Miôr furlans o citadins dal nuie?

I popui a àn une identitât ancje se no le vuelin. Tant che ogni om al nas e che al cres cuntun non, un cognon, un puest di divignince, e un document che lu comprove, cussì ancje i popui a vegnin di un timp lontan e di une tiere dongje, a clamin lis robis intune maniere particolâr e diferente che e je la lôr lenghe, e a viodin il mont intune clâf origjinâl. Magari chest element tantis voltis al ven dât par scontât, ma dispès vuê si cjate cui che al dinee chest caratar dal so jessi. Ma cun ce reson? Parcè refudâ la proprie identitât?
◆ I oms par solit a cambiin muse, non o identitât cuant che a àn alc di platâ. O, se no àn vergogne o intenzions brutis, lu fasin par deventâ plui “biei”, plui impuartants, par someâ plui siôrs o potents, fasintsi une filusumie gnove (magari di plastiche) o vendint cuarp e anime a cui che al pâr plui bon di fâju sintî part di une comunitât plui grande e fuarte. Cussì al è ancje pai popui. Lu diseve za pre Toni Beline che al viodeve cemût che par tancj furlans “la partecipazion al marcjât mondiâl e vâl la pierdite de proprie lenghe e culture”, ancje se “tal marcjât globâl no sin plui tra chei che a comprin, ma te marcjanzie in (s)vendite”.
◆ Al è plen di int che cuant che si tabaie di furlan, di tutele de lenghe e de necessitât di meti in vore ce che al covente par no fâle murî, e pant fastidi e marum. No si capìs ce che ur dâ fastidi dal jessi furlans al pont di dineâ no dome la lôr stesse identitât, ma pretindi di scancelâ ancje chê di chei altris. No àn cussience di judâ la muart cidine dal lôr popul, ma intant a gjoldin a infuessâ la specificitât dai furlans, tratant la culture di chenti come un sotprodot contadin e antîc, une robe che e varès di spesseâ a murî par mudânus in ce? In “fradis de Italie”? In citadins dal mont? O in citadins dal nuie?
◆ “La Patrie dal Friûl” e je la cove di chei che a àn la cussience che il mont al à bisugne di jessi un mosaic fat di miârs di tocs sflandorôs, no dome di pocjis pieris che ae fin a son dutis compagnis e cence sugjestion. Il dispresi par ce che si è, e la voie di mudâ piel, lenghe e storie par deventâ alc che nol è ni cjar ni pes, e nol à valôr, no nus partegnin. O vin miôr jessi borghesans di un piçul toc di mont che citadins dal nuie. Si cjapìn ogni dì su lis spalis la responsabilitât di fâ sorevivi une storie, une lenghe e une culture parcè che se al mûr il furlan, a muerin i furlans e al mûr ancje il Friûl, che al è a simpri stât “incorporât” di ducj che chei lu àn cjatât su la lôr strade di invasion o di colaborazion, ma che al è simpri restât se stes parcè che la sô divignince e ven di lontan.
◆ Cu la sparizion de lenghe e de int che le fevele a laressin in mancul ancje ducj i valôrs che la identitât e mostre lontan dal lusôr, ma che si notin une vore ben cuant che la flame si distude e lôr a sparissin. “Al è plui facil inacuarzisi dal vueit cuant che a vegnin a mancjâ che no dal benefici de lôr presince”, al notave pre Toni, e trop che al veve reson si viôt cumò che la identitât furlane e je smamide e no je plui il lat che al nudrìs i nestris zovins. Viers di ce ju sburtie la modernitât globâl che ur fâs di gnûf riferiment, stant che i lôr paris e maris a vuelin cambiâ muse e identitât? Tal miôr dai câs, viers de migrazion, stant che – cence cussience des lidrîs – ogni puest tal mont al è compagn par vivi, lavorâ e meti sù famee. E je ancje une altre muse de medaie, e si viôt tes cronichis di chestis setemanis: baby gangs, violence, pôre, e une mancjance preocupante di sens che e puarte a une cressite des dipendencis di droghe, alcul e zûc che a tachin simpri plui adore. Dute colpe de crisi di identitât? No sigûr. Ma no si pues platâ che, se no rivìn a dâ ai nestris fantats une reson par crodi tal avignî e par dâ une prospetive ae lôr presince in chest cjanton di mont, il pericul al è chel di slargjâ la popolazion che une volte si clamave furlane, ma che simpri di plui e sta deventant citadine dal nuie. ❚