Dal 1995, il president de societât dai “cjalcins blancs” al matee par tignî alte la preseade tradizion sportive locâl
Macis e manecis, corsis e balutis che a svolin. E no dome: hot dogs e patatinis. Al somee di jessi in Americhe e, invezit, o sin a Buri, dongje Udin. Chi di plui di cincuante agns si zuie sedi di baseball che di softball, la version dal baseball cun balis plui grandis e un cjamp plui piçul. Il numar un dai White Sox, la societât locâl, al è Maurizio Rizzi, che al à tacât come zuiadôr di zovin, po al è stât un arbitri preseât e, plui tart, al è deventât president, dibot par câs, ma cun competence e une vore di passion.
_
President Rizzi, di dulà vegnie fûr la passion pal baseball?
“O ai tacât a zuiâ un tic tart, cuant che o vevi cuindis agns. Par solit si scomence prime, tor i nûf o dîs agns. A Buri a vevin une scuadre e al è stât avonde facil prime lâ a viodi lis partidis e plui tart butâmi dentri dal diamant. O ai zuiât fin intai under 18 e, cuant che mi soi fermât, o ai tacât subit a fâ l’arbitri. Disìn che lis sodisfazions miôr lis ai cjapadis dibot come arbitri: mi disevin che o jeri bulo. O ai arbitrât fin al 1978, cuant che o ai metude sù famee. Daspò a son rivâts i fruts e, cul lavôr, no vevi plui tant timp di dedicâ ae ativitât sportive. Par tant timp nol è sucedût nuie, fin tal 1994, cuant che o soi jentrât di gnûf intal zîr, cuasi par câs”.
_
Cemût par câs?
“Intal principi dai agns Novante o zuiavi a burelis e une sere, lant a cjase, o soi passât dongje dal palaç des Associazions, in place a Buri. Dentri, i amîs dal baseball a jerin daûr a meti sù un torneu e il barcon de sede al jere viert. Par mateç, mi soi poiât su la plane e ur ai dit: “Vonde berghelâ: si fasês sintî fin fûr dal paîs!” Cuant che mi àn viodût, mi àn clamât dentri par un consei su la organizazion de manifestazion. A àn metût adun dutis lis mês ideis e, ancje cul fat che o ai puartât in societât il sponsor “Danieli” o soi restât come dirigjent. Dopo un an, o soi deventât president. Dit e fat”.
_
In trê agns, o sês rivâts in serie A2.
“Sì, dal 1999 al 2001. Prime o vevin metût sù a Buri un torneu par zovins che, dal 1997 al 1999, al è stât preseât tant che un dai miôr in Italie: al jere il secont par impuartance dopo di chel di Sala Baganza, in Emilie. A rivavin in Friûl 320 zovins di nivel fin ai juniores par une setemane di partidis e une intensitât di no crodi, ancje par chei che a mateavin te organizazion. Cu la prime scuadre, intal 2002, o vin zuiade la finâl dai play-off cuintri il Viterbo, par lâ sù in A1 e o sin rivâts a vinci ancje un pâr di Copis Italie”.
_
Chest an, cemût ise le scuadre?
“O vin une clape une vore fuarte. Massime chei intal diamant a son preseâts e a zuin ben. In tancj di chei che a viodin zuiâ i White Sox a disin che, cuntun pâr di incalms di bon nivel, o rivaressin a salvâsi in serie A. Fasìn un pas par volte: intant o vin di finî ben la stagjon 2024, zuiâ il ziron di tornade intal mês di Lui e daspò viodarìn. Lis risorsis a son une vore impuartantis: se i sponsors a vegnin daûr, si pues ancje pensâ di fâ il pas. Dut câs, il salt de serie B ae serie A al è rilevant. Mi ricuardi che, cuant che o zuiavin in serie A, intai agns Doi mil, o fasevin trasfiertis fin in Sicilie che a costavin come dut un campionât”.
_
Il sium di Maurizio Rizzi?
“Rivâ a vinci il torneu, daspò vinci i play-off. E fâ simpri miôr cu lis scuadris dai zovins. O vin metût adun grups di minibaseball, clamâts “primi lanci”, under 12, U14 e U18. Disìn che intal 2025 mi plasarès vinci alc cun cualchi scuadre. I under 12 a àn ancje une clape di gjenitôrs e fameis che a stan une vore dongje: une robe fondamentâl par fâ ativitât sportive cumò”.
_
Il manager Osbel Lopez Riviero e i tecnics José Jiménez Sánchez e José René Ezequiel Sánchez: o sês internazionâi.
“O vin cubans e dominicans: lôr a àn il baseball intal sanc. A son biei di viodi e cui nestris zovins a son une biele scuadre. O vin voie di cjapâsi cetantis sodisfazions”.
__
Intal mês di Avost, a Buri, si zuiarà la “Premier Cup” di softball.
“Esat, cu lis dîs scuadris plui fuartis in Europe, dai 19 ai 24 di Avost. Forlì al rapresentarà la Italie, i olandês di Haarlem e Neptunus, i belghis dai Lions Beveren, i cecs dal Joudrs Praha, i spagnûi dal Rivas Madrid, i todescs dai Wittenbach e dal Wesseling, i austriacs dal Vienna Metrostars e i inglês dal Mix. O vin partecipât ae presentazion dal torneu, ancje tal Stadi Friûl di Udin, in ocasion di une visite dal tecnic de Nazionâl taliane, Mike Piazza. Lui al è un che al à fat la storie dal baseball american: il Pelè des macis”. ❚
:::::::::::::::::::::::::::::::::::::::::::::::::::::::::::::::::::::::::::::::::
White Sox: trê agns in serie A2 e tante serie B. Cjalant massime ai plui zovins
Intal Zenâr dal 1968, stiçâts dal bolognês Luigi Orsini, a Buri e je stade metude sù une societât di baseball cun chê di scomençâ ancje dongje Udin la ativitât sportive plui preseade dai americans. Intal 1994, e à cjapât vite la associazion sportive diletantistiche White Sox Buttrio, i “cjalcins blancs di Buri”, buine di rimpinâsi fin ae serie A2, zuiade dal 1999 al 2001.
◆ Cul president Rizzi devant di ducj, il club al à metût in bacheche une Cope Italie di serie C intal 1996, une Cope Italie di serie B tal 2003 e diviersis promozions: in A2 intal 1975, intal 1991, intal 1998 e intal 2008. In serie B intal 1996 e 2022. Plui i agns dal salt in serie C: 1971, 1980, 1994 e 2006. Zontant ancje une vore di risultâts a nivel di zovins: vincjecuatri in dutis lis categoriis agonistichis.
◆ Just ricuardâsi che a àn vistût la maiute dal Buri atletis preseâts tant che Mauro Prampero, classe 1969, che al à zuiât cun la Nazionâl taliane.
◆ I White Sox di Buri a àn la Stele di Bronç pal merit sportîf dal CONI. ❚
::::::::::::::::::::::::::::::::::::::::::::::::::::::::::::::::::::::::::::::::
I mondiâi di softball pe prime volte in Italie a Cjasteons di Dtrade, intal mês di Lui
Cu la regjie dal president de Federazion taliane di baseball e softball, Andrea Marcon, che al è a stâ a Cjasteons di Strade, intal mês di Lui in chel paîs si davuelzaran i campionâts mondiâi di softball. Une manifestazion rivade ae edizion numar 17, che pe prime volte de sô storie si fasarà intal Stât talian. Une setemane, dai 15 ai 21 di Lui, cu lis vot scuadris miôr dal mont: Italie, Canadà, Cine, Stâts Unîts tal grup “A”, e Australie, Gjapon, Olande e Puerto Rico tal grup “B”.
◆ Il diamant – il non tradizionâl dal cjamp di baseball e di softball – di Cjasteons al è stât sielt tant che struture principâl, intant che chel di Buri al sarà il cjamp di scorte e pai alenaments. ❚
