (par altri, Andrea Appi al è stât di pôc protagonist di un biel spetacul intun omaç a Renato Appi, doprant ancje il “folpo” di Cordenons)?
E se o sês passionâts di teatri, o savês une vore ben che o ai dismenteât plui di cualchi non. No stait a inrabiâsi, ma daitjur dignitât te maniere plui juste: lait a viodiju, conseaitju ai vuestris amîs, sburtait par clamâju intai vuestris paîs.
Dome cussì o fasarìn vivi ad implen cheste art cussì antighe, rindint onôr ancje ae nestre lenghe. ❚
