Interviste cun Andrea Del Favero, organizadôr di events, musicist e studiôs di musiche tradizionâl
Andrea Del Favero, classe 1956, al è nassût a San Denêl. Musicist, gjornalist, studiôs di musiche tradizionâl, al è il diretôr artistic di Folkest za de prime edizion dal 1979, il più grant folk festival dal Sud de Europe. Tant che musicist al à scomençât intal 1982 cul grup La sedon salvadie, ma a son une vore lis sôs partecipazions e colaborazions cun altris grups musicâi. Al à fat ricercjis su la musiche popolâr furlane e des zonis dongje, curant tantis mostris e publicazions. Al è stât onorât cul premi Moret d’Aur pal so lavôr a pro de musiche furlane.
_
Dree, tu sês di San Denêl, tal ambient li che tu sês cressût si fevelavie simpri par furlan?
Sì, ma di une robe mi visi benon: che a scuele no si podeve fevelâlu. Jo o vevi une mestre severissime par chel cont, ancje se dispès e fevelave in marilenghe. Une dì, sintint che un gno compagn di classe al stave barufant par furlan cun chel dongje, i de un biel pataf. Lui si lamentà rugnant e disint “Ma siore mestre, lui al è simpri che mi coione!” Par rispueste, la mestre i à dât un altri pataf, disintji par furlan (!): “Tropis voltis ti aio dit che achì si fevele dome par talian!” Chest par me al è stât un choc tant grant che par un periodi no ai fevelât plui par furlan.
_
E in paîs cemût jerie la ande? E cumò i zovins lu fevelino di mancul?
In paîs si fevelave simpri, ma San Denêl al jere trilengâl: furlan, talian e venit. Jessint un puest li che al jere marcjât, si fevelave ancje il “veneto di terraferma”, cemût che lu clamin, che al jere la lenghe francje di dute la aree adriatiche, e o intint fin in Slovenie e Cravuazie. Cumò chel che al è pierdût al è chel venit, invezit il furlan i zovins lu fevelin ancjemò, o stimi che si sedi mantignût.
_
Ce studis âstu fat dopo chê brute esperience cu la mestre?
Jo o ai fat il classic a Udin, il Stellini, e dopo o soi lât a studiâ letaris a Padue e a Triest, cu la specializazion in Storie des tradizions popolârs. Ma no soi laureât, mi mancjavin cinc esams, parcè che o ai tacât a zirâ la Europe.
_
Liceu Stellini a Udin, duncje incuintri cun pre Checo Placerean?
No, lui al jere za lât vie. Cun lui o ai vût rapuarts, ma par vie che al jere amì di famee. Al Stellini come insegnant o ai vût pre Gjilbert Pressac, e cun lui o vevi tacât a barufâ in chê volte, ma dopo vie pai agns o ai vût simpri un biel rapuart di stime e amicizie.
_
Dulà ti ise nassude la passion pal furlan e pal popul furlan? Gno nono al jere dal Cjadovri, ma al jere vignût a stâ in Friûl, e gno pari che al è nassût a San Denêl al à simpri fevelât par furlan. La famee di mê mari e jere di contadins a Rivote, dongje Rodean. Une famee dute furlane che si è simpri interessade di cuistions furlanis; pense che, come che o disevi prime, pre Checo al jere amì cun gno pari, si jerin cognossuts tal periodi partigjan. Un altri so amì al jere Riedo Puppo par vie che a jerin mestris, e pense che il gno santul al jere l’architet Enzo Pascolo, fi di Etelredo Pascolo, ancje lui amì di famee. Duncje o soi cressût intun ambient li che il Friûl al jere Patrie vere, uniche e indiscutibile e il rest dal mont al zirave di consecuence, come che al varès di jessi. No ai vût bisugne di “iluminazions di furlanisim”.
_
Lâ a Padue a studiâ ti varà metût in contat cun altris realtâts, cemût isal stât?
O ai vude la grande fortune di vê di professôr il grant linguist Giovan Battista Pellegrini, lui al faseve il cors di linguistiche ladine e mi à viert un mont. Ancje par vie che mi à insegnât la metodologjie sientifiche: mi à dât un imprest che te mê ativitât di dopo al è stât util par aprofondî robis che magari o vevi za sintût in Friûl, ma cussì lis podudis tratâ in maniere sientifiche. Passât a studiâ a Triest, o ai vût di professôr Giampaolo Gri, che al veve pene cjapât sù la catedre dopo de muart di Perusini. O soi stât fortunât a vê insegnants cussì, in sumis.
_
In cjamp musicologjic ce mestris âstu vût? Cualis sono stadis lis primis figuris di riferiment par te?
Un impuartant al è Mario Macchi, nassût a Triest tal 1912, grant musicist e etnomusicolic che al è calcolât il pari de musiche corâl furlane e triestine. Claudio Noliani cul so libri «Anima della Carnia», triestin ancje lui. Pre Pellegrino Ernetti, che nol jere furlan, ma che si apassionà e al studià il cjant aquileiês rivant cussì a colegâ Aquilee cun Alessandrie di Egjit che dilunc dal I secul d.d.C. e jere la vere capitâl dal Mediterani. E je sô la ipotesi, che o condivît, che lis vilotis a derivin dal cjant aquileiês: chês plui antighis a son in “mût doric antîc”, che nus riclame bot e sclop a Alessandrie e a Costantinopoli. Purtrop Ernetti al fo metût in bande par vie che al diseve di vê inventât une sorte di machine dal timp. A part cheste matetât, al è considerât un dai plui grancj studiôs di musiche a nivel mondiâl, un zigant.
_
Mi disistu cualchi mestri di lenghe furlane in cjamp leterari?
Secont me a nivel di poesie a son robis straordenariis: il prin non al è chel di Ermes di Colorêt. Fra l’altri no si sa che i siei componiments a jerin cjançons e no tescj di lei e vonde. Simpri in chei agns, dal 1600, e je la Brigata Udinese. E po dopo a son lamps che si vierzin tal timp, par esempli i fradis Mariuzza di Cjampfuarmit che fra 1700 e 1800 a lavin ator a sunâ e a cjantâ i lôr tescj. L’ultin esempli te storie dai autôrs di tescj par cjançons, dopo si rive ai cjantautôrs di vuê.
_
Cualchidun di plui resint, cualchi contemporani?
Dal Nûfcent chel che mi interesse di plui al è Federico Tavan, simpri poesie. Po dopo Pasolini, ancje se al à il limit di un ciert inteletualisim, ma di lui o presei il fat che daspò de vuere al à dât une biele scjassade ae culture furlane. Te prose, mi è plasude cualchi robe di Sgorlon, ancje se si sint che a son voltadis dal talian: lui al fevelave furlan, ma no sai se la scriture in lenghe furlane e je robe di man sô.
_
Figuris impuartantis par te in cjamp inteletuâl e culturâl?
Pre Checo al jere un conservadôr, duncje une vision lontane de mê, però o preseavi tant la sô capacitât di meti in discussion dut, e al jere un om che al veve vision. La sô vision de Europe e jere maraveose. Po dopo o dîs Glesie Furlane: ducj lôr, un par un.
Un altri non al è Tito Maniacco pe vision de storie dal Friûl che al à savût dâ, e pai tancj discors che o vin fat: une persone umile e une vore culte.
Ma fasimi dî doi nons dal presint che i ten: Lino Straulino e Dario Marušić, doi amîs che o ai lavorât cun lôr e che o voi indevant a lavorâ par valorizâ la culture musicâl dal Friûl e de Istrie.
_
In cjamp politic?
Il non che mi ven iniment ancje parcè che al è un amì e o discutìn tant di politiche al è Roberto Visintin, ma no sai se al è une buine reference (al rît, ndr). Un che al è stât daûr a tantis decisions impuartantis pal Friûl.
_
Ma a proposit di politiche, tu ce ti sintistu? Furlanist, autonomist…
Ti rispuint come che mi rispuindè Etelredo Pascolo. Une dì a cjase nestre al jere lui, e altris doi o trê, e jo che o jeri zovin i ai domandât: «Scusait, ma vô, che o sês plui anzians di me, ce pensaiso, ce si sintîso, autonomiscj o ce?” e mi à dite “Indipendentiscj.” (il ton al jere naturâl, scontât ndr). Ve, in cussience, chel o soi: indipendentist. Po dopo o ricognòs che e je une dificoltât spaventose pe realizazion.
__
Tu sêstu mestri par cualchidun?
A son zovins che si stant svicinant a nô. O vin viert a Spilimberc une sorte scuele di musiche popolâr fasint incuintris une volte al mês par insegnâ a sunâ i varis struments e a sunâ e cjantâ insiemi. E ti disarai che, cumò come cumò, cheste e je la robe che mi interesse e che mi apassione di plui. ❚
……………………………………….
FOCUS. Il personaç
FIORINDO MARIUZZA (Cjampfuarmit, 1766 – Cjampfuarmit, 1841). Nassût a Cjampfuarmit intal 1766 cul non di Floreano Dionisio, intai viers si firme Fiorindo. Al murì ai 19 di Avost dal 1841 di «reume di pet». In zoventût si trasferìs a Rome cul fradi piçul Secondo par servî li di cualchi famee. In chê citât i doi a imparin a sunâ il mandulin e la ghitare e a componi viers e cjançons. Intal 1793 a tornin a Cjampfuarmit lavorant tant che contadins e cjaliârs. I fradis Mariuzza a deventin però famôs tant che “oms di spetacul” cui lôr scherçs e cu lis lôr cjançons tipichis par furlan. A Cjampfuarmit e intai paîs dongje a vignivin clamâts a ogni sagre, bal, avigniment. Ator di lôr si cree une aure cuasi di liende, si conte che Mariuzza al vedi il “libri dal comant”, un libri magjic che, daûr de tradizion folkloriche, al jere stât scrit dal diaul che al faseve vê podês su personis, animâi e robis. I tescj des lôr cjançons a son stâts metûts dongje postums dai studiôs plui grancj de lenghe furlane tant che Joppi, Chiurlo, Corgnali e D’Aronco e a son une part impuartante dal corpus de lenghe scrite. ❚
